កោះកុង: រថយន្តដឹកទំនិញធុនតូចចំនួន ១៦៧ គ្រឿង និងជនជាតិថៃប្រមាណ ៣៩៨ នាក់ ត្រូវបានប៉ូលិសអន្តប្រវេសន៍ ច្រកទ្វារអន្តរជាតិចាំយាម ខេត្តកោះកុង ហាមឃាត់មិនឲ្យឆ្លងដែន កាលពីថ្ងៃទី១១ ខែមិថុនា ឆ្នាំ២០១៥ នេះ ដោយសារតែពុំមានលិខិតអនុញ្ញាត ពីក្រសួងមហាផ្ទៃ។
ប្រធានស្នាក់ការច្រកទ្វារចាំយាម លោក សុវណ្ណ ប៊ុនធឿន បានប្រាប់ថា ក្បួនរថយន្តដឹកទំនិញខាងលើគ្រោងឆ្លងតាមច្រកចាំយាមនេះ ឆ្ពោះទៅខេត្តព្រះសីហនុ ដោយមានត្រឹមតែលិខិតអនុញ្ញាតរបស់ក្រសួងហិរញ្ញវត្ថុប៉ុណ្ណោះ ចំណែកពលរដ្ឋថៃប្រមាណជិត៤០០នាក់ដែលអមដំណើរក្បួនរថយន្តយកទំនិញទៅលក់នោះគ្មានលិខិតឆ្លងដែនទេ ដូច្នេះប៉ូលិសអន្តប្រវេសន៍ មិនអាចអនុញ្ញាតឲ្យឆ្លងកាត់ចូលមកក្នុងទឹកដីកម្ពុជាបានឡើយ។
មន្រី្តរូបនោះ បានឲ្យដឹងថា អ្នករត់ការ បានយកតែលិខិតរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្មដែលអនុញ្ញាតឲ្យនាំរថយន្ត និងដឹកទំនិញចូលមកបង្ហាញតែចំពោះលិខិតរបស់ក្រសួងមហាផ្ទៃដែលអនុញ្ញាតឲ្យមនុស្សចូលមក គឺពុំមានទេ ដូចនេះប៉ូលិសចាំបាច់ត្រូវឃាត់ដើម្បីឲ្យអ្នករត់ការទៅបំពេញសំណុំបែបបទ ឲ្យបានគ្រប់គ្រាន់ ជាមុនសិន ទើបអនុញ្ញាតឲ្យឆ្លងកាត់។
នៅក្នុងព្រឹតិ្តការណ៍ខាងលើ គេសង្កតឃើញ អ្នករត់ការម្នាក់ ឈ្មោះ កាលីន ដែលអះអាង ថា ខ្លួនជាមន្រី្តសាលាខេត្តព្រះសីហនុ បានទូរស័ព្ទខ្វាត់ខ្វែង ទៅសុំអន្តរាគមន៍ពី លោកអភិបាលខេត្តព្រះសីហនុ និងមន្រី្ត នៅអគ្គនាយកដ្ឋានប៉ូលិសអន្តប្រវេសន៍ តាំងពីម៉ោង៩ព្រឹក រហូតមកដល់ម៉ោងជិត៦ល្ងាច ដើម្បីសុំឲ្យក្បួនរថយន្ត បានឆ្លងកាត់ ដោយពុំបាច់រត់ការទៅសុំ ការអនុញ្ញាតច្បាប់ ពីក្រសួងមហាផ្ទៃ តែទីបំផុត គ្មានមន្រី្តណាម្នាក់ ហ៊ានចេញមុខ ធើ្វអន្តរាគមន៏ទេ៕
