ភ្នំពេញ៖បុរស នារី ៣នាក់ បានបើករថ យន្តម៉ាកBMWស៊េរីទំនើបមួយគ្រឿងទាំងស្ថានភាពស្រវឹងជោកជាំក្នុងល្បឿនលឿនដូចហោះ រេចង្កូតទៅបុកបើកឈើនៅសងខាងផ្លូវ និងជ្រុលរះម៉ូតូ៤គ្រឿង ថែមទាំងបុកមនុស្ស បណ្តាលឲ្យរងរបួសធ្ងន់២នាក់ទៀត។
ហេតុការណ៍នេះ បានកើតឡើងកាលពីវេលាម៉ោង២ និង១០នាទីទាបភ្លឺថ្ងៃទី០១ ខែមេសា ឆ្នាំ២០១៥ នៅតាមបណ្តោយផ្លូវលេខ២៦៨ ស្ថិតក្នុងសង្កាត់ចតុមុខ ខណ្ឌដូនពេញ។
សមត្ថកិច្ចមូលដ្ឋាន បានឲ្យដឹងថា រថយន្តបង្កហេតុនោះម៉ាកBMW(X5) ពណ៌ខ្មៅ ពាក់ស្លាកលេខភ្នំពេញ2AE-1113 បើកបរដោយឈ្មោះ អ៊ុង កុលហ្សានិច ភេទស្រី អាយុ២៥ឆ្នាំ មុខរបរលក់រថយន្តឲ្យក្រុមហ៊ុនBMW(AWO) និងមានមុខរបរបើកក្រុមហ៊ុនទេសចរណ៍ ស្នាក់នៅផ្ទះលេខ២០CE២ ផ្លូវលេខ១៧៨ សង្កាត់បឹងរាំង ខណ្ឌដូនពេញ។ អ្នករួមដំណើរជាមួយ២នាក់ទៀតទី១-ឈ្មោះ តាន់ គឹមលី ភេទស្រី មុខរបរនិស្សិតសកលវិទ្យាល័យជាតិគ្រប់គ្រង និងទី២-ឈ្មោះ ខា ខេងឈូង ភេទប្រុស អាយុ២៥ឆ្នាំ មុខរបរលក់ដូរស្នាក់នៅផ្ទះលេខ១ ផ្លូវសហព័ន្ធរុស្ស៊ី សង្កាត់កាកាប ខណ្ឌ ពោធិសែនជ័យ ត្រូវឃាត់ខ្លួនបញ្ជូនទៅការិយាល័យចរាចរ ជើងគោករាជធានីទាំងអស់តែម្ដង។
សមត្ថកិច្ចបន្តទៀតថា ចំណែកអ្នករបួសធ្ងន់ចំនួន២នាក់ ទី១.ឈ្មោះ យិន ចាន់ធួន ភេទប្រុស អាយុ៤៧ឆ្នាំ ឋានៈឧត្តមសេនីយ៍ទោ មុខរបរអង្គរក្សស្នាក់នៅក្នុងបន្ទាយរងរបួសធ្ងន់ជាំឈាមប្រអប់ជើង ខាងស្តាំង ទី២.ឈ្មោះ សឹង សុជាតិ ភេទប្រុស អាយុ២៩ឆ្នាំ ឋានៈជាឧត្តមសេនីយ៍ទោ មុខរបរអង្គរក្ស ស្នាក់នៅក្នុងបន្ទាយ ត្រូវរបួសក្បាល ឈាមតាមត្រចៀក និងក្បាលជង្គង់ខាងឆ្វេង កំពុងសង្គ្រោះនៅមន្ទីរពេទ្យ។
សាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេបានឃើញរថយន្តម៉ាកBMWសេរីទំនើបមួយគ្រឿង តំលៃប្រហែល១៥ម៉ឺនដុល្លារ ពណ៌ខ្មៅ ពាក់ស្លាកលេខភ្នំពេញ2AE-1113 ដែលបើកបរដោយនារីស្រវឹងធ្លាក់ភ្នែក និងអ្នករួមដំណើរជាមួយ២នាក់ទៀត ដែលទើបចេញពីក្លិបរាត្រីបានបើកបោះពួយយ៉ាងលឿនធ្វើដំណើរតាម បណ្តោយផ្លូវនរោត្តមពីត្បូងមកជើងមកដល់រង្វង់មូលវិមានឯករាជ្យ ស្រាប់តែជ្រុលហោះឡើងចិញ្ចើមផ្លូវទៅបុកអង្គរក្សដែលឈរយាមនៅទីនោះ បណ្ដាលឲ្យរងរបួសធ្ងន់២នាក់ ដោយរថយន្តនោះនៅមិនទាន់អស់ល្បឿនក៏ជ្រុលបុក ដើមឈើបាក់អស់មួយដើម និងបុករះម៉ូតូចំនួន៤គ្រឿងទៀត ទើបរថយន្តទៅមុខលែងរួច។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅ សង្គ្រោះនៅមន្ទីរពេទ្យភ្លាមៗ។ ចំណែក រថយន្តបង្ករួមទាំងម្ចាស់រថយន្តត្រូវបានសមត្ថកិច្ចកិច្ចយកទៅរក្សាទុកនៅការិយាល័យចរាចរណ៍ជើងគោលដើម្បីរង់ចាំដោះស្រាយនៅពេលក្រោយ៕
