ភ្នំពេញ ៖ ឯកអគ្គរដ្ឋទូតថ្មីនៃប្រទេសឥណ្ឌូនេស៊ីប្រចាំកម្ពុជា ឯ.ឧ ដឺមែន ហាសែង បានប្តេជ្ញាចិត្ត ចំពោះសម្តេចតេជោ ថា ឯកឧត្តមនឹងប្រឹងប្រែងឲ្យអស់ពីសមត្ថភាព ដើម្បីធ្វើយ៉ាងណា ជម្រុញទំនាក់ទំនងនេះ តាមរយៈការសហការយ៉ាងស្និតរមួតរវាងកម្ពុជានិងឥណ្ឌូនេស៊ី ឲ្យបានឈានទៅដល់កម្រិតខ្ពស់ មួយថែមទៀត។
ឯ.ឧ. បានថ្លែងបែបនេះ នៅក្នុងជំនួបពិភាក្សាការងារ និងសំដែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រី នៅវិមានសន្តិភាព កាលពីរសៀលថ្ងៃទី២២ ខែមិថុនា ម្សិលមិញនេះ។
ឯ.ឧ មន្ត្រីការទូតរូបនេះ បានសន្យាថាខិតខំជម្រុញការហោះហើររបស់ក្រុមហ៊ុនអាកាសចរណ៍ Lion Air ដែល មាន បំណងចង់បើកការហោះហើរត្រង់ មកកាន់ព្រះរាជាណាចក្រកម្ពុជា ឲ្យបានឆាប់រហ័ស ដើម្បី ឲ្យមានទំនាក់ទំនង រវាងប្រជាជននិងប្រជាជន កាន់តែខ្លាំងឡើង។
សម្តេចតេជោ បានបញ្ជាក់ថា ទំនាក់ទំនងនៃប្រទេសទាំងពីរ គឺមានភាពល្អណាស់ ខណៈឆ្នាំ២០១៨នេះគឺជាខួប៦០ឆ្នាំ នៃទំនាក់ ទំនងការទូត រវាងប្រទេសទាំងពីរ។ សម្តេចតេជោស្នើឲ្យភាគីទាំងពីរពិនិត្យមើល សកម្មភាពផ្សេងៗ ដើម្បីធ្វើរួមគ្នា ឆ្លុះបញ្ចាំងទំនាក់ទំនង៦០ឆ្នាំ ដែលប្រទេសទាំងពីរមានកន្លងមកនេះ។
សម្តេចបានជម្រាបជូនឯកឧត្តម ស៊ូដឺមែនផងដែរថា ទំនាក់ទំនងលើវិស័យសេដ្ឋកិច្ច ពាណិជ្ជ កម្ម ទេសចរណ៍ គឺមានសារៈសំខាន់ណាស់ ដូច្នោះសម្តេចបានលើកទឹកចិត្ត អោយឯកឧត្តមឯកអគ្គ រដ្ឋទូត ពិនិត្យមើលលើទំនាក់ទំនងកិច្ចសហប្រតិបត្តិការ លើវិស័យទាំងនេះ និងវិស័យផ្សេងៗទៀត ដែលអាចជាលទ្ធភាព ដើម្បីជម្រុញនូវកិច្ចសហប្រតិបត្តិការ រវាងប្រទេសទាំងពីរ។
ពាក់ព័ន្ធនឹងការហោះហើរត្រង់ សម្តេចបានសម្តែងនូវការអបអរសាទរ ហើយបានមាន ប្រសាសន៍ថា វាគឺជាជ្រុងមួយនៃលទ្ធភាព ក្នុងការពង្រីកទំនាក់ទំនង នៃប្រទេសទាំងពីរបន្ថែម ទៀត ៕
