ព្រៃវែង ៖ ផ្ទះឈើ១ខ្នងរួមជាមួយសម្ភារៈជាច្រើនត្រូវអគ្គីភ័យលេបត្របាក់អស់ទាំងស្រុង។ហេតុការណ៍នេះបង្កឲ្យមានការភ្ញាក់ផ្អើលឡើងកាលវេលាម៉ោង១០និង៣០នាទីយប់ថ្ងៃទី១៦ខែមករាឆ្នាំ២០១៨ស្ថិតក្នុងភូមិព្រៃស្នួល.ឃុំគោខ្ទក.ស្រុកកំពង់ត្របែក.ខេត្តព្រៃវែង។
បើតាមរបាយការណ៍របស់សមត្ថកិច្ចបានឲ្យដឹងថា ផ្ទះដែលត្រូវអគ្គីភ័យឆាបឆេះអស់ទាំងស្រុងនេះមានទំហំ៨×៧ម៉ែត្រធ្វើអំពីឈើសរសរបេតុង.ប្រក់ក្បឿង.ជញ្ជាំងដែកម្ចាស់ឈ្មោះខៀវ.សូភេទស្រីអាយុ៦៧ឆ្នាំ។
តាមរបាយការណ៍ឲ្យដឹងបន្តថាហេតុការណ៍នេះមិនបណ្តាលឲ្យមានមនុស្សគ្រោះថ្នាក់ និងប៉ះពាល់ដល់ផ្ទះពលរដ្ឋជិតខាងនោះទេ គឺគ្រាន់តែបាត់បង់នូវសម្ភារៈដែលអគ្គីភ័យលេបត្របាក់រួមមានស្រូវចំនួន៤តោន.ម៉ាស៊ីនកិនស្រូវ១គ្រឿង.ម៉ាស៊ីនបូបទឹក១គ្រឿង.មាស៣តម្លឹង៥ជី.ប្រាក់រៀល៣លានរៀល.ប្រាក់ដុល្លារ៣.៥០០ដុល្លារ.កង់១គ្រឿង.កង្ហា៤គ្រឿង.ទូដាក់ខោអាវ២.ជង្រុកស្រូវទំហំ៤×៥ម៉ែត្រសង់អំពីឈើប្រក់ដែក១ខ្នង.ទូរទស្សន៍កូល័រ១គ្រឿង.បន្ទះសូឡាអាគុយ១កំប្ល៉េរ.ប្លង់ដី.សំបុត្រកំណើត និងឯកសារសំខាន់ៗជាច្រើនទៀតសរុបជាទឹកប្រាក់ប្រហែលជាង៧៤លានរៀល។
ករណីនេះសមត្ថកិច្ចបានសន្និដ្ឋានថាមូលហេតុមកពីឆ្លងចរន្តអគ្គីសនីផ្ទុះស្សេខ្សែភ្លើងទើបបណ្ដាលឲ្យឆាបឆេះបែបនេះ៕
