ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអះអាងថា នៅឆ្នាំ ២០១៩ ខាងមុខ កម្ពុជានឹងរៀបចំបើកស្ថានឯកអគ្គរាជទូតកម្ពុជានៅប៊ុលហ្ការី ជាថ្មីឡើងវិញ បន្ទាប់ ពីបាន បិទមួយរយៈ ដោយសារស្ថានភាពនយោបាយរបស់ប្រទេស ប៊ុលហ្ការី។ សម្តេចតេជោ បានថ្លែង យ៉ាងដូច្នេះ នៅក្នុងជំនួបពិភាក្សាការងារទ្វេភាគីជាមួយនាយករដ្ឋមន្ត្រីប៊ុកហ្គារី លោក ប៊ួយកូ បូរីសូវ (Boyko Borissov) នៅបូរីញូវយ៉ក ខណៈសម្តេចអញ្ជើញចូលរួមមហាសន្និបាត អ.ស.ប. លើកទី ៧៣។
សម្តេចតេជោនាយករដ្ឋមន្ត្រី បានវាយតម្លៃខ្ពស់ចំពោះតួនាទីរបស់ប្រទេសប៊ុលហ្ការី កាលពី អតីតកាលដែលបានដើរតួនាទី ក្នុងការជួយដល់ប្រទេសកម្ពុជា នៅពេលដែលកម្ពុជា បានរំដោះ ចេញពីរបបប្រល័យពូជសាសន៍ ប៉ុល ពត និងបន្តវត្តមានចូលរួមចំណែកថែរក្សាសន្តិភាពនៅកម្ពុជា ក្រោយកិច្ចព្រមព្រៀងទីក្រុងប៉ារីស ផងដែរ។ ក្នុងជំនួបពិភាក្សាគ្នានោះដែរ ប្រមុខរដ្ឋាភិបាលនៃ ប្រទេសទាំងពីរបានឯកភាពគ្នា ក្នុងការបន្តពង្រឹងពង្រីកទំនាក់ទំនង កិច្ចសហប្រតិបត្តិការ នៃ ប្រទេសទាំងពីរ ឲ្យកាន់តែរឹងមាំទ្វេឡើងថែមទៀត ទាំងក្នុងវិស័យសេដ្ឋកិច្ច វិនិយោគ ពាណិជ្ជកម្ម និងទេសចរណ៍។
លោកនាយករដ្ឋមន្ត្រី បានស្វាគមន៍ចំពោះគំនិតផ្តួចផ្តើម របស់សម្តេច ក្នុងការបើកស្ថាន ឯកអគ្គ រាជទូតរបស់ខ្លួននៅប្រទេសប៊ុលហ្ការី ដែលនោះគឺជាឱកាសដែលសម្តេច និងអញ្ជើញទៅ បំពេញ ទស្សនកិច្ចផ្លូវការនៅប៊ុលហ្ការី។ ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្ត្រី មាន ប្រសាសន៍ជំរាបជូន សមភាគីប៊ុលហ្ការី ពីគោលបំណងនៃការធ្វើជាម្ចាស់ផ្ទះរៀបចំ កិច្ចប្រជុំ កំពូល អាស៊ី អឺរ៉ុប ក្នុងប្រទេសកម្ពុជានាឆ្នាំ២០២០ ដែលក្នុងនោះបណ្តាប្រទេស អាស៊ាន បានឯក ភាព រួចហើយ រួមទាំងប្រទេសនៅអឺរ៉ុបមួយចំនួនផងដែរ។
លោកនាយករដ្ឋមន្ត្រីប៊ុលហ្ការីបានឯកភាពចំពោះសំណើបស់សម្តេចតេជោ និងបាន ចាត់ ទុកថា វាគឺជាឱកាស ឲ្យរូបឯកឧត្តមបានអញ្ជើញទៅបំពេញទស្សនកិច្ចផ្លូវការនៅកម្ពុជា៕
