ហុងកុង ៖ មេដឹកនាំហុងកុងលោកស្រី Carrie Lam កាលពីថ្ងៃអង្គារបានច្រានចោលការផ្តល់សម្បទានបន្ថែមទៀតដល់ចលនាគាំទ្រលទ្ធិប្រជាធិបតេយ្យរបស់ទីក្រុងនេះមុនដំណើរទស្សនកិច្ចចុងសប្តាហ៍របស់លោកស្រីទៅកាន់ទីក្រុងប៉េកាំង បើទោះបីជាបរាជ័យក្នុងការបោះឆ្នោត និងការហែក្បួនតវ៉ាទ្រង់ទ្រាយធំក៏ដោយ។
ចលនានេះដែលសម្គាល់ជាខួប៦ខែរបស់ខ្លួនកាលពីថ្ងៃចន្ទគឺពីដំបូងឡើយត្រូវបានបង្កឡើងដោយការប៉ុនប៉ងអនុញ្ញាតឲ្យមានការធ្វើបត្យាប័នទៅកាន់ចិនដីគោក ប៉ុន្តែចាប់តាំងពីពេលនោះមកបានប្រែក្លាយទៅជាការបះបោរប្រឆាំងនឹងការគ្រប់គ្រងរបស់ទីក្រុងប៉េកាំង។
នៅក្នុងភាពស្ងប់ស្ងាត់ដ៏កម្រក្នុងការប៉ះទង្គិចគ្នារវាងប៉ូលិស និងបាតុករ មនុស្សប្រមាណ៨០០,០០០នាក់បានដើរក្បួនដោយសន្តិវិធីនៅតាមដងផ្លូវក្នុងទីក្រុងកាលពីថ្ងៃអាទិត្យដោយជំរុញឲ្យរដ្ឋាភិបាលឆ្លើយតបទៅនឹងការទាមទារ៥ចំណុចរបស់ពួកគេដែលរួមបញ្ចូលទាំងការស៊ើបអង្កេតឯករាជ្យមួយទៅលើប៉ូលិសការលើកលែងទោសដល់អ្នកដែលត្រូវបានចាប់ខ្លួន និងរៀបចំការបោះឆ្នោតដោយសេរីផងដែរ។
ការបញ្ចប់អំពើហិង្សាគឺជាអ្វីដែលថ្នាក់ដឹកនាំរបស់ទីក្រុងនេះបានទទូចថាត្រូវតែជាកត្តាសំខាន់ក្នុងកិច្ចពិភាក្សាប្រកបដោយអត្ថន័យប៉ុន្តែនៅក្នុងសន្និសីទសារព័ត៌មានប្រចាំសប្តាហ៍របស់លោកស្រីកាលពីថ្ងៃអង្គារ លោកស្រី Lam បានបដិសេធទទួលយកការទាមទារបន្ថែមទៀតរបស់ក្រុមបាតុករចំពោះការដកសេចក្តីព្រាងច្បាប់ស្តីពីការធ្វើបត្យាប័ន។
លោកស្រីនិយាយថា “ប្រសិនបើតម្រូវការជាក់លាក់ទាមទារឲ្យយើងងាកចេញពីច្បាប់នោះ ខ្ញុំមិនអាចយល់ស្របនឹងទទួលយកការទាមទារទាំងនោះបានទេ”។ លោកស្រី Lam បានអះអាងថា ការលើកលែងទោសដល់អ្នកដែលត្រូវបានចាប់ខ្លួនគឺនឹងរំលោភលើស្មារតីនៃនីតិរដ្ឋ។
គួរបញ្ជាក់ថា ក្នុងចំណោមមនុស្សជាង៦,០០០នាក់ដែលត្រូវបានចាប់ខ្លួនចាប់តាំងពីខែមិថុនាមកនោះគឺមាន៤០ភាគរយជានិស្សិត៕
