ភ្នំពេញ៖ សាលាដំបូងរាជធានីភ្នំពេញ នៅថ្ងៃទី២០ ខែឧសភាខាងមុខនេះ គ្រោងបើកសវនាការជំនុំជម្រះក្តីលើសំណុំរឿងកាន់កាប់ និងរក្សាទុកអាវុធដោយខុសច្បាប់របស់ជនត្រូវចោទ ថោង ចំរើន និងប្រពន្ធឈ្មោះ កែវ សារី ដែលជាឪពុកម្តាយ ឧកញ៉ា ថោង សារ៉ាត់ ។
មេធាវីការពារក្តីឲ្យជនត្រូវចោទនៅតែមានជំនឿថា អង្គសវនាការដែលនឹងប្រព្រឹត្តទៅ នៅថ្ងៃទី២០ឧសភាខាងមុខ ប្រធានក្រុមប្រឹក្សាអង្គជំនុំជម្រះពិតជានឹងផ្តល់យុត្តិធម៌ដល់ កូនក្តីរបស់លោក ហើយនឹងដោះលែងពួកគាត់ទាំង២នាក់ប្តីប្រពន្ធឲ្យមានសេរីភាពវិញ។
សូមបញ្ជាក់ថា ជនត្រូវចោទឈ្មោះ ថោង ចំរើន និងអ្នកស្រី កែវ សារី ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន។
មេធាវីការពារក្តីឲ្យជនត្រូវចោទបន្តថា កូនក្តីរបស់លោក គឺលោក ថោង ចំរើន និងអ្នកស្រី កែវ សារី បានបដិសេធថា អាវុធប្រមាណជិត១០ដើមដែលមានការចោទប្រកាន់នោះជាកម្មសិទ្ធិ ស្របច្បាប់របស់កូន (ឧកញ៉ាថោង សារ៉ាត់) ដែលគេជាមន្ត្រីជាន់ខ្ពស់នៃកងយោធពលខេមរភូមិន្ទ មានឋានន្តរស័ក្តិផ្កាយ២ (ឧត្តមសេនីយ៍ទោ)។ ដូច្នេះរូបគាត់ ថោង ចំរើន និង កែវ សារី មិនជាប់ពាក់ព័ន្ធនឹងអាវុធនោះទេ។
ប្រភពព័ត៌មានដាច់ដោយឡែកមួយទៀតពីមេធាវីការពារក្តីឲ្យអ្នកស្រី តាំង គឹមឆេង ភរិយាសពលោកឧកញ៉ា អ៊ឹង ម៉េងជឺ ជនរងគ្រោះក្នុងអំពើឃាតកម្មយ៉ាងឃោរឃៅ បានប្រាប់ឲ្យដឹងដែរថា កាលពីសប្តាហ៍មុននេះអ្នកស្រី តាំង គឹមឆេង បានដាក់ពាក្យសុំចេញដីការក្សាការពារ ហាមឃាត់ទ្រព្យសម្បត្តិ និងផ្ទះសម្បែងជាកម្មសិទ្ធិស្របច្បាប់ទាំងប៉ុន្មានរបស់ឧកញ៉ាថោង សារ៉ាត់ ដែលកំពុងជាប់ឃុំនៅពន្ធនាគារ ដើម្បីទុកទូទាត់សំណងរដ្ឋប្បវេណីលើជនរងគ្រោះ ទោះបីរឿងក្តីនេះរកស-ខ្មៅមិនទាន់ដល់ការប្រកាសសាលក្រមក៏ដោយ។
ប្រភពព័ត៌មានបន្តថា បណ្តឹងរបស់ភាគីជនរងគ្រោះសុំចេញដីការក្សាការពារដាក់ចូល សាលាដំបូងរាជធានីភ្នំពេញ បានដល់ដៃលោកស្រី ពេជ្រ ម៉ារ៉ែន ចៅក្រមស៊ើបសួរហើយហើយទំនងមិនយូរទេ លោកស្រីចៅក្រមនឹងចេញដីការក្សាការពារនោះទៅឲ្យសមត្ថកិច្ចពាក់ព័ន្ធ អនុវត្ត៕
