ភ្នំពេញ៖ជនភៀសខ្លួនមកពីអូស្ដ្រាលី៤នាក់ កាលពីព្រឹកមិញនេះបានធ្វើដំណើរទៅដល់កម្ពុជាហើយតាមជើងហោះហើររបស់ម៉ាឡេស៊ីដែលចុះចតនៅព្រលានយន្តហោះអន្តរជាតិភ្នំពេញ។ សមត្ថកិច្ចបានប្រើមធ្យោបាយរថយន្តបិទជិតមិនចង់ឲ្យបណ្តាញព័ត៌មានធ្វើការសម្ភាសន៍ និងថតរូបឡើយ។
សេចក្តីរាយការណ៍បានឲ្យដឹងថា ជនភៀសខ្លួនទាំងនោះត្រូវអង្គការទេសន្ដរប្រវេសន៍អន្ដរជាតិ (IOM) នាំទៅកន្លែងស្នាក់នៅដែលគេមិនទាន់បញ្ជាក់អាសយដ្ឋានទីតាំងនៅឡើយ។ជនភៀសខ្លួនទាំងនេះ៣នាក់ជាជនជាតិអ៊ីរ៉ង់ និងម្នាក់ជាជនជាតិភាគតិចរ៉ូហ៊ីងយ៉ាពីភូមាដែលបានសុខចិត្ដធ្វើដំណើរមករស់នៅក្នុងប្រទេសកម្ពុជា។
ព័ត៌មានពីអូស្ត្រាលី បានឲ្យដឹងថា ពួកគេមិនបាននិយាយទៅកាន់អ្នកកាសែតទេ ដោយមន្ដ្រីអន្ដោប្រវេសន៍អូស្ដ្រាលីនិយាយថា ជនទាំង៤នាក់នេះមិនចង់ឲ្យមានបញ្ហាសុវត្ថិភាពដល់ក្រុមគ្រួសារ។ ប្រភពបន្តថា ពួកគេត្រូវអាជ្ញាធរដឹកចេញពីកោះណារ៉ូស្ងាត់ៗប៉ុន្មានអាទិត្យមុននេះ ទៅកាន់ក្រុងដារវិនដើម្បីរង់ចាំការធ្វើដំណើរបន្ដទៅកម្ពុជា។
គួររំលឹកថា កន្លងមកកិច្ចព្រមព្រៀងជនភៀសខ្លួននេះបានរងការរិះគន់ខ្លាំងពីអង្គការសិទ្ធិមនុស្សជាតិ និងអន្ដរជាតិ រួមទាំងបក្សប្រឆាំងកម្ពុជា និងអូស្ដ្រាលី ដោយគេលើកឡើងថា កម្ពុជាគ្មានលទ្ធភាពមើលថែទាំជនទាំងនោះទេ។
ទោះជាយ៉ាងនេះក្តី ក្នុងកិច្ចព្រមព្រៀងរវាងរដ្ឋាភិបាលទាំងពីរ ភាគីអូស្ដ្រាលីជាអ្នកចេញថ្លៃចំណាយទាំងអស់លើការតាំងទីលំនៅជន ទាំងនោះ ដោយផ្ដល់ប្រាក់១៥.៥លានដុល្លារទៅឲ្យអង្គការ IOM សម្រាប់គាំទ្រដល់ការបញ្ជូនជនភៀសខ្លួនទៅកម្ពុជារយៈពេល១ឆ្នាំ។
ក្រោយមក រដ្ឋាភិបាលអូស្ដ្រាលី បានសម្រេចផ្ដល់ប្រាក់ជំនួយបន្ថែមប្រមាណ៤០លានដុល្លារអូស្ដ្រាលី ទៀតមកដល់រាជរដ្ឋាភិបាលកម្ពុជា។
មន្ត្រីនាំពាក្យក្រសួងមហាផ្ទៃ ខៀវ សុភ័គ មានប្រសាសន៍ថា ជនភៀស ខ្លួនទាំង ៤នាក់ នោះត្រូវបញ្ជូនភា្លមៗទៅកាន់កន្លែងស្នាក់បណ្ដោះអាសន្ន ក្នុងសង្កាត់និរោធ ខណ្ឌច្បារអំពៅ៕ ខេមរិន្ទ
អ្នកកាសែតរង់ចាំការធ្វើដំណើរមកដល់នៃជនភៀសខ្លួនពីអូស្ដ្រាលីនៅព្រលានយន្តហោះអន្តរជាតិភ្នំពេញ
