ខេត្តរតនគីរី៖ ឯកឧត្ដ លី ធុជ ទេសរដ្ឋ មន្ត្រី ប្រធានក្រុមការងារចុះជួយខេត្តរតនគីរី បានកោះអញ្ជើញគណៈកម្មាធិការថ្នាក់ខេត្តមកជួបប្រជុំពិភាក្សា ផ្ដោតទៅលើបញ្ហា ភាគីវិនិយោគផ្សារក្រុងបានលុង និងភាគីអាជ្ញាធរក្រុងបានលុងនិងខេត្ត។
កិច្ចពិភាក្សានេះធ្វើឡើងនៅសាលប្រជុំសាលាខេត្តរតនគីរី នាព្រឹកថ្ងៃទី១៧ ខែឧសភា ឆ្នាំ២០១៥ បន្ទាប់ពីកើតមានវិវាទរវាងអាជីវករ និងក្រុមហ៊ុនវិនិយោគផ្សារ និងអាជ្ញាធរក្រុង ស្ដីពីការស្ថាបនាអភិវឌ្ឍន៍ផ្លូវជុំវិញផ្សារក្រុងបានលុង និងការរៀបចំផ្សារជូនបងប្អូនជនជាតិភាគតិចបន្តធ្វើអាជីវកម្ម។
ឯកឧត្ដម លី ធុជ ទេសរដ្ឋមន្ត្រី អនុប្រធានគ្រប់គ្រងគ្រោះមហន្តរាយ និងជាប្រធានក្រុមការងារថ្នាក់ជាតិ ចុះជួយខេត្តរតនគីរី បានអោយអ្នកយកព័ត៌មាន មេគង្គប៉ុស្តិ៍ ដឹងតាមទូរស័ព្វកាលពីរសៀលថ្ងៃនេះថា កិច្ចប្រជុំវិភាក្សារនេះ ផ្ដោតទៅលើការស្ថាបនាអភិវឌ្ឍន៍ផ្លូវជុំវិញផ្សារ និងសាងសង់ផ្សារជូនបងប្អូនជនជាតិ ដើម្បីធានាផ្លូវអោយរថយន្តអគ្គីភ័យអាចចេញចូលបាន និងងាយស្រួលដល់រថយន្តដឹកសំរាម ចូលប្រមូលដឹកសំរាមធានាអនាម័យ បរិស្ថាន។ ឯកឧត្ដមបានបន្តថា ពាក់ព័ន្ធទៅនឹងពាក្យបណ្ដឹងដែលមានស្នាមមេដៃចំនួន២១១ នោះបើតាមភ្នាក់់ងារស៊ើបអង្កេតជំហានដំបូងថា អាជីវករពុំបានផ្ដិតមេដៃ សុំផ្លាស់ប្ដូរអភិបាលក្រុងទេ កាលដែលពួកគាត់ផ្ដិតមេដៃនោះ គឺស្នើសុំអោយរក្សារទុកបរិវេណជុំវិញផ្សារកំអោយមានការជួលលក់ទៅអោយអ្នកមានលុយសង់ផ្ទះល្វែងតែប៉ុណ្ណោះ។ ឯកឧត្ដមថា ចំពោះអ្នកដែលយកស្នាមមេដៃទៅក្លែងបន្លំឯកសារ ជាការខុសច្បាប់ ជាការញុះញង់ បច្ចុប្បន្នយើងកំពង់ស្រាវជ្រាវរកអ្នកនៅពីក្រោយខ្នង យកមកផ្ដន់ទាទោសតាមច្បាប់។
មានការងឿងឆ្ងល់គ្រប់ៗគ្នា ព្រោះពេលបើកកិច្ចប្រជុំ ឯកឧត្ដម លី ធុជ បានអញ្ជើញក្រុមអ្នកយកព័ត៌មានឲ្យចូលយកព័ត៌មានដែរ ប៉ុន្តែឯកឧត្ដម ថង សាវុន អភិបាលខេត្ត បែរជាបញ្ជាឲ្យអ្នកយកព័ត៌មានចេញពីបន្ទប់ប្រជុំមិនអនុញ្ញាតឲ្យចូលរួមស្ដាប់កិច្ចប្រជុំនេះទេ។
រហូតដល់ម៉ោង៥.៣០នាទីល្ងាចថ្ងៃដដែល ទើបសាលាខេត្តចេញសេចក្ដីប្រកាសមួយ ជូនជាដំណឹងជាសាធារណៈថា យោងតាមកិច្ចប្រជុំកាលពីព្រឹកថ្ងៃទី១៧ ខែឧសភា ឆ្នាំ២០១៥ នៅសាលាខេត្តរតនគីរី លទ្ធផលមានដូចតទៅ សាលាខេត្តបង្កើតក្រុមការងារចុះត្រួតពិនិត្យការអនុវត្តកិច្ចសន្យាសៀវភៅបន្ទុក របស់ក្រុមហ៊ុន ហេងដារ៉ា វិនិយោគផ្សារក្រុងបានលុងរបស់ឧកញ៉ា សាលាង។ រដ្ឋបាលខេត្តរតនគីរី នៅតែអនុវត្តបន្តការអភិវឌ្ឍ លើដីសាធារណៈរបស់រដ្ឋ ក្នុងគោលបំណងរក្សាបានសោភ័ណ្ឌភាព សុវត្ថិភាព សណ្ដាប់ធ្នាប់ ធានាបានបរិស្ថាន និងអនាម័យ។ បដិសេធរាល់ព័ត៌មានកន្លងមកមានជនខិលខូច មួយចំនួនបានបំផុសព័ត៌មានថា មានការសាងសង់តូប ស្តង់លក់ និងផ្ទះល្វែងនៅបរិវេណជុំវិញផ្សារក្រុងបានលុង ជាទង្វើញុះញង់ បង្កអោយមានភាពចលាចល ធ្វើអោយខូចសណ្ដាប់ធ្នាប់សង្គម រដ្ឋបាលសាលាខេត្តនិងមានវិធានការទៅតាមផ្លូវច្បាប់។ គោលដៅចំបងរបស់សាលាខេត្ត គឺអភិវឌ្ឍន៍ផ្សារអោយមានលក្ខណៈល្អប្រសើជាងមុន រក្សារបានទាំងវប្បធ៌ម ប្រពៃណីរបស់បងប្អូនជនជាតិដើមភាគតិច និងធានាបាននូវ សោភ័ណ្ឌភាព សណ្ដាប់ធ្នាប់ និង របៀបរៀបរយ៕ ដោយ ឡុង សារ៉េត
