ភ្នំពេញប្រធានគណបក្ស សម រង្ស៊ី លោក គង់ គាំ បង្ហាញការខកចិត្តនឹងលោក សម រង្ស៊ី ដោយចោទថាមិនគោរពកិច្ចសន្យា ពីការផ្លាស់ប្តូរសមាជិកព្រឹទ្ធសភា ពាក់កណ្តាលអាណត្តិរបស់លោកស្រី ថាក់ ឡានី ។
តាមលិខិតមួយសន្លឹកដែលទទួលបាននៅថ្ងៃទី២៤ ខែមីនា ឆ្នាំ២០១៥នេះ ដោយមានចំណារលោក គង់ គាំ សរសេរថា លោកប្រធាន សម រង្ស៊ី ក្រឡាស់សម្តី កាលពីនៅប៉ារីស អំពីករណីលោកស្រី ថាក់ ឡានី ដែលថាបើប្រកាន់សច្ចៈគឺត្រូវប្តូរពាក់កណ្តាលអាណត្តិ ។
លោក គង់ គាំ អះអាងថា ខ្លឹមសារលើលិខិតបែកធ្លាយនោះ ពិតជាចំណាររបស់លោកមែន ។
ប៉ុន្តែលោកបញ្ជាក់បែបនេះ មិនបង្ហាញពីជម្លោះផ្ទៃក្នុងរវាងគណបក្ស សម រង្ស៊ី និងលោក សម រង្ស៊ី ដែលទៅធ្វើជាប្រធានគណបក្សសង្គ្រោះជាតិនោះទេ ។ លោកថា «ចង់ បញ្ជាក់ជូនគណៈកម្មការអចិន្ត្រៃយ៍ ព្រោះគណៈកម្មការអចិន្ត្រៃយ៍ម្តងបានឮពីខ្ញុំថា និងលោកប្រធានសម រង្ស៊ី សម្រេចថាប្តូរពាក់កណ្តាលអាណត្តិ ម្តងទៅឮពីខាងសមរង្ស៊ី ថាគាត់រក្សាដដែល ដូច្នេះខ្ញុំក៏ត្រូវធ្វើជាលាយលក្ខអក្សរដើម្បីឲ្យទាំងអស់គ្នា ជឿជាក់ថា ខ្ញុំនិយាយផ្ទាល់មាត់ពីមុនមកនោះ មិនបានមួលបង្កាច់ ឬភូតកុហកអីទេ» ។
មិនអាចរកការបញ្ជាក់ពី លោក សម រង្ស៊ី បានទេនៅថ្ងៃអង្គារនេះ ។ ចំណែកតំណាងរាស្ត្រមួយរូបរបស់គណបក្សសង្គ្រោះជាតិ ដែលស្និទ្ធនឹងលោក សម រង្ស៊ី គឺលោក អេង ឆៃអ៊ាង បដិសេធទាំងប្រយ័ត្នប្រយែង ថាទំនងជាមិនមានកិច្ចសន្យាណាសម្រេចដូចការលើកឡើងនេះទេ ។ លោកបញ្ជាក់ថា «ខ្ញុំចាំ កាលដែលមានទាក់ទងនឹងសេចក្តីសម្រេចកាលដែលនៅ គណបក្សសមរង្ស៊ី កាលពីឆ្នាំ២០១០ ដែលខ្ញុំនៅគណបក្សសមរង្ស៊ីដែរ គឺគណបក្សអត់មានធ្វើសេចក្តីសម្រេចពាក់កណ្តាលអាណត្តិព្រឹទ្ធសភាទេ អត់មានទេ ក្រោយមកខ្ញុំអត់ដឹងទេ» ។
ទោះជាយ៉ាងណា លោក គង់ គាំ បន្ថែមថា តាមការព្រមព្រៀងពីដើមទី គឺសមាជិកព្រឹទ្ធសភាគណបក្សសមរង្ស៊ី ទាំង១១រូប គឺមានតែ៣រូបទេ ដែលត្រូវនៅដល់ចប់អាណត្តិទី៣ ដែលមានរយៈពេល៦ឆ្នាំ ចាប់ពីឆ្នាំ២០១២ រួមមាន រូបលោក ( គង់ គាំ ) លោក ទាវ វណ្ណុល និងលោក ហុង សុខហួរ ។ ចំណែកសមាជិកព្រឹទ្ធសភាផ្សេងទៀត បានកំណត់ថា ត្រូវផ្លាស់ប្តូរត្រឹមពាក់កណ្តាលអាណត្តិ នៅដើមឆ្នាំ២០១៥នេះ ៕
លោក គង់ គាំ ប្រធានគណបក្សសម រង្ស៊ី (រូបថតពី៖ ហ្វេសប៊ុក)
