បន្ទាយមានជ័យ៖ សមត្ថកិច្ចកម្ពុជា កាលពីវេលាថ្ងៃត្រង់ថ្ងៃទី២៨ ឧសភា បានចុះទៅឃាត់ជនជាតិថៃពីរនាក់ដែលយកត្រាក់ទ័រ១គ្រឿងចូលមកភ្ជួរដីបម្រុងធ្វើស្រែក្នុងតំបន់ឲ្យបញ្ឈប់សក្មភាព ព្រោះជាតំបន់ហាមឃាត់។
សកម្មភាពចូលមកភ្ជួររាស់ដោយបំពាននេះ ស្ថិតនៅចំណុចខាងកើតបង្គោលសីមាលេខ៤៥ ប្រហែល៨០០ម៉ែត្រ ក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ វេលាម៉ោង១២ថ្ងៃត្រង់ ថ្ងៃទី២៨ ខែ ឧសភា ហើយត្រូវកម្លាំងសមត្ថកិច្ចកម្ពុជា បានចុះទៅហាមឃាត់ និងទប់ស្កាត់មិនឱ្យភ្ជួរដីនោះទេ។
តាមសេចក្ដីរាយការណ៍បានឲ្យដឹងថា ប្រជាពលរដ្ឋថៃ ២នាក់ រស់នៅភូមិថ្មី ឃុំគោកធ្យូង ស្រុកគោកធ្យូង ខេត្ដស្រះកែវ កាលពីវេលាម៉ោង១២ថ្ងៃត្រង់ ថ្ងៃទី២៨ ខែឧសភា ឆ្នាំ២០១៥ បានយកត្រាក់ទ័រចំនួន ១គ្រឿង ចូលមកភ្ជួរដីបម្រុងធ្វើស្រែក្នុងតំបន់ ហាមឃាត់នៅចំណុចខាងកើតបង្គោលសីមាលេខ៤៥ ប្រហែល៨០០ម៉ែត្រ ស្ថិតក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ ឈម នឹងភូមិថ្មី ឃុំគោកធ្យូង ស្រុកគោកធ្យូង ខេត្ដស្រះកែវ ប្រទេសថៃ ។សកម្មភាពនេះ ត្រូវបានកម្លាំងសមត្ថកិច្ចកម្ពុជារួមមានវរៈនគរបាល ការពារព្រំដែនគោក លេខ៩១១ និងវរៈយោធា ៥១៥ ចុះទៅហាមឃាត់ មិនឱ្យភ្ជួរដីនោះទេក្រោយពេលត្រូវប្រជាជនថៃនោះបានធ្វើសកម្មភាពដោយយកត្រាក់ទ័រភ្ជួរដីមួយគ្រឿងបានចំនួន ៤០ម៉ែត្រគុណ៤០ម៉ែត្រ រួចហើយនោះ។
សេចក្ដីរាយការណ៍ដដែលបានឱ្យដឹងទៀតថា ក្រោយពីសមត្ថកិច្ចកម្ពុជា ចុះទៅហាមឃាត់ប្រជាជនថៃបាន ផ្អាកសកម្មភាព ហើយក៏រត់ទៅប្ដឹង តម្រួតការពារព្រំដែនរបស់គេ។ ទន្ទឹមនោះគេឃើញតម្រួតថៃចំនួន ៥នាក់ ចេញមុខមកធ្វើអន្ដរាគមន៍ ដើម្បីសម្របសម្រួលជាមួយសមត្ថកិច្ចកម្ពុជាដោយសុំឱ្យប្រជាជនទាំង២ នាក់របស់គេ បានភ្ជួរដីធ្វើស្រែវិញ ក៏ប៉ុន្ដែនៅពេលនោះ សមត្ថកិច្ចកម្ពុជាមិនអនុញ្ញាតនោះទេ។
សមត្ថកិច្ចកម្ពុជាលើកបង្ហាញហេតុផលប្រាប់តម្រួតថៃថា ដីតំបន់នេះ គឺជាដីតំបន់កន្លងមកគ្មានភាគីណាអាច ធ្វើអ្វីបាននោះឡើយ ករណីនេះរង់ចាំទុក ឱ្យថ្នាក់លើនៃប្រទេសទាំង២ដោះស្រាយ សិន។ បន្ទាប់ពីសមត្ថកិច្ចកម្ពុជាពន្យល់ ដល់តម្រួតថៃរួចរាល់នៅវេលាម៉ោង ១២និង៥០ថ្ងៃរសៀលថ្ងៃដដែល តម្រួតថៃ និងប្រជាជនថៃទាំងនោះក៏ត្រឡប់ទៅវិញ ដោយគ្មានបញ្ហាប្រឈមមុខដាក់គ្នាធ្ងន់ធ្ងរនោះទេ៕
