ខេត្តកំពង់ស្ពឺ ៖ ស្ត្រីជាម្ចាស់លុយបានរងរបួសស្នាម ដោយសារតែម្ចាស់ស្រែដែលជាកូនបំណុលបានវាយប្រតាយប្រតប់ ខណៈដែលភាគីម្ចាស់ស្រែបានដាក់បញ្ចាំអោយម្ចាស់លុយចំនួន២២.០០០ដុល្លា មិនទាន់បានសងលុយមួយរៀលផង ហ៊ានទៅដណ្តើមយកស្រែពីម្ចាស់លុយមកវិញទាំងបំពាន កាលពីដើម ខែកក្កដា ឆ្នាំ២០១៨ កន្លងទៅ។ នេះបើតាមការអះអាងបញ្ជាក់របស់ម្ចាស់បំណុល។
បើតាមសម្តីរបស់លោក វ៉ែន ចាន់ អាយុ៥៣ឆ្នាំ ជាមន្ត្រីរាជការ និងប្រពន្ធឈ្មោះជា ពៅ អាយុ៥០ឆ្នាំ ជាមេផ្ទះ រស់នៅក្នុងភូមិអូរក្រោម ឃុំព្នាយ ស្រុកសំរោងទង ខេត្តកំពង់ស្ពឺ បានប្រាប់អោយដឹងថា រូបលោក និងប្រពន្ធទទួលបញ្ចាំយកស្រែចំនួន៣ បូកជាមួយកូនស្រែតូច(អំពកផ្គួបគ្នា ធ្វើជាស្រែចំនួន៣) ពីឈ្មោះ បូ អាន ភេទប្រុស អាយុ៤៩ឆ្នាំ មុខរបរកសិករ និងប្រពន្ធឈ្មោះ ហង់ ចាន់ថុល អាយុ៤៥ឆ្នាំ រស់នៅក្នុងភូមិ ឃុំ ជាមួយគ្នា ក្នុងតម្លៃ ២២.០០០ដុល្លារអាមេរិក ដោយមិនមានលក្ខខណ្ឌកំណត់កាលបរិច្ឆេទខែ ឆ្នាំអ្វីនោះឡើយ ដោយសារតែគិតថា ជាអ្នកស្រុកជាមួយគ្នា គឺលុះត្រាតែភាគីខាងម្ចាស់ស្រែមានលុយសងគ្រប់ទើបមានសិទ្ធិអាចយកស្រែនោះទៅធ្វើវិញបាន ដោយមានការទទួលដឹងឮពីមេភូមិ មេឃុំ ថែមទៀតផង គឺនៅឆ្នាំ២០១៥កន្លងទៅ។ លោក វ៉ែន ចាន់ បានបន្តទៀតថា បន្ទាប់ពីបានធ្វើកិច្ចសន្យាដាក់បញ្ចាំស្រែចំនួន៣ ស្មើនឹងប្រាក់ ២២.០០០ដុល្លាររួចមក លោកក៏បានប្រើប្រាស់ដីនេះដោយធ្វើស្រូវចាប់ពីឆ្នាំ២០១៥ ដល់ឆ្នាំ២០១៦ សរុបបានចំនួន២ឆ្នាំ។
លោក វ៉ែន ចាន់ ម្ចាស់លុយបាននិយាយអោយដឹងទៀតថា ស្រាប់តែអំឡុងពេលខែឧសភា ឆ្នាំ២០១៧ លោកបានចុះទៅភ្ជួរស្រែ គោលបំណងធ្វើស្រែស្រូវតទៅទៀត ស្រាប់តែឈ្មោះ បូ អាន និងកូនប្រុសម្នាក់ មកឃាត់រូបលោក ដោយនិយាយថា អត់អោយអ្នកឯងមកធ្វើស្រែនេះតទៅទៀតទេ ដោយសារតែជាដីកេរ្តិ៍ដំណែលរបស់ដូនតាគេទៅវិញ។ ខណៈនោះ គាត់(វ៉ែន ចាន់) ក៏បានឆ្លើយតបវិញថា ចុះក្រែង បូ អាន ឯងដាក់ស្រែនេះ យកលុយខ្ញុំចំនួន២២.០០០ដុល្លារ ដែលរហូតមកដល់ពេនេះ នៅមិន មិនទាន់សងលុយខ្ញុំសូម្បីតែមួយរៀលផងនោះ គិតយ៉ាងម៉េច។ ខណៈនោះ ឈ្មោះ បូ អាន បានតបវិញថា ទោះយ៉ាងនេះក៏ដោយ រូបគេលែងអោយ វ៉ែន ចាន់ ឯងធ្វើស្រែលើដីនេះតទៅទៀតហើយ។
លោក វ៉ែន ចាន់ បានបន្ថែមទៀតថា បន្ទាប់ពីមានរៀងបែបនេះ លោកក៏បានរាយការណ៍ទៅអាជ្ញាធរ ភូមិ ឃុំ និងសមត្ថកិច្ច មកធ្វើការសម្របសម្រួលដែរ ប៉ុន្តែភាគីខាងឈ្មោះ បូ អាន និងឈ្មោះ ហង់ ចាន់ថុល នៅតែបន្តរារាំង និងទាមទារដកដីស្រែនោះរហូតដល់សព្វថ្ងៃ។លុះដល់ថ្ងៃទី២៩ ខែកក្កដា ឆ្នាំ២០១៧ ស្រាប់តែប្តីប្រពន្ធ បូ អាន និងកូនៗរបស់គេ បានយកគោយន្តទៅភ្ជួរដីស្រែនោះ ហើយគាត់ជាម្ចាស់លុយ បានទៅឃាត់តែត្រូវប្តីប្រពន្ធ បូ អាន ឆ្លើយទាំងទទឹងទទែងថា បើគេមិនយកស្រែមកធ្វើវិញទេ តើបានលុយឯណាមកសងចំនួន២២.០០០ដុល្លានោះ។
លោក វ៉ែន ចាន់ ថា លុះមកដល់អំឡុងដើមខែកក្កដា ឆ្នាំ២០១៨ នេះឈ្មោះ បូ អាន និងប្រពន្ធ បានទៅភ្ជួរស្រែនោះទៀត តែគាត់ក៏បានទៅឃាត់ស្រាប់តែប្រពន្ធរបស់ បូ អាន ស្ទុះទៅវាយតប់ បណ្តាលឲ្យប្រន្ធគាត់ឈ្មោះ ជា ពៅ បណ្តាលអោយរបួសស្នាមលើផ្ទៃមុខ។ បន្ទាប់មក រួចគាត់បានទៅដាក់ពាក្យបណ្តឹង ដើម្បីអោយសមត្ថកិច្ចជួយរកយុត្តិធម៌ ផងដែរ ខណៈដែលលុយជំពាក់២២.០០០ដុល្លា មិនទាន់បានសងសូម្បីតែមួយរៀលលុយខ្មែរផង ហើយថែមទាំងមកដណ្តើមយកស្រែដែលដាក់បញ្ចាំនោះវិញទាំងបំពាន ដូចនេះក្នុងនាមរូបលោកជាម្ចាស់លុយ និងបង្ករបួសស្នាមលើប្រពន្ធគាត់ទៀត។
លោក វ៉ែន ចាន់ ក៏បានសូមសំណូមពរដល់អស់លោកអាជ្ញាធរ មូលដ្ឋាន ភូមិ ឃុំ ស្រុក ខេត្ត ជំនាញពាក់ពន្ធ័ និងជាពិសេសតុលាការ មេត្តាជួយស្រាវជ្រាវជួយរកយុត្តិធម៌អោយក្រុមគ្រួសារលោកជាម្ចាស់លុយផង។
ពាក់ពន្ធ័ នឹងការលើកឡើងខាងលើនេះ ភាគីឈ្មោះ បូ អាន និងប្រពន្ធឈ្មោះ ហង់ ចាន់ថុល បានបញ្ជាក់ដោយទទួលស្គាល់ថា គាត់ពិតជាបានបញ្ចាំស្រែទៅអោយឈ្មោះ វ៉ែន ចាន់ និងប្រពន្ធឈ្មោះ ជា ពៅ នោះមែន ក្នុងតម្លៃ២២.០០០ដុល្លារប្រាកដមែន តែអ្វីដែលគាត់ហ៊ានដកហូតយកដីស្រែមកធ្វើវិញនោះ គឺតុលាការខេត្ត បានសម្រេចអោយគាត់សងម្ចាស់បំណុលគេឲ្យគ្រប់ចំនួន ព្រមទាំងសងការប្រាក់ចំនួន១៨% ក្នុង១ឆ្នាំថែមទៀតផង ដូច្នេះ បើគាត់មិនយកដីស្រែមកធ្វើវិញទេ តើគាត់បានលុយឯណាសងម្ចាស់លុយនោះ៕
(រូបពាក់អាវលឿង ពាក់មួក ជាស្ត្រីម្ចាស់ដី)
