ម៉ាកាវ ៖ ប្រធានាធិបតីចិនលោក Xi Jinping បានចាប់ផ្តើមដំណើរទស្សនកិច្ចរយៈពេល៣ថ្ងៃទៅកាន់មជ្ឈមណ្ឌលល្បែងម៉ាកាវនៅថ្ងៃពុធដើម្បីប្រារព្ធខួប២០ឆ្នាំនៃការប្រគល់ទីក្រុងនេះមកឲ្យប្រទេសចិនខណៈមានការរឹតបន្តឹងសន្តិសុខហើយអ្នកកាសែតមួយចំនួនត្រូវបានរារាំងមិនឲ្យចូលស្របពេលការតវ៉ាបានកើតឡើងនៅក្នុងទីក្រុងហុងកុងដែលស្ថិតនៅក្បែរនោះ។
ដំណើរទស្សនកិច្ចរបស់លោក Xi ទៅកាន់អតីតអាណានិគមព័រទុយហ្កាល់មួយនេះត្រូវបានគេមើលឃើញថាជារង្វាន់សម្រាប់ស្ថេរភាពនិងភាពស្មោះត្រង់របស់ម៉ាកាវមិនដូចអតីតអាណានិគមអង់គ្លេសគឺទីក្រុងហុងកុងទេដែលត្រូវរង្គោះរង្គើដោយការតវ៉ាប្រឆាំងនឹងរដ្ឋាភិបាលអស់រយៈពេលប្រាំមួយខែមកហើយ។
លោក Xi ត្រូវបានគេរំពឹងថានឹងប្រកាសអំពីវិធានការនានាសម្រាប់ទីក្រុងម៉ាកាវក្នុងគោលបំណងពង្រីកសេដ្ឋកិច្ចដែលពឹងផ្អែកលើកាស៊ីណូរបស់ខ្លួនឲ្យក្លាយទៅជាមជ្ឈមណ្ឌលហិរញ្ញវត្ថុរួមទាំងផ្សារហ៊ុនថ្មីដែលគ្របដណ្តប់ដោយប្រាក់យ័នផងដែរ។
បណ្តាញផ្សព្វផ្សាយ RTHK បាននិយាយនៅលើគេហទំព័ររបស់ខ្លួនថា អ្នកកាសែតហុងកុងមួយចំនួនរួមទាំងអ្នកយកព័ត៌មានរបស់ RTHK ផងដែរត្រូវបានរារាំងមិនឲ្យចូលទៅទីក្រុងម៉ាកាវនៅសប្តាហ៍នេះដោយសារបញ្ហាសន្តិសុខ។
អ្នកសារព័ត៌មានរ៉យទ័របានឲ្យដឹងថា អ្នកកាសែតជាច្រើននាក់ទៀតត្រូវប្រឈមមុខនឹងការសួរដេញដោលយ៉ាងយូរហើយថតអត្តសញ្ញាណប័ណ្ណរបស់ពួកគេនៅពេលពួកគេមកដល់ទីក្រុងនេះ។យ៉ាងណាក្តី រដ្ឋាភិបាលម៉ាកាវមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
ដំណើរទស្សនកិច្ចរបស់លោក Xi ដែលជាដំណើរទស្សនកិច្ចផ្លូវការយូរបំផុតរបស់លោកទៅកាន់ទីក្រុងម៉ាកាវគឺនឹងរួមមានទាំងកិច្ចប្រជុំជាមួយមន្ត្រីរដ្ឋាភិបាលនិងអ្នកតំណាងធុរកិច្ចក៏ដូចជាពិធីស្បថចូលកាន់តំណែងរបស់មេដឹកនាំម៉ាកាវថ្មីលោក Ho Iat-seng នៅថ្ងៃសុក្រផងដែរ។ ទីក្រុងម៉ាកាវត្រូវបានប្រគល់ឲ្យប្រទេសចិនគ្រប់គ្រងវិញនៅថ្ងៃទី២០ខែធ្នូឆ្នាំ១៩៩៩ជាមួយរូបមន្ត “ប្រទេសមួយ ប្រព័ន្ធពីរ” ដូចហុងកុងដែរដើម្បីការពារស្វ័យភាព៕
