ភ្នំពេញ៖ ត្រីរ៉ស់ ត្រីឆ្តោ ជាប្រភេទត្រីដែលច្បាប់ហាមឃាត់នាំចូល កំពុងក្លាយជាមុខជំនួញរបស់ឈ្មួញធំៗ ក្នុងស្រុក និងឈ្មួញវៀតណាមជាច្រើននាក់ ដោយពួកគេនាំចូលតាមរថយន្តធំៗពីប្រទេសវៀតណាមតាមច្រកទ្វារអន្តរជាតិភ្នំដិនខេត្តតាកែវ, ច្រកទ្វារជ្រៃធំខេត្តកណ្តាល, ច្រកទ្វារអន្តរជាតិបន្ទាយចក្រីខេត្តព្រៃវែង និងច្រករបៀងស្អំខេត្តត្បូងឃ្មុំ គឺជ្រកក្រោមអាជ្ញាប័ណ្ណរបស់រដ្ឋបាលជលផល យកមកបោះដុំនៅទីក្រុងភ្នំពេញ និងបន្តចែកចាយតាមបណ្តាខេត្តនានា ទូទាំងប្រទេស ។
ប្រភពព័ត៌មានពីអ្នករកស៊ីលក់ត្រីបានឲ្យដឹងថា បច្ចុប្បន្ននេះ មេឈ្មួញជនជាតិវៀតណាមបានសហការជាមួយឈ្មួញក្នុងប្រទេសកម្ពុជា មួយចំនួនទទួលបានអាជ្ញាប័ណ្ណពីរដ្ឋបាលជលផល នាំចូលត្រីចិញ្ចឹមជាប្រភេទត្រីអណ្តែង ត្រីក្រាញ់ ត្រីឆ្ពិន និងត្រីទីឡាព្យ៉ា (ជាប្រភេទត្រីសរ) ពីប្រទេសវៀតណាម ដើម្បីយកមកលក់ផ្តាច់មុខនៅភ្នំពេញ និងមានការឃុបឃិតគ្នាជាមួយសមត្ថកិច្ចច្រកទ្វារព្រំដែនទាំងអស់ ដោយគ្មានធ្វើការបង់ពន្ធគយនោះទេ ។
នៅទីក្រុងភ្នំពេញ មានយឿត្រីធំៗចំនួន៤ ដែលមានទីតាំងស្ថិតនៅច្បារអំពៅ ច្រាំងចំរេះ គីឡូម៉ែត្រលេខ១០ ស្វាយប៉ាក និងផ្សារព្រែកព្នៅ ។ ជារៀងរាល់ថ្ងៃ ឈ្មួញទាំងនោះ តែងតែបាននាំត្រីឆ្តោ ត្រីរ៉ស់ និងត្រីចាប បន្លំជាមួយត្រីជាច្រើនប្រភេទទៀតដាក់ក្នុងកេសដែក ដឹកតាមរថយន្តធុនធំរាប់សិបគ្រឿងមកចែកចាយតាមយឿនីមួយៗ ដើម្បីបែងចែកលក់បន្តនៅតាមទីផ្សារក្នុងរាជធានីភ្នំពេញ និងបណ្តាខេត្តនានា ។
ប្រភពព័ត៌មានបានឲ្យដឹងទៀតថា ដើមរដូវបិទនេសាទឆ្នាំនេះ មានឈ្មួញនជនជាតិវៀតណាមបានសហការជាមួយឈ្មួញក្នុងប្រទេស គេស្គាល់ថា ជាឈ្មួញមុខដដែលៗនោះ ទទួលបានអាជ្ញាប័ណ្ណនាំចូលត្រីផ្តាច់មុខ តែងឃុបឃិតជាមួយមន្ត្រីជលផល និងមន្ត្រីសមត្ថកិច្ចតាមច្រកព្រំដែនទាំង៤ខាងលើ ជាពិសេសមិនបានធ្វើការបង់ពន្ធគយ ជូនរដ្ឋ ទាំងត្រីមានច្បាប់ អត់ច្បាប់ គេដឹងថាមន្ត្រីព្រំដែនទាំងអស់នោះ ជួយបង្កលក្ខណៈឲ្យឈ្មួញក្នុងស្រុក និងក្រៅស្រុក ប្រកបរបររកស៊ីយ៉ាងសុខស្រួលបំផុត ។
ជាមួយនឹងការសម្រុកដឹកត្រីយ៉ាងអនាធិបតេយ្យនេះ គេបានប៉ាន់ប្រម៉ានថា ប្រសិនបើ សមត្ថកិច្ចគយត្រួត ពិនិត្យ និងធ្វើការវាយតម្លៃពន្ធឲ្យបានត្រឹមត្រូវ ពិតជាបង្កើននូវចំណូលពន្ធរដ្ឋបានយ៉ាងច្រើនថែមទៀត ហើយមិនត្រូវទុកឲ្យមន្ត្រីខិលខូចឃុបឃុតប្រព្រឹត្តអំពើពុករលួយជាមួយឈ្មួញបន្តទៀតឡើយ ៕ ដោយ៖សុផាន់
