ភ្នំពេញ៖ កូនលោកឧកញ៉ា ដ៏មានឥទ្ធិ ពលពីរនាក់បានឈ្លោះទាស់សំដីគ្នា បង្កឲ្យមានការប្រើអំពើហិង្សាដាក់គ្នា រហូតដល់កម្លាំងសមត្ថកិច្ចចាប់បញ្ជូនខ្លួនកូនប្រុសឧកញ៉ា ឌួង ងៀប ឈ្មោះ ដួង ឆាយ ទៅសាលាដំបូងរាជធានីភ្នំពេញ កាលពីរសៀល ម៉ោង២ ថ្ងៃទី១៤ ខែមេសា ឆ្នាំ២០១៥ ។
ជនបង្កត្រូវស្ថិតក្រោមការសាកសួរពីតំណាងអយ្យការ លោក កុល បុន បន្ទាប់ពីសមត្ថកិច្ចកងរាជ អាវុធហត្ថឃាត់ខ្លួនកាលពីយប់ថ្ងៃទី១៣ ខែមេសា សាកសួរនិងសំយោគបទល្មើស ចោទប្រកាន់ចំនួន ២ករណី ទី១-បទហិង្សាដោយចេតនា និងទី២-បទគំរាមថានឹងបាញ់សម្លាប់ទៅលើកូនឧកញ៉ា ទ្រី ភាព ។
សេចក្តីរាយការណ៍បានអោយដឹងថា កូនឧកញ៉ាដែលអាងឥទ្ធិពលឪពុក គឺមានឈ្មោះ ដួង ឆាយជាកូនលោកឧកញ៉ា ដួង ងៀប ភេទប្រុស អាយុ២៨ឆ្នាំ និងគូរជម្លោះម្ខាងទៀតជាកូនរបស់លោកឧកញ៉ា ទ្រី ភាព ដែលមានឈ្មោះល្បីក្នុងការរស៊ីជំនួញឈើមានឈ្មោះ ទ្រី ដាលុច ភេទប្រុស អាយុ ២១ឆ្នាំ។
កូនលោកឧកញ៉ា ដួង ងៀប គឺឈ្មោះ ដួង ឆាយ ត្រូវបានកម្លាំងកងរាជអាជវុធហត្ថរាជធានីភ្នំពេញចាប់ខ្លួននៅជិត រង្វង់មូលសម្ដេចសង្ឃជូន ណាត កាលពីយប់ថ្ងៃទី១៣ ខែមេសា។
សមត្ថកិច្ចបានឲ្យដឹងថា មុនពេលកើតហេតុ កូនឧកញ៉ា ទ្រី ភាព ឈ្មោះ ទ្រី ដាលុច និងប្អូនប្រុសម្នាក់ទៀត រួមជាមួយនឹងមិត្តភក្តិ បានទៅចូលរួមក្នុងកម្មវិធីមួយ ក្រោយមកក៏ត្រលប់ចូលអង្គុយលេង ហាងសាក់រូប ស្ថិតក្នុងខណ្ឌចំការមន។ គ្រានោះ ឈ្មោះ ឌួង ឆាយ ត្រូវជាកូនឧកញ៉ា ឌួង ងៀប ក៏បានចូលទៅក្នុងហាងសាក់រូបនោះផងដែរ ដើរដោយដំណើរកោងក្អេងក្អាង ទើបអ្នកនៅក្នុងហាង រួមទាំងកូនឧកញ៉ា ទ្រី ភាព ផងដែរ បានមើលមុខ ទើបធ្វើឲ្យ ឌួង ឆាយ ដែលគេទទួលស្គាល់ថា ជនដ៏ទំនើង និងឈ្លើយផុតលេខនោះ ខឹង រួចវាយកូនឧកញ៉ា ទ្រី ភាព ដែលបានមើលមុខ។ ស្របពេលដែលកូនឧកញ៉ា ទ្រី ភាព ដើរចូលទៅក្នុងយកឆ្នាំងសាកទូរស័ព្ទ ជនបង្ក ឌួង ឆាយ ក៏បានស្រែកសំឡុត និងគំរាម ព្រមទាំងវាយយ៉ាងដំណំ ត្រូវចំក្រោមស្និតផ្កា បណ្តាលឲ្យបែកឈាម។
ប្រភពដដែល បន្តថា ជនរងគ្រោះ មិនបានតបតជាមួយនឹងជនបង្កនោះទេ ប៉ុន្តែ ឌួង ឆាយ នៅតែធ្វើសកម្មភាពវាយបន្ថែម និងបញ្ជាឲ្យអង្គរក្សយកកាំភ្លើង ថាគំរាម និងបាញ់សម្លាប់ចោល ប៉ុន្តែក្រុមអង្គរក្សមិនបានស្តាប់បទបញ្ជា ទើបម្ចាស់ហាងស្ទុះទៅសម្របសម្រួល។ ភ្លាមៗនោះ ឌួង ឆាយ ក៏បានចូលរថយន្តបើកចេញ ក្នុងគោលបំណងគេចខ្លួច ប៉ុន្តែធ្វើដំណើរដល់ចំនុចម្តុំនាគបាញ់ទឹក នៅជិតរង្វង់មូលសម្ដេច សង្ឃជូន ណាត ស្ថិតនៅក្នុងខណ្ឌដូនពេញ ក៏ត្រូវបានសមត្ថកិច្ចកងរាជអាវុធហត្ថខណ្ឌ ដូនពេញ ឃាត់រថយន្ត ដើម្បីឲ្យជនបង្កចុះ មកដោះស្រាយតាមផ្លូវច្បាប់។
គួររំលឹកថា ជនបង្ក ឌួង ឆាយ ធ្លាប់ប្រព្រឹត្តនូវបទល្មើស ដែលប្រើអំពើហិង្សា បង្ករបួស ស្នាម បាញ់បោះសេរី ល្បីពេញរាជធានីភ្នំពេញ ក្នុងនោះរូបគេក៏ជាឈ្មួញព្រៃឈើ លោតឆ័ត្រ ដែលត្រូវបានសមត្ថកិច្ចបង្ក្រាបបានជាញឹកញាប់ និងចាប់ខ្លួនបញ្ជូនទៅសាលាដំបូងរាជធានីភ្នំពេញ។ ថ្មីៗនេះជនបង្កទើបតែចេញពីគុក PJ មិនទាន់បាត់ក្លិនគុកផងនោះ ក៏ប្រព្រឹត្តបទល្មើស ដោយភាពមិនរាងចាល ចំពោះសកម្មភាពបទល្មើសដដែលៗ។ ដូច្នេះ តំណាងអយ្យការ លោក កុល បុណ្យ គួរតែពិនិត្យឡើងវិញឲ្យដិតដល់ប្រកបដោយតម្លាភាព ពាក់ព័ន្ធទៅនឹងបទល្មើស ដែលជនបង្កធ្លាប់ប្រព្រឹត្ត និងទើបចេញពីគុក ដោយទោសព្យួរ គួរតែមានវិធានការ តាមផ្លូវច្បាប់ចំពោះទោសដែលមានស្រាប់ និងបទល្មើសថ្មី ដែលបង្កើតបន្ថែមទៀត៕
