តម្រា​ខ្សែជីវិត​ប្រចាំឆ្នាំ​«​ច​» ព​.​ស ២៥៦១ គ​.​ស ២០១៨​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 16 February, 2018

​ភ្នំពេញ ៖ ​ដើម្បី​អបអរសាទរ​ទិវា​បុណ្យចូលឆ្នាំថ្មី​ឆ្នាំ ចរ ជា​ឆ្នាំនេះ​ជា​ធាតុឈើ តាម​ប្រពៃណី​ជនជាតិ​ចិន និង​អាចជា​ប្រយោជន៍​ខ្លះ​ក្នុងការ​សម្រាប់​ការស្វែងរក​ជោគ​លាភ និង​ទប់ស្កាត់​នូវ​ភាព​ចង្រៃឧបទ្រព​ផ្សេងៗ​កុំ​ឲ្យ​កើតមាន​ដល់​លោកអ្នក និង​ក្រុមគ្រួសារ​នោះ លោក មឿ​ន ញាណ ការី​និពន្ធ​របាយការណ៍​ពិសេស កាសែត​ភ្នំពេញ​ប៉ុស្តិ៍ បាន​ជួប​សម្ភាសន៍​ជាមួយ​លោក​ព្រឹទ្ធាចារ្យ ចាំង ហាំង​ឡុង ជា​គ្រូទាយ​ចិន​សែ​ល្បីល្បាញ​នៅ​រាជធានី​ភ្នំពេញ ដើម្បី​ប្រមើលមើល​ពី​ជោគជតារាសី​ទាំង ១២ ឆ្នាំ សម្រាប់​មិត្ត​អ្នកអាន​គ្រប់ៗ​គ្នា​ធ្វើការ​ត្រិះរិះ​ពិចារណា​រៀងៗ​ខ្លួន​ដូចខាងក្រោម​នេះ ៖

១-​ឆ្នាំ ជូត – កណ្តុរ​

ឆ្នាំនេះ​ជោគជតារាសី​មិនសូវ​ល្អ​ទេ ដោយសារ​មនុស្ស និង​លុយ​, យក្ស និង​សាច់​, ឆ្កែ ឆ្មា ខាំ​កណ្តុរ​។ ដូច្នេះ​អ្នក​កើត​ឆ្នាំជូត​ទាំងប្រុស​-​ទាំងស្រី ត្រូវ​ប្រុងប្រយ័ត្ន កុំ​ឲ្យ​គេ​ស៊ី​ឡាក់​លើ​ខ្លួន​។ ចូរ​ប្រយ័ត្ន​លុយកាក់​កុំ​ឲ្យ​គេ​ខ្ចី បើ​មិន​អ៊ីចឹង​ទេ ខ្ចី​ទៅជា​ទុំ​ហើយ សូម្បីតែ​លេង​តុងទីន​ក៏ដោយ​ត្រូវ​ប្រយ័ត្ន​គេ​រត់ចោល​ដែរ​។ ពេលណា​គេ​ត្រូវ​ការខ្ចី ឬ​ពឹង​យើង​គេ​អង្វរក​ទន់ភ្លន់​ណាស់ ប៉ុន្តែ​ដល់ពេល​យើង​ទៅ​ទារ​គេ​វិញ គឺ​ដូច​ទៅ​ខ្ចីបុល​អង្ករ​ពី​គេ​អីចឹង​។
​រយៈពេល​ពេញ​មួយឆ្នាំ​នេះ ត្រូវ​ប្រយ័ត្ន​នៅក្នុង​ខែ​បារាំង​ចំ​លើ​ខែ ៣, ៥, ៦, ១០ និង​ខែ ១២​។ ចំពោះ​ដំណើរ​ប្រព្រឹត្តិ​ទៅជា​រៀងរាល់ថ្ងៃ ក៏ត្រូវ​ប្រយ័ត្ន​ពី​ម៉ោង ១១ ដល់​ម៉ោង ៣ រសៀល​។​

ទោះជា​យ៉ាងណា អ្នក​ឆ្នាំ ជូត នៅក្នុង​អំឡុង​ឆ្នាំនេះ គឺ​នៅតែ​ជា​មេដឹកនាំ​គេ មាន​ល្បិច​ខ្ពស់​ហើយ​ត្រូវ​ចេះ​លាក់ខ្លួន​នៅក្រោម​ដី ប្រសិនជា​មើលឃើញ​ឱកាសល្អ​ដល់​ខ្លួន ចូរ​សម្រុក​វាយលុក​ឲ្យ​អស់ពី​សមត្ថភាព ប៉ុន្តែ​បើ​ស្ទាក់ស្ទើរ​គួរ​ចេះ​នៅ​ស្ងៀម​ទៅវិញ​។ ចូរ​ចាំ​ថា លោក​-​អ្នក​នៅតែ​សំខាន់ ដោយ​ត្រូវបាន​គេ​រាប់​ជា​អ្នក​ទី ១ ក្នុង​រយៈពេល ១២ ឆ្នាំ​ម្តង និង​ក្នុង​រយៈពេល ៦០ ឆ្នាំ​ម្តង​ជានិច្ចកាល​។​

២-​ឆ្នាំ ឆ្លូវ – គោ​

​ចិន មាន​សុភាសិត​មួយ​និយាយថា «​ប្រយ័ត្ន​ក្បាលមាន់ កន្ទុយគោ​» គឺ​មានន័យថា ក្បាលមាន់​តូច​មែន​ពិតតែ​ជា​មេ​គេ ចំណែក​កន្ទុយគោ​ធំ​វែង តែ​វា​ជា​កញ្ជះ​គេ​ទេ ព្រោះ​វា​បានតែ​ធ្វើ​កិច្ចការ​តូចៗ​បក់​ដេញ​រុយ ឬ​មូស​ទេ​។
​រីឯ​សុភាសិត​ខ្មែរ​និយាយថា «​ឆ្កែ​ចេះតែ​ព្រុះ (​រទេះ​) គោ​ចេះតែ​ទៅមុខ​» ព្រោះ​គោ​ដឹងថា ឆ្កែ​អត់​ហ៊ាន​ធ្វើ​អី​គោ​ទេ ដោយសារ​គោ​អាង​ក្បាល​ជាមាន់​។ ឆ្នាំនេះ គោ​ត្រូវមាន​ល្បិច​ខ្លះ​ដើម្បី​ទប់ទល់ និង​វាយបក​យកជ័យ​ជំនះបាន​ល្អប្រសើ​រ​។​
​ដូច្នេះ​ឆ្នាំនេះ លោក​-​អ្នក​កើត​ឆ្នាំ ឆ្លូវ ត្រូវ​រក្សា​ភាព​ស្ងៀមស្ងាត់ កុំ​ឈ្លោះទាស់ទែង​គេ​ឲ្យ​សោះ ពិសេស​បើ​អ្នកធ្វើការ​វិញ​ប្រយ័ត្ន​មេ​ដក​ចោល​ដូច​ស្ពៃ​។ ឆ្លូវ​ឆ្នាំនេះ កុំ​រវល់​រឿង​គេ គឺ​ទាំង​ក្នុង ទាំង​ក្រៅ​កុំ​ឈ្លោះ​គ្នា​ឲ្យ​សោះ​។ ឆ្លូវ​ឆ្នាំនេះ ទាំងប្រុស​ទាំងស្រី​មិនល្អ​សម្រាប់​រៀបការ​ទេ ប៉ុន្តែ​បើ​ភ្ជាប់ពាក្យ​ទុក​ដល់​ឆ្នាំ ២០១៩ បានការ ហើយ​ដល់​ឆ្នាំ ២០២០ យក​បានកូន​មួយទៀត​នោះ​គឺ​ល្អ​លេខ​។​

៣-​ខាល – ខ្លា​

​សុភាសិត​ខ្មែរ​ពោលថា «​វត្ត ១ អាចារ្យ ២, ភ្នំ ១ ខ្លា ២, មេឃ ១ ព្រះអាទិត្យ ២»…» ប៉ុន្តែ​ឆ្នាំនេះ សម្រាប់​អ្នក​កើត​ឆ្នាំ ខាល មាន​ទេវតា​ខ្លា ១ នៅចាំ​ថែរក្សា​ជាស្រេច ដូច្នេះ​មានន័យថា មាន​ខ្លា ២ ហើយ​។ អីចឹង​លោក​-​អ្នក​កើត​ឆ្នាំ ខាល គឺ​ត្រូវ​រៀបចំ​ពិធី​ធ្វើ​រំដោះគ្រោះ​ចេញ និង​លើករាសី​ឡើង​។ មនុស្ស​ចាស់​ប្រយ័ត្ន​ដួល ក្មេងៗ​ប្រយ័ត្ន​រត់​ជំពប់ជើង ឯ​មនុស្ស​ធំ​ពេញវ័យ​ប្រយ័ត្ន​គ្រោះថ្នាក់​ចរាចរណ៍​។​
​ជាប្រចាំ​ថ្ងៃ សូម​ប្រយ័ត្ន​គ្រោះកាច​នៅវេលា​ម៉ោង ៤-៥ ទាបភ្លឺ​, ពេល​ល្ងាច​ថ្ងៃ​លិច​, និង​ម៉ោង ៩-១១ ព្រឹក ចូរ​ប្រយ័ត្ន​ការបើកបរ​។ តាមពិតទៅ​ឆ្នាំ ខាល ត្រូវ​នឹង​ឆ្នាំ ចរ មែន ដូច្នេះ​ចូរ​ប្រយ័ត្នប្រយែង​ចំពោះ​អ្នកផ្សេង​ច្រណែនឈ្នានីស​លប​វាយប្រហារ​ពីក្រោយ​ខ្នង​។ យក​ល្អ​កុំ​អង្គុយ​លើ​ចង្អេរ​លើក​ខ្លួនឯង ហើយ​ត្រូវ​ប្រយ័ត្នប្រយែង​ចំណី​អហារ​ហូបចុក និង​សុខភាព​។​
​ថ្វីបើ​ហ្វុ​ង​ស៊ុយ​ឆ្នាំនេះ​មិនសូវ​ល្អ​មែន ប៉ុន្តែ​តាម​ក្បួនតម្រា​បុរាណ​របស់​ចិន គេ​ឲ្យ​អ្នក​កើត​ឆ្នាំ ខ្លា ត្រូវ​ទៅរក​ខ្ទម​អ្នកតាចិន​ដែលមាន​រូប​ខ្លា (​នៅ​កម្ពុជា មាន​ខ្ទម​អ្នកតា វត្តភ្នំ​, ស្តា​ត​អូឡាំពិក​, តាខ្មៅ​, និង​ជាពិសេស​បើ​ធ្វើដំណើរ​ដល់​ខេត្តកំពង់ធំ ពេលទៅដល់​រូប​ដំរី​ជាន់ខ្លា ខ្លាខាំ​ដំរី​) រួច​ឲ្យ​ធ្វើ​ពិធី​ឧបកិច្ច​ចេញទៅ (​បើ​ពុំ​ចេះ​ធ្វើ​ពិធី​នេះ​ទេ សូម​មករក​កុងសែ ចាង ហាំង​ឡុង​)​។​

៤-​ថោះ – ទន្សាយ​

​លោក​-​អ្នក​កើត​ឆ្នាំថោះ ដែល​ឡាក់​ឆុង (​ឆុង​ខ្លាំង​) ជាមួយ​ឆ្នាំ មាន់ កាលពី​ឆ្នាំ​មុននេះ តែ​ឆ្នាំ​ថ្មី​នេះ​ឡាក់​ខាក់ (​គ្រោះល្អ​) ជាមួយ​ឆ្នាំ ចរ គឺ​ល្អ​លេខ ១ តែម្តង​។ ប៉ុន្តែ​ដោយសារ​មាន​តារា​មិនល្អ (​ផ្កាយចោរ​) និង​ការ​ប្រហែស​ប្រហោង ដូច្នេះ​អ្នក​កើត​ឆ្នាំ ថោះ ត្រូវ​ប្រយ័ត្នប្រយែង​ទ្រព្យសម្បត្តិ​របស់​ឲ្យ​មែនទែន ព្រោះ​ខ្លាច​ចោរលួច​-​ឆក់​-​ប្លន់ ឬក៏​បាត់បង់​ជាដើម​។​
​ឆ្នាំនេះ​បើ​ចង់​ធ្វើ​ការរកស៊ី ឬ​វិនិយោគ​ទុក សុំ​កុំ​ចូលរួម​ជាមួយ​អ្នក​ឆ្នាំរកា និង​ឆ្នាំជូត​ឲ្យ​សោះ​។ ហាម​ឈ្លោះ​គ្នា​ជាមួយ​មិត្តភក្តិ ជាពិសេស​ពាក់ព័ន្ធ​រឿង​សាសនា និង​នយោបាយ​។ ចូរ​កុំ​ធ្វើដំណើរ​ឆ្លង​ទឹក​ក្នុង​ខែ​សែន​លោក​ខែ​របស់​ចិន និង​ខែ​ភ្ជំបិណ្ឌ​ខ្មែរ​។ ឆ្នាំនេះ​ទន្សាយ​មាន​ទេវតា​មួយ​ឈ្មោះ​ឡេង​តិច នៅចាំ​ថែរក្សា ដូច្នេះ​យក​ល្អ​រៀងរាល់​រាត្រី​ថ្ងៃ ១៥ កើត ចន្លោះ​ម៉ោង ៧-១១ យប់ ត្រូវធ្វើ​ពិធី​សែន​ព្រះ​ច័ន្ទ​នៅមុខ​ផ្ទះ ដោយ​រំឭក​ហៅ​ឈ្មោះ​ទេវតា​ឡេង​តិច មក​ផង​គឺជា​ការប្រសើរ​ល្អ​។​

៥-​រោង – នាគ​

ដួង​ជតារាសី​ឆ្នាំរោង គឺ​ឡាក់​ឆុង​ទៅហើយ ប៉ុន្តែ​មាន​អ្នកខ្លះ​នៅតែ​ល្អ​ដែរ​ដោយសារ​បាន​ថ្ងៃ ឬ​ខែ​យោង​។ ចូរ​ចាំ​ថា នៅពេលដែល​នាគ​ជាប់គាំង​នៅតាម​ឈូង​សមុទ្រ ឬ​ដីខ្សាច់​នោះ គឺ​ក្តាម បង្គារ បង្កង កំ​ពិស ក៏​មើលងាយ​ដែរ​។ ហើយ​ត្រូវ​តម ៣​ខ ជា​ដាច់​ខាង ទី ១-​កុំទៅ​កន្លែង​មាន​ក្តា​មឈូស ឬ​បុណ្យសព (​សូម​ផ្ញើរ​តែ​លុយ​ដាក់​ស្រោមសំបុត្រ​ចូលរួម​សិន​បាន​ហើយ​), ទី ២-​កុំ​សាង​សង់ផ្ទះ ឬ​ទៅ​ការដ្ឋាន​សាងសង់ (​ប៉ុន្តែ​អាច​ទិញ​ផ្ទះ​ស្រាប់​បាន ហើយ​ត្រូវ​ឲ្យ​ប្តី ឬ​ប្រពន្ធ ជា​អ្នក​កើត​ឆ្នាំ​ផ្សេង​មើល​ជំនួស​), ទី ៣-​កុំទៅ​ឆាឆៅ​គេ​ថើប​គ្នា​, ដឹក​ដៃ​កូនក្រមុំ​ចូល​បន្ទប់​ផ្សំ​ដំណេក​, កុំ​មើល​គេ​សែន​ផ្សេងៗ និង​កុំទៅ​ទស្សនកិច្ច​។​
​ក្រៅពីនេះ នៅ​ឆុង​នឹង​ខែ​ចូលឆ្នាំ​ខ្មែរ (​ខែ ៤ បារាំង​) និង​ខែ ១​។ ឆ្នាំនេះ រោង គឺ​យ៉ាប់​ណាស់ ប្រយ័ត្ន​ចាញ់បោក​គេ​រឿង​លុយកាក់ ទាំង​ការប្រគល់​ឲ្យ​គេ និង​ការទទួល​លុយ​ពី​គេ គឺ​ត្រូវមាន​សាក្សី​-​បញ្ជីស្នាម និង​អ្នកត្រួតពិនិត្យ​ឲ្យ​ច្បាស់លាស់​។​

៦-​ម្សាញ់ – ពស់

​ឆ្នាំម្សាញ់ គឺ​ពស់ និង​ឆ្កែ ឆ្នាំចរ​នេះ គឺ​នៅ​ក្នុងព្រៃ​ពេល​វា​ជួបគ្នា​តែងតែ​ភ្ញាក់ផ្អើល​គ្នា​ទៅវិញទៅមក អត់​ហ៊ាន​នឹង​គ្នា​ទេ​។ ដូច្នេះ ត្រូវ​តម​កុំ​ឈ្លោះ​គ្នា​ឡើង​តុលាការ បើ​ពុំ​នោះទេ​មាន​ភាគី​ណាមួយ​រងគ្រោះ​ហើយ ឬក៏​មាន​ភាគី​ទី ៣ ចូលមក​ឆ្លៀតឱកាស​មិន​ខាន​។ បើ​ជ្រុល​ជា​ឈ្លោះទាស់ទែង​គ្នា ចូរ​ដោះស្រាយ​ស្ងាត់ៗ​គ្នាឯង​ទៅ​។​
​ម្សាញ់​ឆ្នាំនេះ អ្នក​វ័យ​ចំណាស់​កុំ​ដើរ​ទស្ស​កិច្ច​ទៅ​ក្រៅប្រទេស ព្រោះ​នឹងមាន​ជំងឺ​ផ្សេងៗ​តាម​យាយី​យ៉ាប់​ហើយ ប៉ុន្តែ​បើ​ដើរលេង​កម្សាន្ត​តាម​រមណីយដ្ឋាន​ក្នុងស្រុក គឺ​ល្អ​ណាស់​។ បើ​ក្មេងៗ​វ័យ​សិក្សា​គឺ​ល្អ ហើយ​បើ​ម្សាញ់​ជា​ពស់វែក​រាង​រាវ គឺមាន​ជា​ញ៉ែ​ចែចូវ​គឺ​ល្អ​ហើយ​ការ​តែម្តងទៅ ប៉ុន្តែ​បើ​ម្សាញ់​ពស់ថ្លាន់​ធាត់ គឺ​យ៉ាប់​ហើយ ដូច្នេះ​ត្រូវ​សម្រក​គីឡូ​រង់ចាំ​ដល់ ២០២០ ទើប​រៀបការ​បានល្អ​។​

៧- មមីរ – សេះ​

​សេះ​ឆ្នាំនេះ​យី​អ៊​ន់​ឡើង​ខ្ពស់​ល្អ ប៉ុន្តែ​អំឡុង​ពេលនេះ កុំ​បណ្តោយ​ខ្លួន​ទទួលទាន​ស្រា​រហូតដល់​ស្រវឹង (​នាំ​ឲ្យ​មាន​គ្រោះ​ចង្រៃ​) បើ​ប្រុស​ទៅ​រួម​សង្វាស​ជាមួយ​ស្រី​ផ្សេង​ប្រយ័ត្ន​កើតរោគ​ឆ្លង​ផ្សេងៗ​ដល់​ស្លាប់ តែបើ​ស្រី​វិញ​ហាម​ធ្វើ​ដឹងឮ ឬ​រវីរវល់​រឿង​របស់​គ្រួសារ​អ្នកដទៃ ប្រយ័ត្ន​គ្រោះ​ចង្រៃ​នោះ​ធ្លាក់​មកលើ​ខ្លួនឯង​វិញ គឺ​ត្រូវ​នឹង​ពាក្យ​ខ្មែរ​ថា «​ធ្វើបុណ្យ បាន​បាប​»​។​
​អ្នក​កើត​ឆ្នាំមមីរ​ទាំងប្រុស​ទាំងស្រី ក្នុងឆ្នាំនេះ​ហាម​ដាច់ខាត​ការធានា​អះអាង​ជំនួស​គេ ដូចជា ធានា​អ្នក​ជាប់ទោស (​ជាប់គុក​) ឬ​ធានា​រឿង​លុយកាក់​ជាដើម​។ បើ​ចង់​រកស៊ី ឬ​វិនិយោគ​អ្វី​ផ្សេងៗ ហាម​មិន​ឲ្យ​ចូល​ហ៊ុន​ជាមួយ​អ្នក​ឆ្នាំជូត និង​ឆ្នាំឆ្លូវ​ទេ​។​

៨- មមែ – ពពែ​

​ឆ្នាំនេះ​ដំណើរ​ជីវិត​របស់​ពពែរ​មិនសូវ​ល្អ​ទេ ព្រោះ​អ្នក​គង្វាល​ពពែរ នៅ​ម៉ុង​ហ្គោល​លី​ទាំងអស់​តែងតែ​ប្រើ​ឆ្កែ​ប៊ែ​រ​ហ្ស៊េ​ធំៗ ដើម្បី​ឲ្យ​ជួយ​គៀង​ដោយ​ព្រុះ​កំញើញ​សត្វ​ពពែរ​ឲ្យ​ដើរ​ត្រង់​ជួរ​ចូល​ហ្វូង​។ ដូច្នេះ​បើ​អ្នកធ្វើការងារ​ផ្សេងៗ ចូរ​រៀបចំខ្លួន​ឲ្យ​បាន​ត្រឹមត្រូវ ខិតខំ​ធ្វើ​ការងារ កុំ​មាត់ករ ឬ​តវា ប្រយ័ត្ន​ថ្នាក់លើ​គេ​មើលឃើញ​ទាស់ភ្នែក​គេ​បញ្ឈប់​ពី​ការងារ​។​
​បើ​នៅក្នុង​គ្រួសារ​កុំ​ឈ្លោះទាស់ទែង​គ្នា បើជា​កូនចៅ​ត្រូវ​ទ្រាំ​តស៊ូ​ធ្វើជា​កូន​ក​ត្ត​ញ្ញូ​ត​ទៀត​ទៅ កុំ​ឲ្យ​ម៉ែឪ​ខឹង​។ បើ​ប្រតិបត្តិ​បានល្អ​ហើយ តែ​គ្រោះ​ចង្រៃ​នៅតែ​តាម​យាយី​ទៀត នោះ​លោក​-​អ្នក​ដាច់ខាត​កុំ​រារែក គឺ​ត្រូវតែ​សកម្មប្រយុទ្ធ​ដោះស្រាយ​ទៅនោះ​នឹង​បាន​ជោគជ័យ​ជា​ក្រោយ​ជាមិនខាន​។​

៩- វក – ស្វា​

​អ្នក​កើត​ឆ្នាំ​ស្វា មាន​រាសី​ធម្មតា​ទេ​ក្នុងអំឡុង​ឆ្នាំចរ​នេះ​។ លោក​-​អ្នក​អាចមាន​សំណាង ឬ​ត្រូវ​រង្វាន់​ជា​ឆ្នោត​ធំៗ ប្រសិនបើជា​អ្នកទិញ​ឆ្នោត ផឹក ឬ​ប្រើប្រាស់​សម្ភារៈ​អ្វីៗ ដែលមាន​គម្រប ឬ​សន្លឹកឆ្នោត​របស់​វា​ជា​ឆ្នោត​សំណាង​នោះ អាចមាន​លាភ​ត្រូវ​សំណាង​ធំ​។​
​នៅក្នុង​ឆ្នាំចរ​នេះ អ្នក​កើត​ឆ្នាំវក ត្រូវ​ហាម ២​ខ ទី ១-​កុំទៅ​បុណ្យសព​, ទី ២-​កុំទៅ​ហែសព​។ ប៉ុន្តែ​បើ​ខាន​ពុំបាន​ត្រូវ​សាកសួរ​ទៅ​គ្រូ​ចិន​សែ​ឲ្យ​ជាក់ច្បាស់ តាំងពី​ពេលវេលា និង​អ្វីខ្លះ​ត្រូវ​ប្រយ័ត្ន ឬ​ត្រូវធ្វើ​នាពេលនោះ​។ នៅ​អំឡុង​ឆ្នាំនេះ​ត្រូវ​ទុកដាក់​លុយកាក់​ឲ្យ​បាន​ត្រឹមត្រូវ ប្រយ័ត្ន​ខែ​ចូលឆ្នាំ​ខ្មែរ (​ខែ ៤ បារាំង​), ខែ ៨ និង​ខែ ១០ ជាពិសេស​ស្រីៗ​ដែលមាន​កាន់​កាបូបដៃ ពេល​ដើរ​ឆ្លងផ្លូវ ដើរ​តាមផ្លូវ (​ទោះបី​ក្នុង​កាបូប​នោះ មានតែ ២-៣ ពាន់​រៀល​លុយ​ខ្មែរ ក៏ដោយ​ត្រូវ​ប្រយ័ត្ន​ចោរឆក់​)​។​

១០- រកា – មាន់​

​ជោគជតារាសី​របស់​អ្នក​កើត​ឆ្នាំមាន់​បាន​កន្លងផុត​ឡាក់​ឆុង​ហើយ ហើយ​ឆ្នាំនេះ​ឆ្កែ​នៅតែ​តាមរក​រឿង​មាន់​ដដែល ប៉ុន្តែ​មាន់​មិន​ខ្លាច​ឆ្កែ​ទេ ព្រោះ​មានតែ​មាន់​ល្ងង់​ទេ ដែល​ឆ្កែ​ខាំ​ងាប់ ចំណែក​មាន់​ឆ្លាត គឺ​ហើរ​ទំ​លើ​មែកឈើ​រងាវ​ហើយ​ជុះនោម​ដាក់​ក្បាល​ឆ្កែ​ទៀត​។ ទោះជា​យ៉ាងណា កុំ​ឆា​ឆៃ​ដល់​គេ គឺ​កុំ​មាត់ច្រើន​។​
​អ្នក​កើត​ឆ្នាំមាន់ ក៏​មិនត្រូវ​បង្ហាញ​ច​រិ​ក​ជា​វីរជន វីរនារី​ទេ ឬ​ក​តាំងខ្លួន​ថា លោកិយ​នេះ​មានតែ​អញ​មួយ​នោះ ចូរ​ចាំ​ថា នៅពេល​ទទួលបាន​ជោគជ័យ​ចាំ​រងាវ​ទើប​ល្អ​។ ពាក្យ​ចិន ថា «​ជំងឺ​ចូល​តាម​មាត់​ចង្រៃ​ចេញ​តាម​មាត់​» ហើយ​ប្រយ័ត្ន​គេ​បោក​តាម​បច្ចេកវិទ្យា (​អ៊ីនធឺណិត​)​។ មាន់​ឆ្នាំនេះ គឺជា​មាន់​ប្រយុទ្ធ​មែន (​ជល់​) ប៉ុន្តែ​កុំ​ឆ្លោះ​គ្នា​ប្រយ័ត្ន​គេ​យកទៅ​ស្ងោរ ឬ​ការី ចូរ​រក្សា​ភាព​ស្ងាត់​ល្អ​ជាង​គឺ «​ងើយ​ស្កក អោនដាក់គ្រាប់​»​។​

១១- ចរ – ឆ្កែ​

ចរ​ឆ្នាំនេះ​ជាន់​ឆ្នាំ​មែនទែន​មិនល្អ​ទេ​។ ដូច្នេះ​កុំ​ឈ្លោះ​ជាមួយ​គេ កុំ​ព្រុះ​ខ្លាំងពេក កុំ​អួតអាង ត្រូវ​ស្តាប់​យោបល់​គេ បើ​គេ​មកជា​មិត្ត​យើង​កុំ​មើលងាយ​គេ ចូរ​រាប់អាន​គ្នា​ទៅ តែបើ​ដល់​កម្រិត​ថា នាំ​គ្រោះថ្នាក់​ដល់​ខ្លួន​ខ្លួន ចូរ​ធ្វើការ​វាយតប់​ដោយ​កម្លាំង​ចុះ​។ គេ​ថា ឆ្កែ​ព្រុះ​អត់​ខាំ​។​
​អ្នក​កើត​ឆ្នាំចរ មាន​ភាពស្មោះត្រង់​ជាមួយ​មិត្តភក្តិ​ណាស់​។ ប្រសិន​បើក​ម្លោះ​ច្រេះ​ចាប់ ចូរ​ចិញ្ចឹម​ឆ្កែ​ប៊ែ​រ​ហ្ស៊េ​លេង​ទៅ ដើម្បី​ទទួលបាន​អាយុ​វែង​។ ដោយសារ​ឆ្នាំនេះ​ឆុង អ្នក​ត្រូវ​តម ៣​ខ ដែរ ១-​កុំ​សង់ផ្ទះ ឬ​ជួសជុល​ការដ្ឋាន​, ២-​កុំទៅ​បុណ្យសព ឬ​កន្លែង​ក្តា​មឈូស​, ៣-​អាពាហ៍ពិពាហ៍ កុំទៅ​រៀប​គ្រែ ឬ​ចង​មុង​ឲ្យ​គេ​។​
១២- កុរ – ជ្រូក​

​គេ​តែង​និយាយ​លេងសើច​ថា «​ជ្រូក​កុំ​ធាត់​ជាង​ក្របី និង​កុំ​ធំ​ជាង​ដំរី​» ទោះជា​ជ្រូក​យ៉ាងណាក៏ដោយ ត្រូវតែ​កុំ​ដេក​ដល់​ថ្ងៃ​ចាំង​គូថ​ឲ្យ​សោះ ព្រោះ​ឆ្នាំនេះ​ជ្រូក​ត្រូវ​គ្នា​ជាមួយ​ឆ្កែ​ល្អ​ណាស់​។ ប៉ុន្តែ​ទាល់តែ​ចេះ​ក្តាប់​ឱកាស នឿយហត់​ពេក លុយកាក់​ច្រើនពេក​អាច​នាំ​ឲ្យ​ឈឺ​ដែរ​។​
​យក​ល្អ ខែ ៥ (​បារាំង​) ខៃ ៨ ខែ ១១ នៅ​ម៉ោង ៩-១០-១១ ព្រឹក និង​យប់ រីឯ​ល្ងាច​ម៉ោង ៣-៤-៥ ល្ងាច មិនត្រូវ​ទៅ​មន្ទីរពេទ្យ ដើម្បី​សាកសួរ​អ្នកជំងឺ​ធ្ងន់​ណា ដែលមាន​លក្ខណៈ​ជា​ជំងឺឆ្លង​ផ្សេងៗ​នោះទេ​។ រីឯ​ពេល​ចូលឆ្នាំ​ចិន ឬ​ឆ្នាំ​ខ្មែរ បើ​ទៅលេង​តំបន់​មាត់សមុទ្រ​កុំ​ក្លាហាន​ពេក ប្រយ័ត្ន​ខ្យល់ព្យុះ និង​ទឹករលក​ខ្ពស់​។ ឆ្នាំនេះ ប្រសិនជា​អាច​កើតកូន អាចមាន​កូន​ទោះ​ស្រី ឬ​ប្រុស​គឺ​ល្អ​ដូចគ្នា​៕