ភ្នំពេញ៖ថ្ងៃទី២០ ខែមិថុនា ឆ្នាំ២០១៥ ខាងមុខនេះ គណបក្សប្រជាជនកម្ពុជា នឹងបោះឆ្នោតជ្រើសរើសប្រធាន និងអនុប្រធានគណបក្ស នៅស្នាក់ការកណ្តាលគណបក្ស (គ៨៥) ជិតវិមានចំការមន។តំណែងប្រធានគណបក្សត្រូវបានដឹងថា លោក ហ៊ុន សែន ពីមុនជាអនុប្រធានគណបក្ស នឹងត្រូវជ្រើសតាំងជាប្រធានគណបក្សជំនួសសម្តេច ជា ស៊ីម។
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា បានប្រាប់បណ្តាញព័ត៌មានក្នុងស្រុក នាព្រឹកថ្ងៃទី ១៤ មិថុនា នេះថា«សម្តេចនាយករដ្ឋមន្ត្រី លោកនឹងស្នងពីសម្តេចប្រធាន ជា ស៊ីម ហើយត្រូវឆ្លងការបោះឆ្នោតជ្រើសតាំងប្រធាន គឺជ្រើសតាំងសម្តេចនាយករដ្ឋមន្ត្រី ហើយនឹងជ្រើសតាំងអនុប្រធានទៀត ដើម្បីជំនួសសម្តេច (អនុប្រធាន) ហើយតំណែងអនុប្រធាន គឺនៅចាំមើលនៅថ្ងៃទី២០ មិថុនា តែម្តង។ មន្ត្រីដែលត្រូវជំនួសតំណែងអនុប្រធានបក្ស អាចសន្និដ្ឋានថា ជាឥស្សរជនជាន់ខ្ពស់នៅក្នុងគណៈអចិន្ត្រៃយ៍ ដែលមានប្រវត្តិយូរអង្វែងជាមួយគណបក្សប្រជាជនកម្ពុជា »។
គួរជម្រាបថា ការបោះឆ្នោតជ្រើសតាំងប្រធាន និងអនុប្រធានគណបក្សប្រជាជនកម្ពុជា គឺធ្វើឡើងបន្ទាប់ពីពិធីបូជាសពសម្តេច ជា ស៊ីម រួចរាល់បានមួយថ្ងៃ គឺនៅថ្ងៃ ទី១៩ ខែមិថុនា ឆ្នាំ២០១៥ ដែលជាថ្ងៃកាន់មរណទុក្ខក្នុងពិធីបូជាសព។
សម្តេច ស៊ីម អតិតប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានទទួលមរណភាពក្នុងជន្មាយុ ៨៣ឆ្នាំដោយជរាពាធ កាលពីរសៀលថ្ងៃទី០៨ ខែមិថុនា ឆ្នាំ២០១៥វេលាម៉ោង ៣:៤៥ នាទី នៅភូមិគ្រឹះរបស់សម្តេច សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕ដោយ៖ សុត្ថារ៉ូ
