ភ្នំពេញ ៖ បើយោងតាមសេចក្តីជូនដំណឹងរបស់ក្រសួងពាណិជ្ជកម្មនៅថ្ងៃព្រហស្បត្តិ៍នេះ បានកំណត់ថា ចាប់ពីថ្ងៃទី២ ដល់ថ្ងៃទី ១១ ខែកុម្ភៈ ឆ្នាំ ២០១៨ តម្លៃប្រេងសាំងដែលលក់រាយនៅតាមបណ្តាស្ថានយ៍ប្រេងឥន្ទនៈទាំងអស់នៅទូទាំងប្រទេស ត្រូវលក់ក្នុងតម្លៃមិនអោយលើសពី ៤០០០ រៀលក្នុងមួយលីត្រ សម្រាប់ប្រេងសាំងធម្មតា និង តម្លៃមិនអោយលើស ៣៨០០ រៀលសម្រាប់ប្រេសម៉ាស៊ូត។
បើធៀបនឹងកាលពីសប្តាហ៌មុន ប្រេងសាំងធម្មតា ដែលមានតម្លៃ៣៩៥០រៀលក្នុងមួយលីត្រ បានឡើង៥០រៀលបន្ថែមទៀតក្នុងដើមខែកុម្ភៈនេះ។ ដោយឡែកសម្រាប់តម្លៃប្រេងសាំងសូពែរ ដែលមិនបានដាក់បញ្ចូលក្នុងរូបមន្តគណនាតម្លៃប្រេងរៀងរាល់១០ថ្ងៃម្តង របស់ក្រសួងពាណិជ្ជកម្ម នោះមានតម្លៃប្រែប្រួលទៅតាមក្រុមហ៊ុនផ្គត់ផ្គង់នីមួយៗ ដែលនៅក្នុងថ្ងៃទី១ ខែកុម្ភៈនេះ មានតម្លៃចន្លោះពី ៤២០០រៀល ដល់៤៣០០រៀល ក្នុងមួយលីត្រ។ គួរកត់សំគាល់ថា តម្លៃប្រេងសាំងលក់រាយនៅកម្ពុជា បានបន្តកើនឡើងជាបន្តបន្ទាប់ ក្នុងរយៈពេលប៉ុន្មានខែចុងក្រោយនេះ ខណៈដែលប្រេងឆៅក្នុងទីផ្សារពិភពលោក បានឡើងថ្លៃលើស៦០ដុល្លារក្នុងមួយបារ៉ែល ដែលជាការកើនឡើងខ្ពស់បំផុតក្នុងរយៈពេល ២ ឆ្នាំមកនេះ ៕
