ភ្នំពេញ៖ នាង ឯក សុជាតា ហៅសាសា អតីតពិធីការិនីទូរទស្សន៍ CTN នៅថ្ងៃទី៩ កក្កដា នេះ បានបង្ហាញរូបភាពនៃស្នាមរបួសយ៉ាងធ្ងន់ធ្ងរ និងច្រើនកន្លែងដោយបញ្ជាក់ថា នាងគ្រោងទៅព្យាបាលជំងឺនៅបរទេស ហើយរឿងអំពើហិង្សានេះ ទោះបីជាយ៉ាងណា ក៏នាងនៅតែរក្សាជំហ ប្តឹងឧកញ៉ា សុខ ប៊ុន ដដែល។
រូបភាពជាច្រើនសន្លឹកដែលត្រូវបានចែកចាយនៅរសៀលថ្ងៃនេះ បានបង្ហាញពីស្នាមរបួសលើផ្ទៃមុខរបស់នាងសាសា ដែលឡើងហើម ជាំភ្នែកខាងស្តាំ និងរបួសលើដងខ្លួនជាច្រើនកន្លែងទៀត។ក្រៅពីរូបភាពនៃរបួស នាងសាសា ក៏បានឲ្យដឹងពីអាការៈហ៊ឹងត្រចៀកខាងឆ្វេង ឈឺក្បាលយ៉ាងខ្លាំងទៀតផង។
នាង សាសា បានបញ្ជាក់ប្រាប់អ្នកសារព័ត៌មាននៅថ្ងៃទី៩ កក្កដា នេះថា ប្រសិនបើរបួសលើផ្ទៃមុខរបស់នាងនៅបន្តហើម និងឈឺចាប់ខ្លាំងទៀតនោះ នាងនឹងចេញទៅព្យាបាលជំងឺនៅប្រទេសថៃ ប៉ុន្តែមិនទាន់កំណត់នៅពេលណានោះទេ។
ឧកញ៉ា សុខ ប៊ុន ត្រូវគេដឹងថាបានចាកចេញពីកម្ពុជាភ្លាមៗទៅប្រទេសសឹង្ហបូរី ក្រោយពីមានករណីហិង្សាដោយចេតនាកើតឡើងលើអតីតពិធីការិនីទូរទស្សន៍ CTN នាង សាសា រួចមក។
គួររំលឹកថា កាលពីព្រឹកថ្ងៃទី៨កក្កដា ឆ្នាំ២០១៥ វីដេអូឃ្លីបមួយ រយៈពេលជាង១នាទី ត្រូវបានគេបង្ហោះតាមប្រព័ន្ធអេឡិចត្រូនិកហ្វេសប៊ុកជាសាធារណៈដែលបង្ហាញឲ្យឃើញពីសកម្មភាពដ៏កាចសាហាវឃោរឃៅ ដែលមជ្ឈដ្ឋានទូទៅគិតថាបង្កឡើងដោយឧកញ៉ា សុខ ប៊ុន បានវាយយ៉ាងកម្រោលទៅលើនាង សាសា អតីតពិធីការិនីស្ថានីយទូរទស្សន៍ CTN។នាង សាសា ក៏ត្រូវគេចាប់បោចសក់អូស ទាត់ធាក់ និងមានអង្គរក្សម្នាក់ទៀតបានអាម៉េកាំភ្លើងខ្លីកាន់ជាប់នឹងដៃ ដើម្បីគំរាមជនរងគ្រោះទៀតផង។ខណៈនោះ មានអ្នកបម្រើការក្នុងហាងម្នាក់តាមជួយឃាត់ជាច្រើនលើក ប៉ុន្តែឧកញ៉ា សុខ ប៊ុន និងអង្គរក្ស នៅតែបន្តសកម្មភាពវាយអូសនាង សាសា ពីសាឡុងអង្គុយរួមគ្នា ទម្លាក់លើកម្រាលឥដ្ឋបណ្តាលឲ្យរហែកអាវ នៅសល់តែខោខ្លី។
នាង សាសា បានប្រាប់ឲ្យដឹងថា « គ្រាន់តែកើតហេតុភ្លាម ខ្ញុំទៅប្ដឹងនៅការិយាល័យព្រហ្មទណ្ឌនៅក្រសួងមហាផ្ទៃភ្លាម កាលពីព្រឹកថ្ងៃទី២ កក្កដា វេលាម៉ោង៨ព្រឹក ប៉ុន្តែពួកគាត់អត់ឃើញហៅខ្ញុំទៅដោះស្រាយអីទេ ទើបប៉ាខ្ញុំគាត់ទៅប្ដឹងម្ដងទៀត ហើយក្រោយពីបានបង្ហោះវីដេអូឃ្លីបហ្នឹង ទើបឃើញថាមានការភ្ញាក់ផ្អើល »។
នាងទទួលស្គាល់ហេតុការណ៍ដែលនាំឲ្យកើតជម្លោះ គឺបណ្ដាលមកពីកំហុសពាក្យសម្ដីម្ខាងៗ ប៉ុន្តែនាងយល់ថាអំពើហិង្សាដែលជនល្មើសបានបង្កចំពោះខ្លួន គឺមិនអាចទទួលយកបាន ទើបគ្មានការសម្រុះសម្រួល។ ក្នុងពេលកើតរឿង នាងមិនបានដឹងថាបុរសដែលបានបង្កហេតុ គឺជាឧកញ៉ានោះទេ គឺរហូតទាល់តែចប់សព្វគ្រប់ ទើបមានការបញ្ជាក់ថាលោក គឺជាឧកញ៉ាសុខ ប៊ុន ដែលជាអ្នកជំនួញវ៉ាល់លាន និងមានក្រុមហ៊ុនរាប់មិនអស់ក្នុងដៃ។ ទោះយ៉ាងណាក៏ដោយ នាងអះអាងថាមិនខ្លាចចំពោះសុវត្ថិភាពនោះទេ គឺនៅតែរក្សាជំហរបន្តពាក្យបណ្ដឹងរហូតជនដែលបង្កស្នាម របួសចំពោះខ្លួន ទទួលទោសតាមច្បាប់។
អតីតតារារូបនេះនិយាយថា៖« ក្រោយពេលដឹងថាខ្ញុំដាក់ពាក្យបណ្ដឹង ខាងគាត់សុំសម្រួល ប៉ុន្តែប៉ាខ្ញុំគាត់ដាច់ខាតអត់ទទួលទេ ជាក់ស្ដែងពេលគាត់បានមើលវីដេអូឃ្លីបហ្នឹងហើយ គាត់កាន់តែពុះកញ្ជ្រោលចង់រក ខុសរកត្រូវ ព្រោះវាសាហាវពេក ឥឡូវហ្នឹងខ្ញុំបានឆ្លើយទៅគាត់(អ្នកទាក់ ទងសម្រួល)ថាបើចង់ សម្រួលទៅសម្រួលជាមួយប៉ាខ្ញុំទៅ ហើយខ្ញុំនិយា យអញ្ចឹងព្រោះខ្ញុំដឹងថាប៉ាខ្ញុំគឺគាត់អត់ដាច់ខាតសម្រាប់រឿងហ្នឹង ។
សូមរំលឹកផងដែរថា ហេតុការណ៍អំពើហិង្សាខាងលើនេះកើតឡើងពេលរំលងអាធ្រាត្រឈានចូលថ្ងៃទី២ ខែកក្កដា ឆ្នាំ២០១៥ កន្លងមកនេះនៅក្នុងក្លឹបកម្សាន្ត ស្ថិតក្ន្ងសង្កាត់ទន្លេបាសាក់ ខណ្ឌចំកាមន រាជធានីភ្នំពេញ ប៉ុន្តែរឿងនេះ ទើបត្រូវបានបែកធ្លាយនៅព្រឹកថ្ងៃទី៨ ខែកក្កដា តាមរយៈការទម្លាយជាសាធារណៈនូវរូបភាពវីដេអូឃ្លីបនៃកាមរ៉ាសុវត្ថិភាពដែលគេចាប់ភ្ជាប់នៅក្នុងហាងនោះ។
ឧកញ៉ា សុខ ប៊ុន គឺជាប្រធានក្រុមហ៊ុន TEHO Development និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា គឺជាអ្នកមានទ្រព្យសម្បតិ្តដ៏ស្តុកស្តម្ភ និងជាអ្នកជំនួញមួយរូប ដែលបានបណ្តាក់ទុនលើទឹកប្រាក់ ៥០០ លានដុល្លារ លើគម្រោងសាងសង់នៅជ្រោយចង្វា។
ក្រោយពេលកើតហេតុនាង សាសា ដាក់ពាក្យប្តឹងហើយតុលាការសាលាដំបូងរាជធានីភ្នំពេញ ក៏បានចេញដីកាបង្គាប់ឲ្យលោកឧកញ៉ា សុខ ប៊ុន ចូលខ្លួន ទៅឆ្លើយបំភ្លឺនៅល្ងាចថ្ងៃទី៨ ខែកក្កដា នេះដែរ ប៉ុន្តែកាលពីរសៀលម្សិលមិញដល់ពេលកំណត់ហើយ គេមិនឃើញឧកញ៉ា សុខ ប៊ុន ចូលខ្លួនតសមដីកាកោះនោះទេ ធ្វើឲ្យអ្នកសារព័ត៌មានជាតិ និងអន្តរជាតិជាច្រើននាក់ដែលខំរង់ចាំមានការខកចិត្ត។ រហូតមកដល់ល្ងាចថ្ងៃទី៩ ខែកក្កដា នេះ សមត្ថកិច្ចនៅតែបន្តស្វែងរកឧកញ៉ា សុខ ប៊ុន និងអង្គរក្សនៅឡើយ៕ដោយ៖រដ្ឋា
