ខេត្តកោះកុង៖សម្រាប់អ្នកខេត្តកោះកុងអ្នកណាក៏ស្គាល់ឈ្មោះ ចែង៉ែតៗ ដែរ ព្រោះគាត់គឺជាឈ្មួញរកស៊ីនាំទំនិញខុសច្បាប់ពីប្រទេសថៃឆ្លងកាត់ ច្រកបាក់ខ្លងជាច្រើនឆ្នាំមកហើយគ្មានសមត្ថកិច្ច ឬមន្ត្រីជំនាញណាហ៊ានប៉ះពាល់ឡើយ។នេះបើតាមមន្ត្រីអាជ្ញាធរមួយរូបបានអះអាងប្រាប់កាលពីដើមសប្តាហ៍កន្លងមកនេះ។
មន្ត្រីដដែលបានបន្តថា មូលហេតុដែលអាចឲ្យចែង៉ែត អាចរកស៊ីខុសច្បាប់បានដោយស្រួលគឺដោយសារគាត់ចេះចែករំលែកផលប្រយោជន៍ទៅឲ្យសមត្ថកិច្ច និងមន្ត្រីជំនាញទាំងអស់នោះតាមទម្លាប់ជាប្រចាំ។ រាល់ទំនិញរបស់ចែង៉ែតដឹកជញ្ជូនជាចំហតាមទូកចូលមកកាន់ដងព្រែក កោះប៉ោ ស្ថិតក្នុងភូមិ២ សង្កាត់ស្មាច់មានជ័យ ក្រុងខេមរភូមិន្ទ និងបន្តលើកដាក់លើរថយន្តយកទៅស្តុកទុកសម្រាប់បោះដុំលក់ឲ្យឈ្មួញកណ្តាលនៅក្នុងខេត្តកោះកុង និងមួយចំនួនទៀតដឹកយកមកភ្នំពេញ ឬតាមបណ្តាខេត្តផ្សេងៗផងដែរ។
ប្រភពដដែលបន្តថា ចែង៉ែត ត្រូវបានគេតក់សម្គាល់ថា ជារៀងរាល់ថ្ងៃគាត់បានធ្វើការដឹកជញ្ជូនទំនិញជាច្រើនមុខរាប់តោនពីប្រទេសថៃមកកម្ពុជាក្នុងខេត្តកោះកុងតាមច្រកបាក់ខ្លង ហើយរាល់ការដឹកជញ្ជូនម្តងៗមានភាពរលូនខ្លាំងណាស់មិនញញើតសមត្ថកិច្ចឬមន្ត្រីជំនាញនោះឡើយ។ រីឯរដ្ឋបាត់បង់ចំណូលពន្ធយ៉ាងច្រើនសន្ធឹកសន្ធាប់ពីការនាំចូលទំនិញ មិនស្របច្បាប់របស់ចែង៉ែតនេះ។
លោក ជឿ សាវុន ប្រធានការិយាល័យគយ និងរដ្ឋាករច្រកបាក់ខ្លង និងលោក ប៉ាង វណ្ណថន ប្រធានសាខាគយ និងរដ្ឋាករខេត្តកោះកុង អាចជាអ្នកទទួលខុសត្រូវធំជាងគេចំពោះការបាត់បង់ចំណូលថវិកាជាតិ ដោយសារតែភាពធូររលុងអនុញ្ញាតឲ្យចែង៉ែតនាំចូលទំនិញគេចពន្ធតាមទំនើងចិត្តមិន ធ្វើការបង្ក្រាបបែបនេះ។
លោក ជឿ សាវុន និងលោក ប៉ាង វណ្ណថន មិនអាចទំនាក់ទំនងសុំការពន្យល់បានទេកាលពីថ្ងៃទី១០ ខែកក្កដា ឆ្នាំកន្លងមកនេះ៕
ដោយ៖ពេជ្ជ សុគន្ធ
