ខេត្តកំពង់ចាម ៖ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដែលមានរយៈពេល២ថ្ងៃ ចាប់ថ្ងៃទី២០ ដល់ថ្ងៃទី២១ ខែសីហា ឆ្នាំ២០១៨ បានចាប់ផ្តើមដំណើរការហើយនៅព្រឹកនេះ ដោយមានការប្រឡងពីរប្រភេទ គឺសម្រាប់ថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គមដែលមានវត្តមានរបស់ឯកឧត្តម គួច ចំរើន អភិបាលនៃគណអភិបាលខេត្តកំពង់ចាម ចូលរួមបើកវិញ្ញាសារដើម្បីអោយបេក្ខជនប្រឡង ដោយមានការចូលរួមពីមន្ត្រីអ្នកមុខអ្នកការ កងកម្លាំងប្រដាប់អាវុធ និងអង្គភាពនានា ជុំវិញខេត្តចូលរួមផងដែរ។
យោងតាមរបាយការណ៍របស់មន្ទីរអប់រំខេត្ត ការប្រឡងបាក់ឌុប ត្រូវចាប់ពីម៉ោង ៧ និង៣០នាទី ព្រឹកថ្ងៃទី២០ ខែសីហា ឆ្នាំ២០១៨ ដោយមាន ៧មុខវិជ្ជា ទាំងថ្នាក់វិទ្យាសាស្ត្រសង្គម និងថ្នាក់វិទ្យាសាស្ត្រ។
ការប្រឡងបាក់ឌុប ឆ្នាំ២០១៨ នេះ នៅទូទាំងខេត្តកំពង់ចាម មានមណ្ឌលប្រឡងសរុប ១៤មណ្ឌល បេក្ខជនសរុបចំនួន ៨.០០១នាក់។ ជាមួយគ្នានេះ អាជ្ញាធរខេត្តបានដាក់ពង្រាយកម្លាំងចម្រុះ នគរបាល អាវុធហត្ថខេត្ត ដើម្បីរក្សាសន្តិសុខ សុវត្ថិភាព ព្រមទាំងមានក្រុមគ្រូពេទ្យសម្រាប់នៅចាំជួយសង្គ្រោះបេក្ខជន ក្នុងករណីដែលមានជំងឺ ដង្កាត់ផ្សេងៗក្នុងពេលប្រឡងផងដែរ។
សម្រាប់ថ្នាក់វិទ្យាសាស្ត្រសង្គម ថ្ងៃចន្ទ ទី២០ ខែសីហា ឆ្នាំ២០១៨ ពេលព្រឹក ៖
-ម៉ោង០៧:៣០ ដល់ម៉ោង ០៨:៣០ ផែនដី និងបរិស្ថានវិទ្យា (៦០នាទី )។
-ម៉ោង០៩:០០ ដល់ម៉ោង១០:៣០៖ ប្រវតិ្តវិទ្យា (៩០នាទី)។
ពេលរសៀល ៖
– ម៉ោង ១៤:០០ ដល់ម៉ោង ១៥:៣០ ៖ ភូមិវិទ្យា (៩០នាទី)។
– ម៉ោង ១៦:០០ ដល់ម៉ោង ១៧:០០ ៖ ភាសាបរទេស (៦០នាទី)។
ថ្ងៃអង្គារ ទី២១ ខែសីហា ឆ្នាំ២០១៨ ពេលព្រឹក ៖
– ម៉ោង០៧:៣០ ដល់ម៉ោង០៩:០០៖ គណិតវិទ្យា (៩០នាទី)។
– ម៉ោង០៩:៣០ ដល់ម៉ោង១១:០០៖ សីលធម៌ ពលរដ្ឋវិជ្ជា (៩០នាទី)។
ពេលរសៀល ៖
- ម៉ោង១៤:០០ ដល់ម៉ោង១៦:៣០៖ អក្សរសាស្ត្រខ្មែរ (១៥០នាទី)។
ចំណែកថ្នាក់វិទ្យាសាស្ត្រ នៅថ្ងៃចន្ទ ទី២០ ខែសីហា ឆ្នាំ២០១៨
ពេលព្រឹក ៖
– ម៉ោង០៧:៣០ ដល់ម៉ោង០៨:៣០៖ ប្រវត្តិវិទ្យា (៦០នាទី)។
– ម៉ោង០៩:០០ ដល់ម៉ោង១០:៣០៖ ជីវវិទ្យា (៩០នាទី)។
ពេលរសៀល៖
– ម៉ោង ១៤:០០ ដល់ម៉ោង១៥:៣០ ៖ គីមីវិទ្យា (៩០នាទី)។
– ម៉ោង ១៦:០០ ដល់ម៉ោង ១៧:០០ ៖ ភាសាបរទេស (៦០នាទី)។
ថ្ងៃអង្គារ ទី២១ ខែសីហា ឆ្នាំ២០១៨
ពេលព្រឹក ៖
– ម៉ោង០៧:៣០ ដល់ម៉ោង០៩:០០៖ អក្សរសាស្ត្រខ្មែរ (៩០នាទី)។
-ម៉ោង០៩:៣០ ដល់ម៉ោង១១:០០៖ រូបវិទ្យា (៩០នាទី)។
ពេលរសៀល ៖
ម៉ោង១៤:០០ ដល់ម៉ោង១៦:៣០៖ គណិតវិទ្យា (១៥០នាទី)។
គួររំលឹកថា កាលពីថ្ងៃអាទិត្យ ទី១៩ ខែសីហា ឆ្នាំ២០១៨ មន្ទីរអប់រំ យុវជន និងកីឡាខេត្តកំពង់ចាម បានបិទឈ្មោះបេក្ខជនប្រឡង លេខតុ លេខបន្ទប់ នៅតាមមណ្ឌលប្រឡងទាំង ១៤ បានរួចរាល់ក្នុងខេត្តកំពង់ចាម ហើយបេក្ខជនក៏បានពិនិត្យមើលឈ្មោះរបស់ពួកគេរួចរាល់ហើយដែរ ដោយពុំមានការតវ៉ា ស្នើសុំអ្វីមួយកើតឡើងឡើយ រហូតមកដល់ថ្ងៃទី២០ ខែសីហា នេះ៕
នៅឆ្នាំនេះ ជាឆ្នាំទី៥ហើយ ដែលក្រសួងអប់រំ យុវជន និងកីឡា សហការជាមួយអង្គភាពប្រឆាំងអំពើពុករលួយ បន្តរឹតបន្តឹងវិន័យ ដោយមិនឲ្យមានការលួចចម្លង និងការសូកប៉ាន់គ្រូ អនុរក្ស ឬមេប្រយោគ នោះទេ។ ក្នុងនោះ បេក្ខជនក៏មិនអនុញ្ញាតឲ្យយកប្រ៊ីយ៉ុង ទូរស័ព្ទ ឬគ្រឿងអេឡិចត្រូនិចគ្រប់ប្រភេទ ចូលមណ្ឌលប្រឡង និងបន្ទាប់ប្រឡងឡើយ ដោយមានអ្នកសង្កេតការណ៍ប្រឡងសរុបជាង៥.០០០ នាក់ ត្រូវបានដាក់ពង្រាយនៅគ្រប់មណ្ឌលប្រឡងទូទាំងប្រទេសផងដែរ។
ជាមួយគ្នានេះ ក្នុងពេលប្រឡងបាក់ឌុប អាជ្ញាធរខេត្តមួយចំនួន ដូចជា ខេត្តព្រះសីហនុ ខេត្តកោះកុង កំពង់ធំ និងខេត្តកំពង់ស្ពឺ ជាដើម បានប្រកាសពីការរៀបចំកន្លែងស្នាក់នៅ ផ្ទះសំណាក់ និងសណ្ឋាគារសម្រាប់បេក្ខជនប្រឡង ដោយឥតគិតថ្លៃ។
នៅខេត្តកំពង់ចាម និងតាមមណ្ឌលប្រឡងដទៃទៀត ក៏ត្រូវបានមន្ទីរអប់រំ យុវជន និងកីឡាខេត្ត នាព្រឹកថ្ងៃទី១៩ ខែសីហាកន្លងទៅនេះ បានប្រកាសថា អាជ្ញាធរខេត្ត និងនៅតាមមណ្ឌលប្រឡងមួយចំនួន បានរៀបចំថែរក្សា និងមើលការខុសត្រូវនៅកន្លែងផ្ញើកង់ និងម៉ូតូជូនបេក្ខជន ដោយឥតគិតថ្លៃ ក្នុងអំឡុងពេលប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ដែលសម័យប្រឡង ថ្ងៃទី២០-២១ ខែសីហា ឆ្នាំ២០១៨ នេះ៕ ដោយ ៖ ប. សុផល
