ឥណ្ឌូណេស៊ី ៖ ក្រុមពំនាញមុជទឹក បានរកឃើញប្រអប់ខ្មៅទី២ ដែលកត់ត្រាអំពីទិន្នន័យអំពីការហោះហើររបស់យន្តហោះក្រុមហ៊ុនអាកាសចរណ៍ Lion Air របស់ឥណ្ឌូណេស៊ី តែប្រអប់នេះបានរងការខូចខាតយ៉ាងធ្ងន់ធ្ងរ ជាហេតុធ្វើឱ្យដំណើរការស៊ើបអង្កេត របស់ឥណ្ឌូណេស៊ីជួបប្រទះការលំបាកច្រើនទៀត។
លោក Haryo Satmiko អនុប្រធានគណៈកម្មាធិការសុវត្ថិភាពគមនាគមន៍ជាតិឥណ្ឌូណេស៊ីប្រាប់ Reuters ថា យើងខ្ញុំនៅពុំទាន់អាចទាញយក (Download) ពីប្រអប់ខ្មៅបានឡើយទេ ព្រោះផ្នែកមួយចំនួនត្រូវបែកខ្ទេច»។ អ្នកជំនាញរូបនេះលើកឡើងថា ការដែលប្រអប់ខ្មៅរងសភាពខូចខាតបែបនេះ ធ្វើឱ្យដំណើរការស៊ើបអង្កេតពិតជាលំបាក។ លោកSatmiko ប្រាប់ថា សមត្ថកិច្ចឥណ្ឌូណេស៊ីកំពុងរង់ចាំជំនួយពីអ្នកជំនាញការអាមេរិក ឬក្រុមហ៊ុន Boeing ដើម្បីដោះស្រាយឧបសគ្គខាងលើ។
ប្រអប់ខ្មៅដែលរកឃើញនៅបាតសមុទ្រកាលពីម្សិលមិញនេះ ត្រូវបានគេផលិតឡើងមានសមត្ថភាពការពារការប៉ះទង្គិចខ្លាំងបាន ប៉ុន្តែការខូចខាតជាក់ស្តែងបង្ហាញឱ្យឃើញថាកម្លាំងប៉ះទង្គិចពេលយន្តះហោះធ្លាក់ចុះសមុទ្រពិតជាខ្លាំងសម្បើមណាស់ ធ្វើឱ្យប្រអប់ខ្មៅរងការខូចខាតបែបនេះ។ ការប៉ះទង្គិចយ៉ាងនេះទើបធ្វើឱ្យយន្តហោះបែកជាបំណែកតូចៗ ហើយសាកសពជនរងគ្រោះក៏ដូចគ្នាដែរ។
សូមជម្រាបថា យន្ដហោះ Boeing 737 MAX 8 មានជើងហោះហើរលេខ Flight JT-610 របស់ក្រុមហ៊ុន Lion Air មានផ្ទុកមនុស្ស១៨៩នាក់ ក្នុងនោះរួមមានមនុស្សវ័យជំទង់១៧៨នាក់, កុមារម្នាក់, ទារក០២នាក់, ពីឡុត ០២នាក់ និងក្រុមសហសេវិក ០៦នាក់ផ្សេងទៀតបានធ្លាក់ចូលទឹកសមុទ្រកាលពីថ្ងៃទី២៩ ខែតុលា ឆ្នាំ២០១៨ ក្នុងអំឡុងពេលហោះហើរពីរដ្ឋធានីហ្សាការតា ទៅកាន់ទីក្រុង ផាងកាល ភីណាង (Pangkal Pinang) កោះបាងកា (Bangka) របស់ឥណ្ឌូណេស៊ី៕
