ភ្នំពេញ ៖ ទណ្ឌិតចំនួន៥៣ ២នាក់ ត្រូវបានក្រសួងយុត្តិធម៌ស្នើសុំមកគណៈកម្មាធិការថ្នាក់ជាតិ ត្រួតពិនិត្យបន្ធូរបន្ថយ និងលើកលែងទោសដើម្បី ពិនិត្យសុំបន្ធូរបន្ថយ និងលើកលែងទោសនៅក្នុងអំឡុងបុណ្យអុំទូកឆ្នាំនេះ។
លោក សុច សុផាន់ណារ៉ា មន្ត្រីជាន់ខ្ពស់ក្រសួងយុត្តិធម៌ បានឲ្យដឹងនារសៀលថ្ងៃទី៣១ ខែតុលា នេះថា ឆ្នាំនេះជាឆ្នាំមួយ ដែលប្រសើរណាស់ ដែលប្រមុខរាជរដ្ឋាភិបាលកម្ពុជា បានស្នើឲ្យក្រសួងយុត្តិធម៌ ពិនិត្យទៅលើពិធីបុណ្យជាតិបីបន្ថែមទៀត ដើម្បីស្នើសុំលើកលែង និងបន្ធូរបន្ថយទោសដល់ទណ្ឌិត។ លោកបន្ថែមថា ជាធម្មតាការលើកលែង និងបន្ធូរបន្ថយទោសដល់ទណ្ឌិត មានតែនៅក្នុងពិធីបុណ្យធំៗចំនួន៣តែប៉ុណ្ណោះ ក្នុងមានបុណ្យ ចូលឆ្នាំ បុណ្យវិសាខបូជា និង បុណ្យអុំទូក។ ប៉ុន្តែពេលនេះ សម្តេចតេជោបានស្នើសុំ ក្នុងពិធីបុណ្យ៣បន្ថែមទៀត គឺបុណ្យ១. ភ្ជុំបិណ្ឌ ២.បុណ្យឯករាជ្យជាតិ និង៣.ទិវាឈ្នះឈ្នះ ២៩ ធ្នូ ។
សូមជម្រាបថា ទណ្ឌិតដែលត្រូវស្នើសុំលើកលែងទោសនេះ មានចំនួន៥២៣នាក់ ក្នុងនោះមានស្ត្រីចំនួន ៣៧នាក់ មកពីពន្ធនាគារខេត្តក្រុងចំនួន២៤ នឹងមណ្ឌលអប់រំកែ ប្រែចំនួន៤ នៅទូទាំងប្រទេស៕
