ភ្នំពេញ ៖ បើទោះបីជាការបោះឆ្នោតជាតិកាន់តែខិតជិតមកដល់ក្តី ការជួញដូរភាគហ៊ុននៅក្នុងផ្សារមូលបត្រកម្ពុជានៅតែបង្ហាញពីភាពវិជ្ជមាន និងកាន់តែមានភាពប្រសើរឡើង ដែលបង្ហាញតាមរយៈតារាងទិន្នន័យ នៃការបញ្ជារទិញភាគហ៊ុនគិតត្រឹមខែកក្ដដានេះ។
សេចក្តីប្រកាសព័ត៌មានរបស់ក្រុមហ៊ុនផ្សារមូលបត្រកម្ពុជា ចេញផ្សាយថ្ងៃទី២៥ ខែកក្កដានេះ បានបង្ហាញពីភាពវិជ្ជមាននៃការជួញដូរភាគហ៊ុន ក្នុងផ្សារមូលបត្រកម្ពុជា ក្នុងនោះគេសង្កេតឃើញបរិមាណភាគហ៊ុនដែលត្រូវជួញដូរហាក់មានភាពស៊ីចង្វាក់គ្នារវាងអ្នកទិញ និងអ្នកលក់។
តាមតារាងទិន្នន័យរបស់ក្រុមហ៊ុនទីផ្សារមូលបត្រកម្ពុជា បង្ហាញថាបរិមាណ ភាគហ៊ុន ដែលបានបញ្ជារទិញក្នុងផ្សារមូលបត្រកម្ពុជា ចាប់ពីខែមីនាដល់ខែមិថុនាឆ្នាំ២០១៨ មានការកើនឡើងរហូតដល់ជាង២១៤ភាគរយ ជាក់ស្ដែងក្នុងខែមីនាចំនួនភាគហ៊ុនសរុបដែលបានបញ្ជារទិញមានត្រឹមតែជាង៣២ម៉ឺន២ពាន់ភាគហ៊ុន បានកើនឡើងដល់ជិត៩៨ម៉ឺន៧ពាន់ភាគហ៊ុន នៅក្នុងខែមិថុនា។ តាមរយៈកំណើននេះ ក៏បង្ហាញពីទំនោរបន្តកើនឡើងនៃការបញ្ជារទិញភាគហ៊ុនរហូតដល់ចំនួនជាង៣លាន៦ម៉ឺនភាគហ៊ុន គិតត្រឹមរយៈពេល១៧ថ្ងៃ ក្នុងខែកក្កដានេះផងដែរ។
តារាងរបស់ក្រុមហ៊ុនទីផ្សារមូលបត្រកម្ពុជា ក៏បានបង្ហាញទិន្នន័យប្រៀបធៀបបរិមាណបញ្ជាទិញភាគហ៊ុនសរុបរបស់ក្រុមហ៊ុនដែលចុះបញ្ជីនីមួយៗ សម្រាប់រយៈពេល២ខែចុងក្រោយនេះផងដែរ ក្នុងនោះ ភាគហ៊ុនរបស់កំពង់ផែស្វយ័តក្រុងព្រះសីហនុ(PAS) មានបរិមាណបញ្ជាទិញច្រើនជាងគេក្នុងខែកក្កដា ដែលមានប្រមាណជាង១លាន៧ម៉ឺនភាគហ៊ុនគិតត្រឹមថ្ងៃទី២៤ គឺកើនឡើងជាងកាលពីខែមិថុនា ដែលមានចំនួន ជិត១២ម៉ឺន៥ពាន់ភាគហ៊ុន។ ទន្ទឹមនេះ តម្លៃភាគហ៊ុនរបស់របស់កំពង់ផែស្វយ័តក្រុងព្រះសីហនុនេះ ក៏មានការកើនឡើងប្រមាណ ២,៣៦% ផងដែរ ពោលគឺកើនឡើងពីតម្លៃ៥០៨០រៀលដល់៥២០០រៀលក្នុងមួយភាគហ៊ុន ។ តួលេខនេះបង្ហាញពីការកើនឡើងនៃតម្រូវការដ៏គួរឲ្យកត់សម្គាល់ចំពោះភាគហ៊ុនរបស់កំពង់ផែស្វយ័តក្រុងព្រះសីហនុ ។
ក្នុងរយៈពេលដូចគ្នានេះ បរិមាណបញ្ជាទិញភាគហ៊ុនរបស់កំពង់ផែស្វយ័តភ្នំពេញឯណោះវិញ បានកើនឡើងពីចំនួនជាង៤២ម៉ឺន៤ពាន់ភាគហ៊ុន ដល់ជាង១លាន១ម៉ឺនភាគហ៊ុន តែតម្លៃភាគហ៊ុនវិញ បានធ្លាក់ចុះពី ៥៦០០រៀលមក៥៤០០រៀល ក្នុងមួយភាគហ៊ុន។ ចំណែក ភាគហ៊ុនរបស់រដ្ឋាករទឹកស្វយ័តក្រុងភ្នំពេញវិញ អត្រាកំណើននៃបរិមាណបញ្ជារទិញសរុបមានចំនួន ១៣៩,៥៩% កើនពីជាង៣៤ម៉ឺន៧ពាន់ ភាគហ៊ុន ទៅជាង៨៣ម៉ឺន២ពាន់ភាគហ៊ុនក្នុងមួយថ្ងៃ។ ទន្ទឹមនេះ តម្លៃភាគហ៊ុន ក៏បានធ្លាក់ចុះពីតម្លៃ៣៦៥០រៀល មក៣២៦០រៀលក្នុងមួយភាគហ៊ុន។
គួរបញ្ជាក់ថា រហូតមកដល់ពេលនេះ ផ្សារមូលបត្រកម្ពុជា មានក្រុមហ៊ុនបោះផ្សាយមូលបត្រចំនួន៥ រួមមាន រដ្ឋាករទឹកស្វយ័តក្រុងភ្នំពេញ ,កំពង់ផែស្វយ័តក្រុងព្រះសីហនុ ,ក្រុមហ៊ុនហ្គ្រេនធ្វីន, ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSEZ) និង កំពង់ផែស្វយ័តភ្នំពេញ។
ថ្មីៗនេះ ក៏មានដំណឹងថាមានក្រុមហ៊ុនថ្មីចំនួនពីរផ្សេងទៀត កំពុងស្នើសុំការចុះបញ្ជីបោះប័ណ្ណភាគហ៊ុនពីក្រុមហ៊ុនទីផ្សារមូលប័ត្រកម្ពុជា។ ក្នុងនោះមាន ក្រុមហ៊ុនមួយដែលមានភាគហ៊ុនរបស់ធនាគារអេស៊ីលីដា ភីអិលស៊ី ក៏គ្រោងនឹងបោះផ្សាយភាគហ៊ុនរបស់ខ្លួនក្នុងផ្សារមូលបត្រកម្ពុជាឆាប់ៗនេះផងដែរ ៕
