ភ្នំពេញ ៖ ស្របពេលតម្រូវការដីធ្លីកំពុងកើនឡើងទាំងតម្លៃ និងទំហំផ្ទៃដី អ្នកជំនាញក្នុងវិស័យអចលនទ្រព្យ បានអះអាងថា នៅទីក្រុងភ្នំពេញត្រូវការដីលំនៅដ្ឋានប្រមាណ៣.៦០០ហិកតា បន្ថែមទៀត បើគិតដល់ឆ្នាំ២០៣០ខាងមុខ។
តាមការចេញផ្សាយរបស់គេហទំព័រ Propertyarea.asia បានអោយដឹងថា បើគិតដល់ឆ្នាំ២០៣០ ក្រុងភ្នំពេញមានតំរូវការដីសំរាប់លំនៅដ្ឋានដ៏ធំរហូតដល់ប្រមាណ៣៦០០ហិកតា ឬស្មើនឹងជាង២៤ដងនៃផ្ទៃដីបឹងកក់ទាំងមូល។ តាមការវិភាគលើទិន្នន័យ នៃតំរូវការលំនៅដ្ឋាននៅក្រុងភ្នំពេញ អាចព្យាករណ៍បានថា ក្នុង១ឆ្នាំៗ ក្រុងភ្នំពេញមានតំរូវការដីសំរាប់លំនៅដ្ឋានប្រមាណ៣០០ហិកតា ឬស្មើនឹងជាង២ដងនៃផ្ទៃបឹងកក់ទាំងមូល”។ បើតាមការបញ្ជាក់របស់ លោក ង៉ែត ជូ អ្នកជំនាញផ្នែកសេដ្ឋកិច្ច និងអចលនទ្រព្យបានពន្យល់ថា ការអះអាងនេះដោយផ្អែកលើមូលដ្ឋានមួយចំនួន ដូចជាទី១ ជាមធ្យមក្នុង១ឆ្នាំៗ ប្រជាជនក្រុងភ្នំពេញត្រូវការផ្ទះចំនួនប្រមាណ២ម៉ឺនខ្នង។
បើផ្ទះ១ល្វែងត្រូវការផ្ទៃដីប្រហែល១០០ ម៉ែត្រការ៉េ នោះនឹងមានតំរូវការដីប្រមាណ២០០ហិកតា ប៉ុន្តែក៏ត្រូវគិតគូរពីដីសំរាប់ធ្វើផ្លូវ សួន សាលារៀន និងផ្សារផងដែរ ដូច្នេះនឹងត្រូវការដីបន្ថែមប្រមាណ១០០ហិកតាទៀត។ ជារួមក្នុង១ឆ្នាំៗភ្នំពេញត្រូវការប្រមាណ៣០០ហិកតា សំរាប់សង់លំនៅដ្ឋាន។
ចំណែកមូលដ្ឋានទី២ បើគិតពីផ្ទៃដីបឹងកក់ទាំងមូល មានទំហំប្រមាណ១៣៣ហិកតា ដូច្នេះតំរូវការដីប្រមាណ៣០០ហិកតា គឺស្មើនឹងជាង២ដងនៃផ្ទៃដីបឹងកក់ទាំងមូល ។ រីឯមូលដ្ឋានទី៣ បើ១ឆ្នាំៗ មានតំរូវការដីសំរាប់លំនៅដ្ឋានប្រហែលជាង២ដង នៃផ្ទៃដីបឹងកក់នោះ ក្នុងរយៈពេល១២ឆ្នាំទៅមុខទៀត បើគិតចាប់ពី២០១៩-២០៣០ ក្រុងភ្នំពេញនឹងមានតំរូវការដីសំរាប់លំនៅដ្ឋានប្រមាណជាង២៤ដងនៃផ្ទៃបឹងកក់។ នេះជាតំរូវការដ៏ធំ ដែលមិនទាន់គិតពីតំរូវការផ្សេងទៀតដូចជាដីសំរាប់ធ្វើឃ្លាំង និងរោងចក្រផ្សេងទៀតផង។
ដោយឈរលើតំរូវការដូចការព្យាករណ៌ និងមូលដ្ឋានទាំងនេះ អ្នកជំនាញខាងអចលនទ្រព្យ បានបង្ហាញថា គឺជាឱកាសល្អសម្រាប់ការធ្វើផែនការក្នុងការវិនិយោគដីធ្លីសំរាប់រយៈពេលវែង ៕
