ភ្នំពេញ៖ នៅវិមានរដ្ឋសភា នាព្រឹកថ្ងៃទី៨កក្កដានេះ អ្នកតំណាងរាស្ត្រគណបក្សសង្គ្រោះជាតិ បានដើរចេញពីអង្គសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល។
វេទិកានេះ ក្រោមអធិបតីភាពលោក ហេង សំរិន ប្រធានរដ្ឋសភា ដោយមិនត្រូវបានអនុញ្ញាតឲ្យបុគ្គលិកអង្គការសង្គមស៊ីវិល និងអ្នកកាសែតមួយចំនួនចូលរួមនោះទេ។
សេចក្តីព្រាងកម្មវិធីសិក្ខាសាលា បានបង្ហាញថា អង្គសិក្ខាសាលា បើកឱកាសរយៈពេល ៤៥នាទី ចាប់ពីម៉ោង ៩:១៥នាទី ដល់ម៉ោង ១០:0០នាទី ដើម្បីឲ្យមហាជន សួរសំណួរ ឬបញ្ចេញមតិយោបល់ ចំណែកគណៈអធិបតីមានពេល៣០នាទីដើម្បីឆ្លើយនឹងសំណួរ។
លោក ឈាង វុន ប្រធានគណៈកម្មការទី៥ នៃរដ្ឋសភា និងជាអ្នកនាំពាក្យរដ្ឋសភា បានមានប្រសាសន៍ថា រដ្ឋសភា អនុម័តដោយគ្មានឧបស័គ្គអ្វីទេ ព្រោះថារដ្ឋសភា ត្រូវការសំឡេងអនុម័តយ៉ាងតិចបំផុត ត្រឹមតែ ៥០% បូក ១ប៉ុណ្ណោះ។
គួររំលឹកថា បន្ទាប់ពីសិក្ខាសាលា គឺនៅរសៀលថ្ងៃទី០៨ ខែកក្កដា ឆ្នាំ២០១៥ គណៈកម្មការជំនាញរដ្ឋសភាទាំង៣ ដែលទទួលបន្ទុកពិនិត្យ និងសិក្សាសេចក្តីព្រាងច្បាប់សមាគម និងអង្គការក្រៅរដ្ឋាភិបាល នឹងជួបប្រជុំជាមួយ តំណាងរាជរដ្ឋាភិបាល ហើយនៅថ្ងៃទី១០កក្កដា ខាងមុខ រដ្ឋសភានឹងបើកកិច្ចប្រជុំពេញអង្គដើម្បីពិភាក្សា និងអនុម័តលើសេចក្តីព្រាងច្បាប់នេះជាស្ថាពរ៕ ដោយ៖បូរ៉ាស៊ី
