រតនគិរី៖ការប៉ះទង្គិចដោយពាក្យសម្ដី និងរុញច្រានគ្នាទៅវិញទៅមករវាងក្រុមតំណាងរាស្ត្រគណបក្សសង្គ្រោះជាតិ ជាមួយសមត្ថកិច្ចការពារព្រំដែនវៀតណាម បានកើតឡើងជាថ្មីទៀតខណៈចុះទៅពិនិត្យមើលស្រះទឹកចំនួន៥ ដែលវៀតណាមបានជីកនៅតំបន់ហាមឃាត់ ប៉ុន្តែមិនបង្កឲ្យមានអ្នករងរបួសនោះទេ។
អ្នករាយការណ៍ព័ត៌មាន មេគង្គប៉ុស្តិ៍ បានឲ្យដឹងថា នៅវេលាព្រលឹមថ្ងៃចន្ទ ទី០៨ខែ មិថុនា នេះ ក្រុមអ្នកតំណាងរាស្ត្រគណបក្សប្រឆាំង និស្សិត និងប្រជាពលរដ្ឋជាង២០០នាក់ បានធ្វើដំណើរទៅព្រំដែនកម្ពុជាវៀតណាម ត្រង់ចំណុចភូមិឡុំ ឃុំប៉ក់ញ៉ៃ ស្រុកអូយ៉ាដាវ ខេត្តរតនគិរី គោលបំណងធ្វើដំណើរទៅព្រំដែនកម្ពុជា-វៀតណាម ត្រង់ចំណុចដែលប្រជាពលរដ្ឋរាយការណ៍ថា វៀតណាមទើបតែលួចជីកស្រះចំនួន៥នៅក្នុងទឹកដីខ្មែរ។
ប្រភពបន្តថា ខណៈទៅដល់ទីនោះ គេឃើញសមត្ថកិច្ចវៀតណាម ដែលមានប្រដាប់ដោយដំបងឆក់ និងកាំភ្លើងផងនោះ បានប្រើកម្លាំងរុញច្រានក្រុមអ្នកតំណាងរាស្ត្រ និងប្រជាពលរដ្ឋ ប៉ុន្តែក្នុងពេលប៉ះទង្គិចគ្នានោះ ក៏មានសមត្ថកិច្ចខ្មែរប្រមាណជាង២០នាក់ បានជួយសម្របសម្រួលជាបន្តបន្ទាប់ដើម្បីបញ្ចៀសកុំឲ្យមានហិង្សាកើតឡើង។
តំណាងរាស្ត្រគណបក្សសង្គ្រោះជាតិ លោក ម៉ៅ មុន្នីវណ្ណ ដែលបានដឹកនាំការចុះពិនិត្យស្រះ ទឹកនោះ បានអះអាងថា មានស្រះទឹកយ៉ាងហោចណាស់ចំនួន៧ ដែលវៀតណាមបានជីកនៅក្នុងតំបន់ស ដែលជាតំបន់ហាមឃាត់ គឺស្រះ២ជាស្នាមជីកចាស់ ចំណែកស្រះទឹក៥ទៀតទើបតែជីកក្នុងពេលថ្មីៗនេះ។
លោក ម៉ៅ មុន្នីវណ្ណ បានបញ្ជាក់ថា លោកនឹងធ្វើរបាយការណ៍ជូនទៅប្រធានរដ្ឋសភា និងរដ្ឋាភិបាលកម្ពុជា ឲ្យចាត់វិធានការចំពោះករណីនេះជាចាំបាច់។
លោក វ៉ា គឹមហុង ទេសរដ្ឋមន្ត្រី និងជាប្រធានគណះកម្មាធិការព្រំដែនកម្ពុជា មិនអាចភ្ជាប់ប្រព័ន្ធទូរស័ព្ទដើម្បីសុំការបកស្រាយពាក់ព័ន្ធករណីដែលពលរដ្ឋខ្មែរអះអាងថា វៀតណាមបានជីកស្រះនៅលើទឹកដីខ្មែរក្នុងខេត្តរតនគិរីបានទេ កាលពីរសៀលថ្ងៃទី៨ ឧសភា នេះ៕
ដោយ៖ឡុង សារ៉េត
ទិដ្ឋភាពពេលចុះទៅពិនិត្យចំណុចដែលថាវៀតណាមជីកស្រះលើដីខ្មែរ
