ទីផ្សារ​ឱសថ​របស់​បារាំង​នៅតែ​បន្ត​ឈានមុខ​ក្នុង​វិស័យ​ឱសថ​នៅ​កម្ពុជា​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 24 January, 2018 ក+ ក-

​ភ្នំពេញ ៖ ជា​យូរណាស់​មកហើយ ផលិតផល​ឱសថ​មកពី​ប្រទេស​បារាំង តែងតែមាន​ការគាំទ្រ​ពី​សំណាក់​ក្រុមគ្រូពេទ្យ និង​វេជ្ជបណ្ឌិត ក៏ដូចជា​ប្រជាពលរដ្ឋ​កម្ពុជា ហើយ​វត្តមាន​ឱសថ​របស់​បារាំង​ថ្មីៗ​តែងតែ​នាំចូល​មកកាន់​ទីផ្សារ ដើម្បី​ផ្គត់ផ្គង់​នៅតាម​ឱសថស្ថាន​នានា ក្នុង​ព្រះរាជណាចក្រ​កម្ពុជា ជាក់ស្ដែង ក្រុមហ៊ុន​នាំចូល និង​ចែកចាយ​ឱសថ អា​លី​យ៉ង់​ហ្វា​ម៉ា ដែលមាន​ឈ្មោះ​ល្បី​ក្នុង​វិស័យ​ឱសថ​កម្ពុជា បាន​នាំចូល​ឱសថ​ប្រភេទ​ថ្មីៗ​បន្ថែមទៀត​ពី​ប្រទេស​បារាំង មកកាន់​កម្ពុជា និង​បានដាក់​បង្ហាញ​ដល់​ក្រុម​វេជ្ជបណ្ឌិត និង​គ្រូពេទ្យ​កម្ពុជា​ជាច្រើន​ផងដែរ ។

​ថ្លែង​នៅក្នុង​កម្មវិធី​បង្ហាញ​ឱសថ​ប្រភេទ​ថ្មីៗ​ពី​ប្រទេស​បារាំង កាលពី​ល្ងាច​ថ្ងៃទី​២៣ ខែ មករា ឆ្នាំ ២០១៨​កន្លងទៅនេះ នៅ​សណ្ឋាគារ​ភ្នំពេញ លោក ឆាយ គ​ន្ធី អ្នកគ្រប់គ្រង​ផ្នែក​ទីផ្សារ​នៃ​ក្រុមហ៊ុន អា​លី​យ៉ង់​ហ្វា​ម៉ា​កាំ​បូដ បានអោយដឹងថា ផលិតផល​ដែល​ក្រុមហ៊ុន​អា​លី​យ៉ង់​ហ្វា​ម៉ា​កាំ​បូដ និង រោងចក្រ​ផលិត​ឱសថ​ដ៏​ធំ​មួយ​នៅ​បារាំង​បាន​សហការ​នាំចូល និង​ចែកចាយ​នៅលើ​ទីផ្សារ​កម្ពុជា គឺជា​ឱសថ​ដែល​មិនអាច​ខ្វះ​បាន​សម្រាប់​ក្រុមគ្រូពេទ្យ និង​វេជ្ជបណ្ឌិត ទូទៅ ជាពិសេស​នោះ​គឺ​នៅតាម​ឱសថស្ថាន និង​តាម​មន្ទីរពេទ្យ​នានា ។

​លោក​បន្តថា ក្រុមហ៊ុន​បារាំង​ដែល​បាន​សហការ​ជាមួយ​ក្រុមហ៊ុន​កម្ពុជា ក្នុងការ​នាំយក​ឱសថ​មក​ច​រា​រណ៍​នៅពេលនេះ​គឺមាន​ប្រវត្តិ​ផលិត និង​ចែកចាយ​ឱសថ​អស់​រយៈពេល​២០​ឆ្នាំ​មកហើយ នៅក្នុង​ទីផ្សារ​កម្ពុជា ហើយ​ក្រុមហ៊ុន​នេះ​ក៏មាន​ឈ្មោះ​ល្បី​ផងដែរ​លើ​វិស័យ​ឱសថ​នៅក្នុង​ប្រទេស​បារាំង ហើយពី​មួយថ្ងៃ​ទៅមួយថ្ងៃ ក្រុមហ៊ុន​នេះ​ក៏បាន​ខិតខំ​កែច្នៃ​នូវ​អ្វីដែល​ល្អៗ​បន្ថែមទៀត​សម្រាប់​មក​ផ្គត់ផ្គង់​នៅក្នុង​ប្រទេស​កម្ពុជា ក៏ដូចជា​ពិភពលោក​ទាំងមូល​ផងដែរ ។

​លោកជំទាវ ឆាយ ណ​យ អគ្គនាយិកា ក្រុមហ៊ុន​អា​លី​យ៉ង់​ហ្វា​ម៉ា​កាំ​បូដ ក៏បាន​អោយដឹង​ផងដែ​រថា ឱសថ​ដែល​ក្រុមហ៊ុន​ទាំងពីរ​បាន​សហការ​ជាមួយគ្នា នាំចូល​និង​ចែកចាយ​នៅក្នុង​ប្រទេស​កម្ពុជា ជា​ឱសថ​ដែលមាន​តម្លៃ​សមរម្យ តែមាន​គុណភាព​ក្នុងការ​ព្យាបាល ព្រោះ​ក្រុមហ៊ុន​ទាំងពីរ​បានគិត​គូរ​និង​ចង់​សម្រួល​ដល់​ជីវភាព​ប្រជាពលរដ្ឋ​អោយ​ការចំណាយ​កាន់តែ​អស់​តិច តែ​ទទួលបាន​ការព្យាបាល​ដែលមាន​ប្រសិទ្ធិភាព​ខ្ពស់ ៕​