ខេត្តរតនគិរី៖រថយន្តប្រភេទយីឌុបពីរគ្រឿងអត់ស្គាល់ស្លាកលេខផ្ទុកបទល្មើសឈើប្រណីតពេញព្រៀបធ្វើដំណើរចេញពីស្រុកវើនសៃ តាមផ្លូវលំលេខ៧៨Aក្នុងទិសដៅពីជើងមកត្បូងដោយឆ្លងកាត់ក្រុងបានលុង និងឆ្ពោះបន្តទៅតាមផ្លូវជាតិលេខ៧៨ពីកើតទៅលិចបាត់។សមត្ថកិច្ចយាមតាមគោលដៅមិនហ៊ាន ឃាត់ទេ ព្រោះមេហាម។
បើតាមសេចក្តីរាយការណ៍ពីប្រជាពលរដ្ឋដែលរស់នៅក្នុងស្រុកវើនសៃបានអោយដឹងថា កាលពីវេលាម៉ោងប្រមាណ៥ល្ងាច ថ្ងៃទី១៨ ខែមិថុនា ឆ្នាំ២០១៥ ប្រទះឃើញរថយន្តប្រភេទយីឌុបទាំងអស់២គ្រឿង មិនចាំស្លាកលេខផ្ទុកដោយឈើប្រណីតប្រភេទលេខ១ ពេញព្រៀបបម្រុងដឹកជញ្ជូនឆ្ពោះមកក្រុងបានលុង។ ប្រភពបានអះអាងថា ការដឹកជញ្ជូនឈើចំនួនពីរថយន្តខាងលើនេះ ជារបស់ឈ្មួញបំផ្លាញព្រៃឈើដ៏មហិមាឈ្មោះ ធី ឫទ្ធសី ហៅសី និងជាមេឈ្មួញឈើវ័យក្មេងម្នាក់យកគោរមងារឧកញ៉ាដែលផ្តល់ដោយព្រះមហាក្សត្រទៅកាងការរកស៊ីឈើល្មើសច្បាប់ប្រចាំខេត្តរតនគិរីច្រើនឆ្នាំកន្លងមកហើយ។ចំពោះការដឹកជញ្ជូនឈើប្រណីតទាំងនេះ ត្រូវគេឃុបឃិតគ្នាសូកប៉ាន់ជាខ្សែចង្វាក់បើកភើ្លងខៀវពីមន្ត្រីមានសមត្ថកិច្ចមួយចំនួនក្នុងខេត្ត និងជួយជ្រោមជ្រែងឲ្យពួកខិលខូច២-៣នាក់ដឹកជញ្ជូនឈើចេញពីក្រុមហ៊ុនម៉ាងយ៉ាងខេ ស្ថិតក្នុងតំបន់ដីសម្បទានសេដ្ឋកិច្ចដំណាំកៅស៊ូដែលមានទីតាំងក្នុងស្រុកវើនសៃ យ៉ាងអនាធិបតេយ្យ។
ជាក់ស្តែងនៅវេលាម៉ោង ៦ និង៤៥នាទី ព្រលប់ថ្ងៃទី១៨ ខែឆ្នាំដដែល ភ្នាក់ងារសារពត៌«មេគង្គប៉ុស្តិ៍»បានប្រទះឃើញរថយន្តប្រភេទយីឌុបចំនួន២គ្រឿងដឹកឈើពេញព្រៀបហើយក៏បានតាមយកព័ត៌មាន និងថតរូបដើម្បីឆ្លុះបញ្ចាំងទៅនឹងសេចក្តីរាយការណ៍ដូចដែលបានចោទប្រកាន់ ទើបដឹងថាពិតប្រាកដមែន ។
សមត្ថកិច្ចតាមដងផ្លូវ(សុំលាក់ឈ្មោះ)បានប្រាប់ មេគង្គប៉ុស្តិ៍ ដោយកំហឹងថា « គេ (មេ) មិនឲ្យឃាត់ត្រួតពិនិត្យរថយន្តយីឌុបទាំងពីរគ្រឿងនេះទេ ព្រោះជាឈើរបស់លោកឧកញ៉ាធី ឫទ្ធសី។ ប្រភពបន្តទៀតថា កន្លងមកមេឈ្មួញដែលប្រើប្រាស់គោរមងារឧកញ៉ាជួញដូរឈើខុសច្បាប់ម្នាក់នេះ បានផ្តល់លុយកាក់អោយមេកាម្នាក់ឈ្មោះ ណូ ឲ្យកៀងគរគ្នីគ្នាជាច្រើននាក់ទៀតចូលទៅកាប់ និងដឹកឈើចេញពីតំបន់ឧទ្យានជាតិវរៈជ័យ ប្រមូលមកគរទុកក្នុងក្រុមហ៊ុនដីសម្បទានសេដ្ឋកិច្ចអភិវឌ្ឍន៍ដំណាំកៅស៊ូម៉ាងយ៉ាងខេ ស្ថិតក្នុងស្រុកវើនសៃ។
ប្រភពបន្តថា ពួកគេបំលែងពីឈើអនាធិបតេយ្យខុសច្បាប់មកជាឈើស្របច្បាប់ ព្រោះគេដឹកជញ្ជូនចេញពីក្រុមហ៊ុនស្របច្បាប់នៅពេលយប់យ៉ាងរលូន។ ចំណែកសមត្ថកិច្ចជំនាញនៅតាមដងផ្លូវជាពិសេសជំនាញរដ្ឋបាលព្រៃឈើស្រុកអូរជុំ ដែលមានលោក មូល សាវាំង ដែលជានាយគ្រប់គ្រងចំនួន៣ស្រុក អូរជុំ វើនសៃ និងស្រុកតាវែង ពុំមានឆន្ទះក្នុងការចុះបង្ក្រាបបទល្មើសឈើប្រណីតដែលតែងតែកើតមានឡើងរាល់យប់ រាល់ថ្ងៃដូចខាងលើនោះទេ ។
ដោយសារភាពព្រងើយកន្តើយរបស់លោក មូល សាវាំង ទើបបង្កឲ្យមជ្ឈដ្ឋានប្រជាពលរដ្ឋក្នុងខេត្ត រិះគន់ចោទប្រកាន់លោក សាវាំង យ៉ាងចាស់ដៃប្រាប់អ្នកកាសែតថា លោក សាវាំង មិនខ្លាចអំណាចរបស់លោកឧកញ៉ា ធី ឫទ្ធសី ទេ តែគាត់ខ្លាចលុយឧកញ៉ា សី ។សរុបមក បទល្មើសព្រៃឈើដែលកើតមានយ៉ាងអនាធិបតេយ្យក្នុងខេត្តរតនគិរី គឺដោយសារលុយ៕ ដោយ៖ឡុង សារ៉េត
កូនចៅឧកញ៉ា សី អ្នករត់ការសូកប៉ាន់មន្រ្តីមានសមត្ថកិច្ច
