ព្រះសីហនុ៖ «ប្រសិនបើអត់ពីសម្តេច ជា ស៊ីម ទៅ គឺលោកជាប្រធានគណបក្សប្រជាជនកម្ពុជា ហើយលោក សាយ ឈុំ នឹងទទួលតំណែងជាប្រធានព្រឹទ្ឋសភា»។នេះជាប្រសាសន៍របស់លោកនាយករដ្ឋមន្ត្រី ហ៊ុន សែន ថ្លែងកាលពីព្រឹកថ្ងៃទី២៩មេសា នៅខេត្តព្រះសីហនុ។
នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រចម្រាញ់ដូងប្រេងទី២ របស់ក្រុមហ៊ុន ម៉ុង ប្ញទ្ឋី គ្រុប នៅខេត្តព្រះសីហនុ នាព្រឹកថ្ងៃទី២៩ ខែមេសា ឆ្នាំ២០១៥ ស្ថិតនៅក្នុងឃុំជើងគោ ស្រុកព្រៃនប់ ខេត្ដព្រះសីហនុ លោកនាយករដ្ឋមន្ត្រី ហ៊ុន សែន បានថ្លែងបែបនេះទំនងជាចង់ចំអកដល់មជ្ឈដ្ឋានមួយចំនួនដែលបានវិភាគជ្រៀតជ្រែកដល់កិច្ចការផ្ទៃក្នុងរបស់គណបក្សប្រជាជនកម្ពុជា។
បន្ទាប់រំលឹកដល់សុន្ទរកថារបស់លោក ហេង សំរិន និងលោក ជា ស៊ីម ជាច្រើនលើកច្រើនសារ អំពីការគាំទ្របេក្ខភាពលោកជាបេក្ខភាពនាយករដ្ឋមន្ត្រី នៅអាណត្តិទី៥ និងអាណត្តិ បន្តបន្ទាប់រួចមក លោកនាយករដ្ឋមន្ត្រី ហ៊ុន សែន ក៏បានប្រកាសថា គណបក្សប្រជាជនកម្ពុជា នឹងបន្តដឹកនាំប្រទេសទៀតនៅអាណត្តិក្រោយបើឈ្នះឆ្នោត។
លោកថា គណបក្សប្រជាជនកម្ពុជា នឹងបន្តឈ្នះឆ្នោតដដែល ហើយលោកនៅតែបន្តដឹកនាំប្រទេសជាបន្តទៀត ហើយក៏គ្មានការចុះចេញពីដំណែងរបស់លោកហ៊ុន សែន ដែរ ដោយសារបេក្ខភាពជានាយករដ្ឋមន្ត្រីរបស់រូបលោក មានការគាំទ្រដោយបក្ស និងដោយប្រជាពលរដ្ឋ។
ក្នុងឱកាសនោះដែរ លោកនាយករដ្ឋមន្ត្រី ក៏បានព្រមានលុបចោលវប្បធម៌សន្ទនា ដែលបានបង្កើតឡើងដោយមេដឹកនាំនៃគណបក្សប្រ ជាជនកម្ពុជា និងគណបក្សសង្គ្រោះជាតិ រួមគ្នាមួយរយះកន្លងមកនេះ។
ការព្រមានបែបនេះ ធ្វើឡើងបន្ទាប់ពីមានអត្ថាធិប្បាយតាមប្រព័ន្ធផ្សព្វផ្សាយដោយមន្ត្រីជាន់ខ្ពស់គណបក្សសង្គ្រោះជាតិ ទាក់ទងទៅនឹងការថ្លែងជាឧទាហរណ៍របស់លោកស្តីពីវប្បធម៌សន្ទនា និងកុំឲ្យមានការសងសឹក នាឱកាសរូបលោក និងលោក សម រង្ស៊ី នៅប្រទេសឥណ្ឌូណេស៊ី៕
