ភ្នំពេញ ៖ កម្ពុជា ក្រោយបញ្ចប់សង្គ្រាមផ្ទៃក្នុងដ៏រ៉ាំរ៉ៃអំឡុងទសវត្សរ៍ឆ្នាំ១៩៧០ ដល់ឆ្នាំ ១៩៨០ រដ្ឋាភិបាលមួយត្រូវបានបង្កើតឡើងដែលគ្រប់គ្រង និងដឹកនាំប្រទេសដោយ«រណសិរ្យ សាមគ្គីសង្គ្រោះជាតិកម្ពុជា» ដែលបច្ចុប្បន្នជា «គណបក្សប្រជាជនកម្ពុជា» គឺបន្ទាប់ពីបានផ្តួលរំលំ របបមហាសោកនាដកម្ម និងវាលពិឃាតដែលបានបង្កើតឡើង និងគ្រប់គ្រងដោយ ប៉ុល ពត នៅថ្ងៃ ទី៧ ខែមករា ឆ្នាំ១៩៧៩។
គេនៅចាំបានថា ចាប់តាំងពីថ្ងៃរំដោះ ៧មករា ១៩៧៩ មក កម្ពុជាបានកសាងប្រទេស លើ មាគ៌ាដែលពោរពេញដោយគំនរផេះផង់នៃសង្គ្រាមប្រល័យជាតិសាសន៍ឯង។ជាងនេះទៀត កម្ពុជា ត្រូវរែកពន់សព្វបែបយ៉ាងដែលរបបវាលពិឃាត ប៉ុល ពត បានបន្សល់ទុក រាប់ទាំងវិនាសកម្មនៃការ កាប់សម្លាប់ ទាំងបញ្ហាសង្គម និងហេដ្ខារចនាសម្ព័ន្ធជាតិក្នុងកម្រិតសូន្យ ពិសេសគឺ សោកនាដកម្ម ដ៏ធ្ងន់ធ្ងរនៃការព្រាត់ប្រាស់ ប្រពន្ធព្រាត់ប្តី កូនព្រាត់ឪពុកម្តាយ បងប្អូន ហើយត្រូវប្រឹងរស់នៅ ចិញ្ចឹមជីវិតដោយខ្លួនឯង។
មកដល់ទសវត្យរ៍ទី៩០ កម្ពុជាបានចាប់ផ្តើមរៀបចំរដ្ឋាភិបាលមួយដែលកើតចេញពីការ បោះឆ្នោត ដែលកាលនោះ ក៏មានការចូលរួមដោយអន្តរជាតិផងដែរ។
ខាងក្រោមនេះ ជាទិន្នន័យនៃចំនួនអ្នកបានចុះឈ្មោះបោះឆ្នោតនិងអ្នកចេញទៅបោះឆ្នោត ឆ្នាំ១៩៩៣-២០១៨ ៖
– នីតិកាលទី១ឆ្នាំ១៩៩៣ ចំនួនប្រជាពលរដ្ឋចុះឈ្មោះបោះឆ្នោតមានចំនួន៤,៧៦៤,៤៣០នាក់ និងអ្នកបោះឆ្នោតមានចំនួន ៤,២៦៧,១៩២នាក់ ស្មើនឹង ៨៩.៥៦%។
– នីតិកាលទី២ ឆ្នាំ១៩៩៨ អ្នកចុះឈ្មោះបោះឆ្នោតមានចំនួន ៥,៣៩៥,៥៩៥នាក់ និងអ្នកបោះ ឆ្នោតមានចំនួន ៥,០៥៧,៨៣០នាក់ ស្មើនឹង៩៣.៧៤%។
– នីតិកាលទី៣ ឆ្នាំ២០០៣ ចំនួនអ្នកចុះឈ្មោះបោះឆ្នោតមានចំនួន ៦,៣៤១,៨៣៤នាក់ និងអ្នកបោះឆ្នោត មានចំនួន ៥,២៧៧,៤៩៤នាក់ ស្មើនឹង ៨៣.២១%។
– នីតិកាលទី៤ ឆ្នាំ២០០៨ ចំនួនអ្នកចុះឈ្មោះបោះឆ្នោតមានចំនួន ៨,១២៥,៥២៩នាក់ និងអ្នកបោះឆ្នោតមានចំនួន ៦,១១០,៨២៨នាក់ ស្មើនឹង៧៥.២០%។
– នីតិកាលទី៥ ឆ្នាំ២០១៣ ចំនួនអ្នកចុះឈ្មោះបោះឆ្នោតមានចំនួន ៩,៦៧៥,៤៥៣នាក់ និង អ្នកបោះឆ្នោតមានចំនួន៦,៧៣៥,២៤៤នាក់ ស្មើនឹង៦៩.៦១%។
– នីតិកាលទី៦ ឆ្នាំ២០១៨ ចំនួនអ្នកចុះឈ្មោះបោះឆ្នោតមានចំនួន ៨,៣៨០,២១៧នាក់ និងអ្នកបោះឆ្នោតមានចំនួន ៦,៧៥៣,២៤៩នាក់ ស្មើនឹង៨០.៥៩%។
សូមបញ្ជាក់ដែរថា កម្ពុជាបានរៀបចំការបោះឆ្នោតជ្រើសរើសតំណាងរាស្ត្រ នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ នេះ មានគណបក្សនយោបាយចំនួន ២០ចូលរួមប្រកួត ប្រជែង៕