សៀមរាប៖ មនុស្សប្រុស-ស្រីចំនួន៣នាក់បានស្លាប់ភ្លាមៗនៅនឹងកន្លែង និង៤នាក់ផ្សេងទៀត បានរងរបួសធ្ងន់ និងស្រាលក្នុងករណីគ្រោះថ្នាក់ចរាចរណ៍មួយដោយរថយន្តម៉ាកហាយឡែនឌ័រមួយគ្រឿងបានក្រឡាប់ដោយខ្លួនឯងជាច្រើនត្រឡប់។
ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីល្ងាចថ្ងៃទី២៥ ខែឧសភា ឆ្នាំ២០១៥ នៅលើកំណាត់ផ្លូវជាតិលេខ៦៨ ត្រង់ចំណុចនិយមកា ភូមិត្រុំខាងជើង ឃុំជ្រោយនាងងួន ស្រុកស្រីស្នំ ខេត្តសៀមរាប។
សមត្ថកិច្ច បានឲ្យដឹងថា អ្នកស្លាប់ ទី១-ឈ្មោះ សារិ ប្រេស ភេទប្រុស អាយុ៥៤ឆ្នាំ ២-ឈ្មោះ ហូង វ៉ាន់ថាយ ភេទស្រី អាយុ១៣ឆ្នាំ ត្រូវជាចៅ និង៣-ឈ្មោះ ហូង ផាន់ណា ភេទប្រុស អាយុ៩ឆ្នាំ ត្រូវជាចៅ ខណៈអ្នករបួសមិនស្គាល់អត្តសញ្ញណ បញ្ជូនទៅសង្គ្រោះនៅមន្ទីរពេទ្យបង្អែក ខេត្តសៀមរាប។ ចំណែកអ្នកបើកបរ ឈ្មោះ សារិក ណាន ភេទប្រុស អាយុ២២ឆ្នាំ រស់នៅភូមិក ឃុំចុងកាល់ ស្រុកចុងកាល់ ខេត្តឧត្តមានជ័យ ជាមួយគ្នាដែរ។
ប្រភពព័ត៌មានពីសាក្សី ដែលបានឃើញហេតុការណ៍នេះ បានឲ្យដឺងថាមុនពេលកើតហេតុ គេបានឃើញរថយន្តម៉ាកហាយឡែនឌ័រ ពណ៌ខ្មៅ សេរី២០០២ ពាក់ស្លាកលេខ សៀមរាប 2B-1345 បើកក្នុងល្បឿនលឿន។ លុះមកដល់ចំណុចកើតហេតុខាងលើ រថយន្តនេះ មិនដឹងមានបញ្ហាអ្វី បានក្រឡាប់ដោយខ្លួនឯង ជាច្រើនជុំ បណ្តាលឲ្យស្លាប់មនុស្សប្រុសស្រីក្មេង ចាស់ ៣នាក់ ភ្លាមៗនៅនឹងកន្លែង និងរងរបួសធ្ងន់ស្រាល ៤នាក់។
ក្រោយពីកើតហេតុ ជនរងគ្រោះ ត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែក ខេត្តសៀមរាប។ ចំណែករថយន្តត្រូវបាន សមត្ថកិច្ច ស្ទូចយកទៅរក្សាទុកនៅអធិការដ្ឋាននគរបាលស្រុកស្រីស្នំ។ រីឯសពត្រូវបានសាច់ញាតិ និងក្រុមគ្រួសារ មកទទួលយកទៅរៀបចំ ធ្វើបុណ្យតាមប្រពៃណី៕
