ភ្នំពេញ ៖ ខណៈនេះ នាយករដ្ឋមន្ត្រីកម្ពុជា កំពុងស្ថិតនៅប្រទេសជប៉ុនដើម្បីចូលរួមក្នុងកិច្ចប្រជុំកំពូលមេដឹកនាំប្រទេសមេគង្គ-ជប៉ុនលើកទី១០ នៅទីក្រុងតូក្យូ ប្រទេសជប៉ុន។ កិច្ចប្រជុំនេះ ដឹកនាំដោយលោក ស៊ិន ហ្ស៊ូអាបេ ដែលជាម្ចាស់ផ្ទះនៃកិច្ចប្រជុំ និងអញ្ជើញចូលរួមដោយសម្តេចតេជោ ហ៊ុន សែន, លោកបណ្ឌិត ថងលួន ស៊ីស៊ូលីត នាយករដ្ឋមន្ត្រីឡាវ, លោកស្រី អ៊ុង សានស៊ូជី ទីប្រឹក្សារដ្ឋ និងជារដ្ឋមន្ត្រីក្រសួងការបរទេស នៃសហភាពមីយ៉ាន់ម៉ា, លោក ប្រាយុទ្ធ ចាន់អូចា នាយករដ្ឋមន្ត្រីនៃថៃ លោក ង្វៀន សួនហ្វ៊ុក នាយករដ្ឋមន្ត្រីវៀតណាម។
យុទ្ធសាស្ត្រកិច្ចសហប្រតិបត្តិការថ្មីមេគង្គ-ជប៉ុន ឬ យុទ្ធសាស្ត្រទីក្រុងតូក្យូថ្មី ដែលផ្តោតលើសសរស្តម្ភធំបី៖ ការផ្សាភ្ជាប់, ប្រជាជាជន និងបរិស្ថាន នឹងត្រូវអនុម័តដោយប្រមុខរដ្ឋាភិបាលប្រទេសមេគង្គ និងជប៉ុននាកិច្ចប្រជុំកំពូលមេគង្គ-ជប៉ុនលើកទី ១០ នេះ។
កិច្ចប្រជុំកំពូលមេគង្គ-ជប៉ុន លើកទី១០ បានប្រារព្ធបើកជាផ្លូវការចាប់ផ្តើមពីព្រឹកថ្ងៃទី ៩ ខែ តុលា ម្សិលមិញ នេះ នៅទីក្រុងតូក្យូប្រទេសជប៉ុន។ មេដឹកនាំមេគង្គ កម្ពុជា, វៀតណាម, ឡាវ, ថៃ និងមីយ៉ាន់ម៉ា បូកជាមួយជប៉ុន និងជួបគ្នារយៈពេលពីថ្ងៃដើម្បីពិភាក្សាទៅលើយុទ្ធសាស្ត្រកិច្ចសហប្រតិបត្តិការថ្មីមេគង្គ-ជប៉ុន ដែលផ្តោតលើសសរស្តម្ភធំបី៖ការផ្សាភ្ជាប់,ប្រជាជាជននិង បរិស្ថាន ដែលនឹងត្រូវអនុម័តដោយប្រមុខរដ្ឋាភិបាលប្រទេសមេគង្គនិងជប៉ុននាកិច្ចប្រជុំកំពូលមេគង្គ-ជប៉ុនលើកទី១០។នេះបើយោងតាមប្រសាសន៍របស់លោកនាយករដ្ឋមន្ត្រីហ្ស៊ីនសូ អាបេ នៅ ក្នុងពិធី ជប់លៀងជូនមេដឹកនាំបណ្តាប្រទេសមេគង្គកាលពីរល្ងាចថ្ងៃទី ៨ ខែតុលានៅទីក្រុងតូក្យូ ។
សូមរំលឹកថា នៅថ្ងៃទី៧ ខែតុលា ខណៈសម្តេចតេជោ និងគណៈប្រតិភូជាន់ខ្ពស់កម្ពុជា បានទៅទស្សនាគម្រោងអភិវឌ្ឍន៍តំបន់ មីណាតូ មីរ៉ាយ (Minato Mirai)ពីលើ Landmark Tower កំពស់២០០ម៉ែត្រ នៃសណ្ឋាគារឡែនម៉ាក ក្នុងទីក្រុងយូកូហាម៉ា ប្រទេសជប៉ុន សម្តេចបានលើកសរសើរពីទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសជប៉ុន និងកម្ពុជាផងដែរ។
គួរបញ្ជាក់ថា តំបន់មេគង្គដែលមានប្រទេសសមាជិកប្រាំមានដូចជាកម្ពុជា វៀតណាម ឡាវ ថៃនិងមីយ៉ាន់ម៉ា ត្រូវបានគេចាត់ទុកថាជាតំបន់ដែលមាការលូត លាស់រហ័សបំផុតមួយក្នុងតំបន់អាស៊ី ។ តំបន់នេះក៏មានប្រជាជនប្រមាណ ៣៥៦ លាននាក់ហើយបើតាមមូលនិធិរូបិយវត្ថុអន្តរជាតិ (IMF) ផលិតផលក្នុងស្រុកសរុបនៃតំបន់នេះមានទំហំ ៧៥៧ ពាន់លានដុល្លារគិតត្រឹមឆ្នាំ ២០១៧៕ ដោយ ៖ ភិរ៉ាន
