រតនគិរី៖ ពីរឆ្នាំចុងក្រោយនេះ ក្រុមហ៊ុន ពេជ្រ ឫទ្ធសី បានសម្រុកកាប់យកឈើប្រណីតៗពីក្នុងដែនជម្រកសត្វព្រៃស្រុកលំផាត់ដឹកចេញយ៉ាងអនាធិបតេយ្យ ប៉ុន្តែចាប់តាំងពីសមត្ថកិច្ចជំនាញ គឹប្រធានដែន ជម្រកសត្វព្រៃលំផាត់ និងស្រុកកូនមុំ រហូតដល់ថ្នាក់ដឹកនាំខេត្ត ត្រូវគេមើលឃើញថាមិនបានចេញបង្ក្រាបនោះឡើយ។ នេះបើយោង តាមការ អះអាងរបស់ប្រជាពលរដ្ឋ និងពីមន្ត្រីក្នុងខេត្តមួយរូប។
មន្ត្រីថ្នាក់អន្ទ្រើសក្នុងខេត្តម្នាក់សុំមិនបញ្ចេញឈ្មោះបានរំលឹកឲ្យដឹងថា កាលពីថ្ងៃទី១០ ខែកុម្ភៈ ឆ្នាំ២០១៣ គេឃើញតំណាងក្រុមហ៊ុនខាងលើ បានចូលទៅដាក់ឧបករណ៍អារឈើ(ម៉ាស៊ីនរ៉ៃ) នៅក្នុងបរិវេណដីរបស់ក្រុមហ៊ុនមួយឈ្មោះ ហង អាញ មានទីតាំងក្នុងស្រុកលំផាត់ដើម្បីអារច្រៀកឈើដែលប្រមូលបានពីក្នុងដីក្រុមហ៊ុនសម្បទាន ប៉ុន្តែក្រោយពីដាក់ម៉ាស៊ីអារឈើនៅទីនោះ គេបានលួចចូលជ្រៅតាមរុករានរកឈើប្រណីតពីក្នុងព្រៃដែនជម្រកស្រុកកូនមុំ និងស្រុកលំផាត់ត្រង់ចំណុចអូររ៉ៃ អូរស្ទឹងរាំង អូរយោង អូរល្ហា អូរកកោះ ស្ថិតក្នុងភូមិសិរីមង្គល ឃុំសិរីមង្គល ដែលស្ថិតនៅទឹកដីព្រៃអភិរក្សបរិស្ថានស្រុកកូនមុំ និងស្រុកលំផាត់ យ៉ាងអនាធិបតេយ្យ គ្មានការទប់ស្កាត់ ឡើយ។ ករណីមិនអើពើបង្រ្កាបបទល្មើសព្រៃឈើខាងលើនេះ ត្រូវប្រជាពល រដ្ឋចោទប្រកាន់ថា ថ្នាក់ដឹកនាំខេត្តក៏ដូចជា ប្រធានដែនជម្រកសត្វព្រៃលំផាត់ និងកូនមុំ រួមនិងមន្ត្រីមួយចំនួនទៀតបានស៊ុមគ្រលុំគ្នាទទួលសំណូក ហើយធ្វើ មិនដឹងមិនឮករណីបំផ្លាញព្រៃឈើក្នុងដែនអភិរក្សដែលទទួលស្គាល់ដោយ ព្រះរាជក្រិត្យ។
មន្ត្រីដដែលបន្តថា ឈើដែលប្រមូលដឹកជញ្ជូនពីចំណុចខាងលើចូលទៅក្រុមហ៊ុន ពេជ្រ ឫទ្ធសី នោះ សុទ្ធតែជាឈើប្រណីតៗដូចជា ធ្នង់ សុក្រំ ត្រាច នាងនួន ស្រឡៅ កកោះ ថ្បែង និងឈើល្អៗមួយចំនួនទៀត មានមុខកាត់ចាប់ពី៥តឹក រហូតដល់ជាង១ម៉ែត្រឯណោះ ។ក្រោយពីកាប់រួចគេបានដឹកជញ្ជូនតាមឡានរ៉េវ ឬក៏ឡានច្នៃ(គោយន្តកែច្នៃ)ប្រភេទធំៗ នៅពេលយប់យកទៅលាក់ទុកចំណុចមាត់អូររ៉ៃ ក្នុងទឹកដីក្រុមហ៊ុន«ដូងប្រេងភ្នំពេញ ហង អាញ យ៉ាឡាយ» និងមួយចំនួនទៀតដាក់រាយតាមមាត់ព្រៃក្នុងទឹកដីរបស់ក្រុមហ៊ុនដូងប្រេង ស្រុកកូនមុំ រង់ចាំបញ្ជាឲ្យដឹកចូលទៅក្នុងក្រុមហ៊ុន ពេជ្រ ឬទ្ធសី ។
ប្រភពដដែលបន្តថា ឈើល្មើសច្បាប់ទាំងនោះ គេឃុបឃិតគ្នាលួចកាប់ក្នុងតំបន់ហាមឃាត់រួចដឹកចូលដាក់បន្លំជាមួយឈើដែលមានច្បាប់ដើម្បីអារលក់ធ្វើអាជីវកម្ម ហើយមន្ត្រីដែលមានសមត្ថកិច្ចបង្ក្រាបបទល្មើសព្រៃឈើមិនដែលចុះទៅត្រួតពិនិត្យដើម្បីកំណត់ទោសទណ្ឌ ឬចាប់ឲ្យបង់ពន្ធនោះទេ គឺគេសំងំចែកលុយគ្នាតាមតួនាទី ហើយធ្វើរបាយការណ៍ភូតទៅថ្នាក់លើ។
ប្រភពព័ត៌មានមួយផ្សេងទៀតបានប្រាប់ឲ្យដឹងថា ក្រុមហ៊ុន ពេជ្រ ឬទ្ធសី និងក្រុមហ៊ុន ដូងប្រេងភ្នំពេញ ហង អាញ យ៉ាឡាយ ត្រូវគេរិះគន់ថាបានឃុបឃិតគ្នាជាមួយមន្ត្រីដែនអភិរក្សនិងមន្ត្រីបរិស្ថានដែលប្រចាំទិសនៅទីនោះទើបអាចចូលកាប់យកឈើប្រណីតចេញពីតំបន់ហាមឃាត់នោះបានដោយងាយៗបែបនេះ ចំណែកលោកអភិបាល អភិបាលរងខេត្តក៏ត្រូវប្រជាពលរដ្ឋរិះគន់យ៉ាងចាស់ដៃដែរ ដោយសារលោកមិនអើពើចំពោះបទល្មើសព្រៃឈើដែលបង្កឡើងដោយក្រុមហ៊ុនខាងលើ ។
មន្ត្រីប្រដាប់អាវុធមួយរូបបញ្ជាក់ថា បច្ចុប្បន្ននេះ ក្រុមហ៊ុន ពេជ្រ ឫទ្ធសី មានមនុស្សមួយក្រុមដូចជាឈ្មោះ ចែពៅ ឈរជើងចាំប្រមូលយកឈើដែលកាប់បានពីក្នុងតំបន់អូរស្ទឹៀង។ ចំណែកឈ្មោះតា ឈីន ; តាជា និងឈ្មោះ អៀត ហៅតាថ្នាំខ្លាំង គឺជាឈ្មួញជើងខ្លាំងខាងកាប់បំផ្លាញឈើដឹកចេញពីព្រៃដែនជម្រកសត្វព្រៃស្រុកលំផាត់ ស្រុកកូនមុំ បញ្ជូនទៅឲ្យមេការក្រុមហ៊ុនឧកញ៉ាសី មានឈ្មោះ ញ៉ាញ់ និងឈ្មោះណាក់ ដែលទទួលភារកិច្ចមើលឈើនាំចូល នាំចេញអោយក្រុមហ៊ុន ពេជ្រ ឫទ្ធសី ក្រោមលេសក្រុមហ៊ុនកែច្នៃឈើស្របច្បាប់រួចឃុបឃិតគ្នាដឹកជញ្ជូនចេញទៅលក់នៅប្រទេសវៀតណាមដោយចំហ។
មេគង្គប៉ុស្តិ៍ មិនអាចសុំការបំភ្លឺពីលោក អ៊ូ សុធី ប្រធានដែនជម្រកស្រុកលំផាត់បានទេកាលពីរសៀលម្សិលមិញនេះ ដោយទូរស័ព្ទរបស់លោកមិនអាចទាក់ទងបាន ចំណែកលោកឧកញ៉ាសី នាយកក្រុមហ៊ុន ពេជ្រ ឫទ្ធសី ក៏មិនអាចសុំការបំភ្លឺបានដែរ ដោយសារទូរស័ព្ទហៅចូលបានហើយតែមិនមានអ្នកទទួល។
ទោះជាយ៉ាងណាក៏ដោយប្រជាពលរដ្ឋចំនួន១៧គ្រួសារភូមិស្រែឈូក ឃុំជ័យឧត្តម ស្រុកលំផាត់ ខេត្តរតនគិរី បានបង្ហាញពីការអស់សង្ឃឹមលើលោកអភិបាលខេត្ត ដោយសារការបាត់បង់ដើមឈើយកជ័រទឹកចំនួន២៩៣ដើមដែលស្ថិតនៅព្រៃដែនជម្រកស្រុកលំផាត់ដែលពួកគាត់ធ្លាប់បានអាស្រ័យផលជារៀងរាល់ថ្ងៃសម្រាប់ដោះដូរចិញ្ចឹមជីវភាពគ្រួសារត្រូវបាត់បង់ដោយការកាប់បំផ្លាញពីសំណាក់ក្រុមហ៊ុនខាងលើ។
គួរបញ្ជាក់ថា មន្ត្រីបរិស្ថានដ៏មានអំណាចម្នាក់ដែលប្រចាំទិសនៅតំបន់នោះឈ្មោះ អ៊ូ សុធា គឺជាកូនលោក អ៊ូ សុធី ប្រធានដែនជម្រកលំផាត់ និងឈ្មោះសុវណ្ណ សុង ក៏ជាមន្ត្រីដែលសំបូរគេរិះគន់ច្រើនណាស់ដែរ ពាក់ព័ន្ធនឹងការគ្រប់គ្រងបរិស្ថាននៅស្រុកកូនមុំ។
ប្រជាពលរដ្ឋបានរាយការណ៍ថា បច្ចុប្បន្នក្រុមហ៊ុនទាំងពីនេះ រួមនិងមន្ត្រីដែលមានសមត្ថកិច្ចសំខាន់ៗក្នុងខេត្ត បាន និងកំពុងឃុបឃិតគ្នាបង្កឲ្យមានការកាប់បំផ្លាញព្រៃឈើក្នុងតំបន់ហាមឃាត់ជាបន្តបន្ទាប់យ៉ាងគគ្រឹកគគ្រេងគ្មានការហាមឃាត់ទេ ចំណែកពួកគាត់ជាពលរដ្ឋតូចតាចបានត្រឹមត្អូញត្អែរប៉ុណ្ណោះ៕ស រ
