ភ្នំពេញ ៖ កម្ពុជានឹងមានភ្លៀងធ្លាក់រាយប៉ាយពីមធ្យមទៅច្រើន ស្ទើរទូទាំងប្រទេសពេញមួយសប្ដាហ៍ គឺចាប់ពីថ្ងៃទី៥ ដល់១១ ខែកក្កដា ។ មូលហេតុដែលនាំឲ្យកម្ពុជា មានភ្លៀងធ្លាក់នេះ ដោយសារឥទ្ធិលជ្រលងសម្ពាធទាប (នៅលើផ្ទៃដី) ដែលកំពុងអូសបន្លាយកាត់លើប្រទេសកម្ពុជា ។ នេះបើតាមការព្យាករណ៍របស់ក្រសួងធនធានទឹក និងឧតុនិយម ។
ក្រសួងធនធានទឹក និងឧតុនិយម នៅថ្ងៃទី០៤ ខែកក្កដា ឆ្នាំ២០១៨នេះ បានចេញសេចក្តីប្រកាសព័ត៌មានដោយបានបញ្ជាក់ថា បាតុភូតធម្មជាតិពីរ គឺខ្យល់មូសុងនិរតី និងជ្រងសម្ពាធទាប បាននិងកំពុងមានឥទ្ធិពលសារជាថ្មីម្តងទៀត មកលើតំបន់មាត់សមុទ្រ ដែលលក្ខណៈបែបនេះ នឹងធ្វើឱ្យមានភ្លៀងធ្លាក់រាយប៉ាយឡើងវិញ ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស ចាប់ពីថ្ងៃ០៥ ដល់ថ្ងៃទី១១ ខែកក្កដា ឆ្នាំ២០១៨។
ចាប់ពីថ្ងៃទី០៥ ដល់ថ្ងៃទី០៩ នឹងមានភ្ញៀវធ្លាក់ច្រើនជាបន្តបន្ទាប់ នៅតាមបណ្តាលខេត្តជាប់មាត់សមុទ្រ។ ចាប់ពីថ្ងៃទី០៥ ដល់ថ្ងៃទី១១ ខែកក្កដា នឹងមានភ្លៀវធ្លាក់រាយប៉ាយឡើងវិញ ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស។
ជាមួយគ្នានេះ ក្រសួងអំពាវនាវសូមបងប្អូនប្រជានេសាទ និងអ្នកធ្វើដំណើរតាមសមុទ្រ បង្កើតការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ៕
