ម៉ិចស៊ីកូ ៖ ជម្លោះប្រយុទ្ធគ្នាដ៏ហិង្សាមួយបានផ្ទុះឡើងនៅក្នុងពន្ធនាគារ មួយកន្លែង ស្ថិតនៅរដ្ឋ Zacatecas នៃភាគខាងជើងប្រទេសម៉ិចស៊ីកូបណ្តាលឲ្យអ្នកទោសយ៉ាងហោច១៦នាក់បានស្លាប់ និង៥នាក់ផ្សេងទៀតរងរបួស។ នេះបើតាមទីភ្នាក់ងារព័ត៌មានចិនស៊ីនហួរ

បើតាមអាជ្ញាធរបានឲ្យដឹងថា ជម្លោះរវាងអ្នកទោសមកពីក្រុមផ្សេងៗគ្នាបានកើតឡើង នៅម៉ោងប្រមាណ២៖៣០នាទីរសៀល កាលពីថ្ងៃអង្គារកន្លងទៅ នៅឯពន្ធនាគារក្នុងទីក្រុង Cieneguillas ស្ថិតនៅចម្ងាយ១៣គីឡូម៉ែត្រ រដ្ឋ Zacatecas។ ក្នុងចំណោមអ្នកទោសស្លាប់ទាំង១៦នាក់ មាន១៥នាក់ស្លាប់នៅក្នុងពន្ធនាគារ និងម្នាក់ទៀតស្លាប់នៅមន្ទីរពេទ្យ។ ចំណែកអ្នករងរបួស៥នាក់ស្ថិតនៅក្នុងស្ថាននឹងនរឡើងវិញ ខណៈអាជ្ញាធរម៉ិចស៊ីកូកំពុងធ្វើការស៊ើបអង្កេតលើករណីហិង្សានេះ។

បើតាមប៉ូលិសម៉ិចស៊ីកូ អ្នកទោសម្នាក់ត្រូវបានចាប់ខ្លួនជាមួយកាំភ្លើងមួយដើម ហើយពួកគេបានរកឃើញកាំភ្លើងបីដើមទៀត ព្រមទាំងកូនកាំបិតជាច្រើននៅក្នុងពន្ធនាគារ។ ប៉ូលិសបញ្ជាក់ទៀតថា កាំភ្លើង និងអាវុធទាំងនេះទំនងជាត្រូវបានគេនាំចូលក្នុងពន្ធនាគារអំឡុងពេលសួរសុខទុក្ខអ្នកទោស នាឱកាសថ្ងៃចូលឆ្នាំសកល៕