ភ្នំពេញ ៖ ដូចការគ្រោងទុក បន្ទាប់ពីមហាគ្រួសារខ្មែររួបរួមគ្នាក្នុងស្មារតីជឿថាខ្មែរអាចធ្វើបាន នៅពេលនេះក្រម៉ាវែង ជាងគេរបស់ប្រទេសកម្ពុជាត្រូវបានគណៈកម្មការ World Guiness Records ប្រកាសថាបានឈ្នះការបំបែកកំណត់ត្រក្រមាវែងជាងគេក្នុងលោក។
សំឡេងហូរកញ្ញ្រៀវបានបន្លឺឡើង បន្ទាប់ពីគណៈកម្មការ World Guiness Records ប្រកាសថា ក្រម៉ាវែងជាងគេរបស់កម្ពុជាបានបំបែកកំណត់ត្រាពិភពលោកហើយ។ ការវិនិច្ឆ័យដែលកម្មការ World Guiness Records ផ្តល់ជូនកំណត់ត្រាដល់ក្រម៉ាកម្ពុជា ដោយផ្អែកលើចំណុចសំខាន់ពីររួមមាន កម្ពុជាបានត្បាញក្រមាដែលសាច់ក្រមាតឹងណែនល្អ និងត្បាញក្រមាវែងបំផុតជាង ១២០០ម៉ែត្រ។
លទ្ធផលនៃការប្រកាសនេះបានបង្កើតស្នាមញញឹមដល់លើផ្ទៃមុខមនុស្សគ្រប់គ្នាដែរបានចូលរួមអបអរសាទ ក្នុងស្មារតីខ្មែររួមគ្នា ខ្មែរធ្វើបាន។ មនុស្សក្មេងចាស់ប្រុសស្រី ទោះឈរនៅក្រោមកំដៅថ្ងៃក្តៅក្តី ប៉ុន្តែបានឈរចាប់ មើលនៅលទ្ធផលទាំងរំភើបរីករាយនឹង អន្ទះសារ។
សូមបញ្ជាក់ថា កម្មវិធីបំបែកឯតទគ្គកម្មក្រមាដែលវែងជាងគេលើពិភពលោក បានចាប់ដំណើរ ការពីថ្ងៃទី១៤ ខែកុម្ភៈ រហូតដល់ថ្ងៃទី២៨ ខែមិថុនា ឆ្នាំ២០១៨ ដោយកម្មវិធីទទួលបាន ភ្ញៀវចំនួនសរុប ៣៣៨,០៥០នាក់ដែលក្នុងនោះមានអ្នកចុះឈ្មោះរៀនត្បាញចំនួន ២២,៣១៥នាក់ និងអ្នកចូលរួមត្បាញក្រមា ១០០០ម៉ែត្រ ចំនួន១៩,៧៧១។ ប្រសិនបើយើងយកសរសៃរនិមួយៗ នៃក្រមានេះមកបន្តគ្នាតែមួយសរសៃរប្រវែងប្រមាណ ២,៩១២,៦២៥ម៉ែត្រ។ នេះជាសមិទ្ធផលថ្មីមួយទៀតរបស់កម្ពុជា ក្រោមការផ្ដួចផ្ដើមដោយសហភាពសហព័ន្ធយុវជនកម្ពុជា និងក្រុមចលនា Go Go Cambodia ក្រោមអត្ថន័យស្នូលដ៏សំខាន់ «រួមគ្នាជឿថាខ្មែរធ្វើបាន» ពោលគឺការបំបែកកំណត់ត្រាឯតទគ្គកម្ម «ក្រមាវែងជាងគេលើពិភពលោក» នេះជាមោទនភាព ជាកិត្តិយសជាតិថ្មីមួយទៀត ដែលពលរដ្ឋខ្មែរបានរួមគ្នាកសាងឡើង៕
