ឧត្ដរមានជ័យ៖ មួយថ្ងៃៗ សត្វព្រៃជា ច្រើនក្បាលត្រូវគេប្រមាញ់សម្លាប់យកមកដាក់លក់ជាសាធារណៈ យ៉ាងអនាធិបតេយ្យ នៅក្នុងទឹកដីស្រុកត្រពាំងប្រាសាទ។នេះបើតាមរូបភាពចំនួន ០៤សន្លឺក ដែលត្រូវបានអ្នកលេងបណ្តាញសង្គមFacebook បង្ហោះនិងចែកចាយបន្ត ក្នុងរយៈពេលប៉ុន្មានថ្ងៃមកនេះ។
រូបភាពនៃការប្រមាញ់សត្វព្រៃ មានដូចជាៈ ទន្សាយ ឈ្លូស ជ្រូកព្រៃ ជាដើម ត្រូវបានគេយកចេញ ពីក្នុងព្រៃនៅក្នុងស្រុកត្រពាំងប្រាសាទ ខេត្ដឧត្ដរមានជ័យ ហើយដាក់លក់ អោយឈ្មួញនៅទីនោះយ៉ាងអនាធិបតេយ្យ ពុំមានការខ្លាចរអា និងសមត្ថកិច្ច ឬអាជ្ញាធរនោះឡើយ។
ការសម្លាប់សត្វព្រៃ ដោយគ្មានការទប់ស្កាត់យ៉ាងដូច្នេះ ត្រូវបានអ្នកលេងបណ្តាញសង្គមFacebook មានការព្រួយបារម្ភពីភាពវិនាស ហិនហោច នៃសត្វព្រៃទាំងនោះ បើសិនជាអាជ្ញាធរសមត្ថកិច្ច និងមន្ដ្រីពាក់ព័ន្ធ ជាពិសេសអង្គភាពរដ្ឋបាលព្រៃឈើ ឬក្រុមអភិរក្សសត្វព្រៃ មិនបានចាត់វិធានការឱ្យទាន់ពេលវេលានោះទេ។
បន្ទាប់ពីមានសត្វព្រៃជាច្រើនប្រភេទត្រូវបានគេដាក់លក់ជាសាធារណៈព្រោងព្រាត បង្ហោះលើបណ្តាញសង្គមFacebook ហើយត្រូវគេអះអាងថា ការលក់សត្វព្រៃ ជាហូរហែនេះ ស្ថិតនៅក្នុងស្រុកត្រពាំងប្រាសាទ ខេត្តឧត្តរមានជ័យតនោះ លោក ម៉ែន លី ស្នងការនគរបាលខេត្ដឧត្ដរមានជ័យ បានឲ្យដឹងនៅព្រឹកថ្ងៃទី២៨ ខែឧសភានេះថាពេលនេះ លោកកំពុងចាត់ឱ្យ នគរបាលស្រុក-ក្រុង ស្រាវជ្រាវលើករណី បាញ់សម្លាប់សត្វព្រៃយ៉ាងរង្គាល នៅក្នុងស្រុកត្រពាំងប្រាសាទ។
លោក ម៉ែន លី បាននិយាយថា លោកបានឃើញហើយនូវរូបភាពសម្លាប់ហើយលក់សត្វព្រៃទាំងនោះ ប៉ុន្តែរហូតដល់ពេលនេះ សមត្ថកិច្ចនៅមិនទាន់កំណត់អត្តសញ្ញាណបាននៅឡើយទេ៕
