ភ្នំពេញ ៖ រដ្ឋាករស្វយ័តដឹកជញ្ជូនសាធារណៈរថយន្តក្រុង បានធ្វើការកែសម្រួលខ្សែរត់ចាស់ និងបន្ថែមខ្សែរត់ថ្មីរបស់រថយន្តក្រុង ដោយគ្រោងនឹងដាក់ឱ្យដំណើរការចាប់ពីថ្ងៃទី១ ខែតុលា ឆ្នាំ២០១៨ ខាងមុខនេះតទៅ។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២៨ កញ្ញា ២០១៨នេះ។
អាជ្ញាធររាជធានីបញ្ជាក់ថា ការកែសម្រួល និងបន្ថែមខ្សែរត់ថ្មីរបស់រថយន្តក្រុងនេះ គឺដើម្បីពង្រីកវិសាលភាពនៃការបម្រើសេវាដឹកជញ្ជូនសាធារណៈរថយន្តក្រុង ជូនប្រជាពលរដ្ឋ ស្របពេលដែលរថយន្តក្រុងដែលជាជំនួយរបស់រដ្ឋាភិបាលជប៉ុន នឹងមកដល់គ្រប់ចំនួន ៨០គ្រឿង នៅចុងឆ្នាំ ២០១៨ ខាងមុខនេះ។
សូមជម្រាបថា ខ្សែរត់រថយន្តក្រុងចាស់ដែលត្រូវកែសម្រួល មានចំនួន ៧ខ្សែ ឯបណ្តាញខ្សែរត់ដែលត្រូវបន្ថែមថ្មីមានចំនួន ៤ខ្សែ ហើយនឹងត្រូវដាក់ឲ្យអនុវត្តន៍នៅថ្ងៃទី១ ខែតុលា ឆ្នាំ ២០១៨ ខាងមុខនេះ៕
