ហ្វីលីពីន ៖ សេចក្តីថ្លែងការណ៍មួយដែលចេញដោយក្រុមប្រឹក្សាជាតិប៉ារ៉ាឡាំពិកថ្នាក់ជាតិរបស់ប្រទេសសិង្ហបុរី (SNPC) បាននិយាយកាលពីថ្ងៃសុក្រទី១៤ ខែកុម្ភៈថា ព្រឹត្តិការណ៍អាស៊ានប៉ារ៉ាហ្គេមនៅប្រទេសហ្វីលីពីនត្រូវបានពន្យារពេលដោយគ្មានកំណត់។ នេះបើយោងតាមប្រភពពី straitstimes។
សហព័ន្ធកីឡាអាស៊ានប៉ារ៉ាបូល (APSF) និងគណៈកម្មាធិការរៀបចំ របស់ហ្វីលីពីនបានធ្វើសេចក្ដីប្រកាសថា ការរៀបចំព្រឹត្តិការណ៍នេះឡើងវិញដើម្បីផលប្រយោជន៍និងសុខុមាលភាពសុខុមាលភាពរាងកាយ និងអារម្មណ៍របស់អត្តពលិកប៉ារ៉ានិងបុគ្គលិកកីឡាទាំងអស់ដែលចូលរួម។
សេចក្ដីថ្លែងការណ៍នេះគឺបន្ទាប់ពីអនុសាសន៍របស់គណៈកម្មការកីឡាហ្វីលីពីន (PSC) កាលពីថ្ងៃព្រហស្បតិ៍សប្តាហ៍មុនដើម្បីផ្លាស់ប្តូរព្រឹត្តិការណ៍នេះទៅថ្ងៃក្រោយ។ នេះជាលើកទី២ហើយដែល APG ត្រូវបានពន្យារពេលដោយអ្នករៀបចំកម្មវិធីបានប្រកាសកាលពីខែធ្នូមុនថា ខ្លួននឹងត្រូវផ្លាស់ប្តូរពីថ្ងៃទី ១៨-២៤ ខែមករាដល់ថ្ងៃទី ២០-២៨ ខែមីនាដោយសារកង្វះថវិកាសម្រាប់រៀបចំព្រឹត្តិការណ៍។
យោងតាមសេចក្តីថ្លែងការណ៍ APG គួរតែត្រូវបានធ្វើឡើងក្នុងរយៈពេលមួយឆ្នាំ។ ខណៈពេលដែលប្រធាន SNPC លោក Kevin Wong ទទួលស្គាល់ការពន្យាពេលដោយសារបញ្ហាកង្វល់ជុំវិញវិរុសកូរ៉ូណាថ្មី(COVID-19)ដែលកំពុងឆ្លងរាលដាលទូទាំងពិភពលោក។
សូមជម្រាបថា បើតាមតួលេខចុងក្រោយដោយរដ្ឋាភិបាលចិន ចំនួនអ្នកស្លាប់ដោយសារវីរុស COVID-19 កើនឡើងដល់ជិត១,៧៧០នាក់ ខណៈ ៧០,៥៤៨នាក់ឆ្លងនៅតាមបណ្តាខេត្ត និងតំបន់ចំនួន ៣១ ទូទាំងប្រទេសចិន៕
