ពិតជាគួរឲ្យសោកស្ដាយក្រុមកម្ពុជាបានបរាជ័យក្រោមថ្វីជើងក្រុមហុងកុងក្នុងលទ្ធផល ២-០ ក្នុងការប្រកួតវគ្គជម្រុះពានរង្វាន់ FIFA World Cup 2022 ។
២គ្រាប់របស់ក្រុមម្ចាស់ផ្ទះហុងកុងរកបានដោយកីឡាករ James Stephen Gee Ha នៅនាទី២១ និង Roberto Junior នៅនាទី៨៣ ខណៈប្រធានក្រុមកម្ពុជា សឿយ វិសាល ទទួលបានកាតក្រហមនៅនាទី៧៨។
លោក Mixu Paatelainen គ្រូបង្វឹកហុងកុងបានបង្ហាញចំណាប់អារម្មណ៍ថា ការប្រកួតនេះពិតជាគួរឲ្យចាប់អារម្មណ៍ ដែលក្រុមយើងលេងបានល្អជាមួយស្មារតីក្រុមដែលយើងព្យាយាមអភិវឌ្ឍន៍។ លោកថា យើងលេងជាក្រុមបានល្អចេះជួយគ្នានិងជាពិសេសយើងលេងក្នុងទឹកដីដែលមានអ្នកគាំទ្រយើងច្រើនជួយជាកំលាំងចិត្តក្រុម។
ចំណែកគ្រូបង្វឹកក្រុមជម្រើសជាតិកម្ពុជាលោក Felix G. Dalmas បានលើកឡើងថា ជាដំបូងគឺអបអរដល់ហុងកុងដែលទទួលបានជ័យជំនះក្នុងការប្រកួតនេះ។ ថ្វីត្បិតតែយើងមិនបានទទួលលទ្ធផលដែលយើងចង់បាន តែខ្ញុំពេញចិត្តនិងរបៀបលេងរបស់កីឡាករ ដែលព្យាយាមលេងតាមទម្រង់និងព្យាយាមគ្រប់គ្រងបាល់។ លោកបានបន្តថា ខ្ញុំមានអារម្មណ៍សោកស្ដាយដែលការខិតខំរបស់កីឡាករយើង មិនអាចទទួលបានលទ្ធផលដែលពួកគេសមទទួលបានព្រោះការប្រឹងប្រែងរបស់ពួកគេ។
សរុបពិន្ទុបណ្ដោះអាសន្នពូល C អ៊ីរ៉ាក់មាន១១ពិន្ទុ ឈរកំពូលតារាងពីលើបារ៉ែនមាន៩ពិន្ទុ។ អ៊ីរ៉ង់ស្ថិតនៅលេខ៣មាន៦ពិន្ទុ។ ហុងកុងឈរលេខ៤មា៥ពិន្ទុ ខណៈកម្ពុជា ស្ថិតនៅបាតតារាងមាន១ពិន្ទុ៕
