កំពត ៖ កម្មករ កម្មការិនី ១៨៦នាក់ ក្នុងនោះប្រុសប្រមាណ២០នាក់ នៃរោងចក្រកាត់ដេរ ខេមបូ ធី ឌី ជី.Co.Ltdនៅព្រឹក ថ្ងៃទី១៤ ខែកក្កដា ឆ្នាំ២០១៥នេះ បានផ្ទុះការតវ៉ា រឿងខាងភាគី ក្រុមហ៊ុន របស់រោងចក្រខាងលើ បញ្ឈប់កម្មករ កម្មការិនី ៣៨នាក់ ដែលពពាក់ពពូនគ្នា ឈរនៅមុខទីតាំង រោងចក្រខាងលើ ស្ថិតក្នុងភូមិដើមពោធិ៍ ឃុំអង្គសុភី ស្រុកកំពង់ត្រាច ខេត្តកំពត ។
អាជ្ញាធរស្រុកកំពង់ត្រាច បានឲ្យដឹងថា កម្មករ កម្មការិនី ប្រមាណ១៨៦នាក់ ធ្វើការក្នុងរោងចក្រនេះ បានឈរប្រមូលផ្តុំគ្នា តវ៉ាជាមួយនឹងភាគីខាងរោងចក្រ ដើម្បីឲ្យកម្មករទាំង៣៨នាក់ ដែលក្រុមហ៊ុនទើបបានបញ្ឈប់ថ្មីនេះ ទទួលចូលធ្វើការជាធម្មតាវិញ ដោយគ្មានលក្ខខណ្ឌ ព្រោះពួកគេយល់ថា កម្មករទាំង៣៨នាក់នេះ គ្មានកំហុសអ្វីទាំងអស់ ។ ដោយឡែកខាងភាគីរោងចក្រវិញ មិនទាន់បានឆ្លើយតប មកឲ្យកម្មករតាមសំនូមពរវិញទេ។
មន្ត្រីដដែល បន្តថា មូលហេតុដែលរោងចក្របញ្ឈប់ ក្រុមអ្នកដេរចំនួន ៣៨នាក់ នៅក្នុងឡាញ ៧នេះ គឺ ដោយសារ ខាងរោងចក្រចោទកម្មករ ទាំង៣៨នាក់ខាងលើថា ទី១-ធ្វើឲ្យបាត់”ផ្ទាំងខោ ខាងក្រោយ “អស់ជាង ១០០០ខោ,ទី២-ដេរនិងផុងខោ អាវខុសជាច្រើន និងទី៣-ក្រណាត់ត្រូវគេលួចកាត់ ប្រហែល៧០អាវ។ ប្រធានរោងចក្រ លោកឈ្មោះយួន សាមហ៊ីយុន ភេទប្រុស អាយុ៥៥ឆ្នាំ ជនជាតិកូរ៉េ បានឲ្យដឹងថា កម្មករ កម្មការិនី ដែលធ្វើការក្នុងរោងចក្រនេះ សរុបប្រមាណ៥៩០នាក់ ក្នុងនោះប្រុស៧០នាក់ ហើយ បច្ចុប្បន្ន កម្មករកំពុងតែបន្តធ្វើការខាងក្នុង មានចំនួន៤០៤នាក់ ក្រៅពីនេះ បាននិងកំពុងតែឈរ តវ៉ានៅខាងមុខ រោងចក្រ។
លោកអ៉ឹង ប៉ូហេង ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត បានប្រាប់អ្នកយកព័តមានតាមទូរស័ព្ទ នៅវេលាម៉ោង១១និង២០នាទីថ្ងៃត្រង់ ទី១៤ ខែកក្កដា នេះថា ក្រោយពីបានទទួលព័ត៌មាន នូវ ករណីខាងលើនេះភ្លាម រូបលោកចាត់តាំងមន្ត្រីក្រោមឱវាត ក្នុងមន្ទីរ ដើម្បីចុះទៅធ្វើការសម្របសម្រួល ។ លោកបញ្ជាក់ទៀតថា ភាគីរោងចក្រ មិនគួរបញ្ឈប់កម្មករអស់ទាំងនោះទេ ពីព្រោះការបាត់ និងខូចខាតរបស់ គឺខាងរោចក្រអត់មានភ័ស្តតាងជាក់ ស្តែង សម្រាប់ចោទប្រកាន់នោះឡើយ៕ ដោយះអ៊ួង វរិន្ទ
