ស្វាយរៀងះតំណាងរាស្ត្របក្សប្រឆាំង និងអ្នកគាំទ្រមួយចំនួនបានរងរបួសធ្ងន់ និងស្រាលនៅរសៀលថ្ងៃទី២៨ មិថុនា នេះ ខណៈពួកគេព្យាយាមចូលទៅពិនិត្យតំបន់ព្រំដែនតាមសេចក្តីរាយការណ៍ដែលថាវៀតណាមរំលោភ និងធ្វើផ្លូវលើទឹកដីកម្ពុជាក្នុងខេត្តស្វាយរៀង។
តំណាងរាស្ត្រគណបក្សសង្គ្រោះជាតិបានអះអាងថា តំណាងរាស្ត្របក្សរបស់ខ្លួនលោក រៀល ខេមរិន្ទ្រ ត្រូវបានអាជ្ញាធរវៀតណាម វាយឲ្យរងរបួសធ្ងន់ ខណៈចុះទៅពិនិត្យព្រំដែនកម្ពុជា-វៀតណាម នៅខេត្តស្វាយរៀង ។
តាមសេចក្តីរាយការណ៍ពីខេត្តស្វាយរៀងបានឲ្យដឹងថា នៅរសៀលថ្ងៃអាទិត្យនេះ គេឃើញតំណាងរាស្ត្របក្សសង្គ្រោះជាតិដែលដឹកនាំដោយលោក រៀល ខេមរិន្ទ្រ លោក អ៊ុំ សំអាន និងប្រធានសហគមន៍ខ្មែរកម្ពុជាក្រោមនៅកម្ពុជាលោក ថាច់ សេដ្ឋា បានដឹកនាំប្រជាពលរដ្ឋ និងព្រះសង្ឃកម្ពុជាក្រោមប្រមាណ ២០០អង្គ/នាក់ ចុះពិនិត្យព្រំដែនខេត្តស្វាយរៀង ត្រង់ចំណុចភូមិគោកធ្លក ឃុំត្នោត ស្រុកកំពង់រោ ខេត្តស្វាយរៀង បន្ទាប់ពីទទួលដំណឹងពីប្រជាពលរដ្ឋ ថាវៀតណាមបានរំលោភទឹកដីខ្មែរ និងកំពង់ធ្វើផ្លូវនៅតំបន់ដែលមិនទាន់ឯកភាពគ្នាបោះបង្គោល ។
ប្រភពបន្តថា ខណៈតំណាងរាស្ត្របក្សប្រឆាំង និងអ្នកគាំទ្រព្យាយាមចូលទៅចំណុចដែលថាវៀតណាមរំលោភនោះ ស្រាប់តែអាជ្ញាធរ និងពលរដ្ឋវៀតណាម បានឃាត់មិនឲ្យចូល។បន្ទាប់មកក៏មានការរុញច្រានគ្នា ហើយតំណាងរាស្ត្រលោក រៀល ខេមរិន្ទ្រ ត្រូវគេរុញធ្លាក់ទឹក និងព្រួតគ្នាវាយតំណាងរាស្ត្ររូបនេះឲ្យរបួសធ្ងន់ ត្រង់ដៃ ខ្នង និងកញ្ចឹងកផងដែរ ។ ប្រភពបន្តថា តំណាងរាស្ត្ររូបនេះ ពលរដ្ឋខ្មែរប្រមាណ ១០នាក់បានរងរបួសស្រាល ចំណែកភាគីវៀតណាមក៏រងរបួសដែរ តែមិនដឹងជាប៉ុន្មាននាក់ បន្ទាប់ពីមានការប៉ះទង្គិចគ្នាប្រមាណជាង ១០នាទី នោះ។
មជ្ឈដ្ឋានវិភាគនយោបាយ បានលើកឡើងថា ការកៀងគរអ្នកគាំទ្របក្សរបស់ខ្លួនឲ្យចូលរួមទៅពិនិត្យតំបន់ខ្សែបន្ទាត់ព្រំដែនកម្ពុជា-វៀតណាម នៅខេត្តស្វាយរៀងនាពេលកន្លងមកនេះ មិនមែនជាដំណោះស្រាយនោះទេ គឺជាប្រជាភិថុតសុទ្ធសាធ ព្រោះថាខ្សែបន្ទាត់ព្រំដែនគេត្រូវដោះស្រាយតាមយន្តការរវាងរដ្ឋ និងរដ្ឋ ។មានតំបន់ខ្លះត្រូវអូសបន្លាយរាប់សិបឆ្នាំ ទើបអាចបញ្ចប់ទៅបាន ឧទាហរណ៍ជាក់ស្តែង ខ្សែបន្ទាត់ព្រំដែនកម្ពុជា-ថៃ នៅតំបន់ជុំវិញប្រាសាទព្រះវិហារ ខេត្តបន្ទាយមានជ័យ បានអូសបន្លាយជិត១០ឆ្នាំហើយ នៅតែមិនអាចដោះស្រាយបាននៅឡើយ បើទោះបីជាមានសាលក្រមរបស់តុលាការអន្តរជាតិក្រុងឡាអេបញ្ជាក់ជាថ្មីយ៉ាងណាក្តី។
សរុបមកវិញ ការផ្តួលរំលំដៃគូនយោបាយ ដោយប្រើលេសបរទេសឈ្លានពាន ឬញុះញង់ឲ្យមានការរើសអើងពូជសាសន៍ប្រទេសជិតខាង គឺជាប្រការដ៏គ្រោះថ្នាក់បំផុតដែលមិនគួរអ្នកនយោបាយខ្មែរយកមកប្រើប្រាស់ទៀតឡើយ ព្រោះកម្ពុជាបានរងគ្រោះយ៉ាងធ្ងន់ធ្ងរកាលពីពេលកន្លងមក ដែលមួយផ្នែកធំក៏ផ្តើមចេញពីការញុះញង់ចោទគ្នាថាលក់ទឹកដីឲ្យបរទេស៕ដោយ៖ខេមរៈ
