ភ្នំពេញ៖ក្រុមហ៊ុននាំពលករទៅធ្វើការនៅក្រៅប្រទេសចំនួនពីរ កាលពីព្រឹកថ្ងៃទី០៧ ខែឧសភា ឆ្នាំ២០១៥ កន្លងមកនេះ ត្រូវសមាគមការពារសិទ្ធិមនុស្សអាដហុក ស្នើទៅរាជរដ្ឋាភិបាល និងស្ថាប័នដែលពាក់ព័ន្ធស្វែងរកចាប់អ្នកទទួលខុសត្រូវពាក់ព័ន្ធការឆបោកប្រាក់។
លោក ធន សារាយ បានថ្លែងក្នុងសេចក្ដីប្រកាសព័ត៌មានមួយថា រដ្ឋាភិបាលត្រូវតែស្វែងរកចាប់ខ្លួនអ្នកទាំងឡាយណាដែលបានឆបោក ប្រជាពលរដ្ឋទាំងនេះ ហើយដកប្រាក់ដែលតម្កល់ទុកនៅធនាគារជាតិ យកមកទូទាត់ឲ្យជនរងគ្រោះ។
សេចក្ដីប្រកាសព័ត៌មានរបស់សមាគមអាដហុក បានឲ្យដឹងថាជាក់ស្ដែងនៅក្នុងខែមេសា ឆ្នាំ២០១៥ សមាគមអាដហុកបានទទួលពាក្យបណ្ដឹងពីជនរងគ្រោះចំនួន២០១នាក់ មកពីគ្រប់បណ្ដាខេត្ត ដែលក្រុមហ៊ុនជ្រើសរើសពលករឈ្មោះ Rice Natural និង Century នាំពលករទៅធ្វើការផ្នែកកសិកម្ម ឧស្សាហកម្ម និងសំណង់ នៅប្រទេសជប៉ុន ដោយត្រូវតម្រូវឲ្យពួកគាត់បង់ប្រាក់ជាមុនចំនួន ៤០០ដុល្លារអាមេរិកក្នុងម្នាក់។
ដោយយោងទៅលើការស៊ើបអង្កេតរបស់មន្ត្រីសមាគមអាដហុក លោក ធន សារាយ ថ្លែងបន្ថែមថា ក្រុមហ៊ុនទាំងពីរបានសន្យានាំពលរដ្ឋទាំងនោះទៅបម្រើការងារក្នុង វិស័យកសិកម្ម ឧស្សាកម្ម និងសំណង់នៅក្នុងប្រទេសជប៉ុននៅក្នុងរយៈពេលមិនលើសពី ៦ខែ ប៉ុន្តែក្រុមហ៊ុនទាំងពីរពុំបានអនុវត្តតាមកិច្ចសន្យានោះឡើយ និងបានទម្លាក់ស្លាកក្រុមហ៊ុនថែមទៀតផង។
សមាគមអាដហុក បានស្នើក្រសួងការងារ និង បណ្ដុះបណ្ដាលវិជ្ជាជីវៈ ធ្វើការត្រួតពិនិត្យឲ្យបានទៀងទាត់ លើសកម្មភាពរបស់ក្រុមហ៊ុន និងមជ្ឈមណ្ឌលផ្សេងៗឲ្យបានហ្មត់ចត់ និងត្រូវពិនិត្យពីការផ្សព្វផ្សាយព័ត៌មានជ្រើសរើសពលករ ដើម្បីជៀសវាងការបោកបញ្ឆោតពលរដ្ឋទៅថ្ងៃក្រោយទៀត។ ជាមួយគ្នានោះសមាគមអាដហុក បានស្នើឲ្យក្រសួងត្រូវមានវិធានការ ឬដកអាជ្ញាប័ណ្ណជាបន្ទាន់នូវក្រុមហ៊ុនណាដែលប្រព្រឹត្តផ្ទុយពី អនុក្រឹត្យ។
ផ្អែកតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា ទីភ្នាក់ងារនាំពលករទៅក្រៅប្រទេសជាង ៦០ បានចុះបញ្ជីនៅក្រសួងនេះ ហើយក្រុមហ៊ុននីមួយៗ បានតម្កល់ប្រាក់ប្រហែល ១០ម៉ឺនដុល្លារនៅធនាគារជាតិកម្ពុជា៕
ពលករខ្មែរដែលចេញទៅធ្វើការនៅប្រទេសថៃនាពេលកន្លងមក។
