រតនគិរី៖ មន្ត្រីនគរបាលស្រុកអូរយ៉ាដាវ មួយរូប បានឲ្យដឹងថា នៅពេលថ្មីៗនេះ លោកវរសេនីយ៍ ងួន សុវណ្ណា ជាមេបញ្ជាការនគរបាលវរការពារព្រំដែន៦២៣ បានដាក់អាបុល និងកម្មករជនជាតិវៀតណាម២នាក់ ឈូសដីព្រៃ ឫស្សី ដើមឈើតូចធំរាប់រយពាន់ដើម ២កន្លែង ស្ថិតនៅភូមិប៉ក់ញ៉ៃ ឃុំប៉ក់ញ៉ៃ ស្រុកអូរយ៉ាដាវ យកធ្វើជាកម្មសិទ្ធិរបស់ខ្លួន ខណៈជំនាញរដ្ឋបាលព្រៃឈើធ្វើមិនដឹងមិនឮ។
ការឈូសឆាយដីព្រៃរបស់រដ្ឋចំនួនពីរកន្លែងយកមកធ្វើជាកម្មសិទ្ធិ មានប័ណ្ណកម្មសិទ្ធិ និងមានច្បាប់ឈូសឆាយយ៉ាងណានោះ យើងមិនអាចសុំការអត្ថាធិប្បាយណាមួយពីលោក ងួន សុវណ្ណា បានទេ ប៉ុន្តែនៅរសៀលថ្ងៃទី២៤ ខែមីនា តំណាងរបស់លោកឈ្មោះភាពនិយាយថា ដីរបស់មេគាត់ទិញពីគេហើយ ការឈូសឆាយដីខ្លួនឯងមានអីខុស។
ប្រធានការិយាល័យរៀបចំដែនដីនគរោបនីយកម្ម និងសំណង ស្រុកអូរយ៉ាដាវ មាននិយាយតាមទូរស័ព្ទនៅរសៀលថ្ងៃទី២៤ ខែមីនានេះថា គឺដីនៅចំណុចខាងលើគេទិញលក់ទទួលស្គាល់ត្រឹមភូមិ ឃុំមិនទាន់មានប័ណ្ណ ឬប្លង់ចេញដោយជំនាញសុរិយោដីនោះទេ។
ចំណែកនាយខណ្ឌរដ្ឋបាលព្រៃឈើលោកវង សុក្រសិរី នៅរសៀលថ្ងៃទី២៤ ខែមីនា ក៏មិនអាចទំនាក់ទំនងសុំការបំភ្លឺបានដែរ។
លោកឡេង យុគ នាយផ្នែករដ្ឋបាលព្រៃឈើបរកែវ មាននិយាយតាមទូរស័ព្ទនៅរសៀលថ្ងៃទី២៤ ខែមីនានេះថា ដីនៅត្រង់ចំណុចអង់តែនមានកម្មសិទ្ធិរបស់គេ ហើយដីនៅផ្លូវចូលភូមិជំនាញរដ្ឋបាលព្រៃឈើបានដាក់ពាក្យបណ្តឹងទៅ សាលាដំបូងចាត់ការមនុស្ស៣ទៅ៤នាក់ហើយ។
អភិបាលស្រុកលោក ម៉ា វិចិត្រ និយាយតាមទូរស័ព្ទនៅរសៀលថ្ងៃទី២៤នេះដែរថា លោកមិនបានដឹងទេ ចាំលោកចាត់កម្លាំងទៅមើល៕
