បាក់ពិដានសំណង់អគារផ្សារត្រពាំងថ្លឹង សង្កត់កម្មករម្នាក់ស្លាប់ របួស៣នាក់
ភ្នំពេញ៖ នៅវេលាម៉ោង៩:២០នាទី នាព្រឹកថ្ងៃទី១៥កក្កដានេះ មានករណីបាក់ស្រុត សំណង់អគារផ្សារត្រពាំងថ្លឹង កំពុងសាងសង់ ដែលមានទីតាំង លើផ្លូវវេងស្រេង នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ សង្កត់លើកម្មករបានស្លាប់ម្នាក់ និងរងរបួសធ្ងន់ស្រាល ៣នាក់។
សមត្ថកិច្ច បានឲ្យដឹងថាសមត្ថកិច្ច និងប្រជាពលរដ្ឋបាននាំគ្នាជួយសង្គ្រោះ ដោយនាំគ្នាទាញសពជនរងគ្រោះ ដែលស្លាប់មានឈ្មោះ វ៉ា សុខ អាយុ៥២ឆ្នាំ មានទីលំនៅភូមិកំពង់ពោ ឃុំកំពង់ភ្នំ ស្រុកលើកដែក ខេត្តកណ្តាល រីឯរងរបួសធ្ងន់ស្រាល ៣នាក់ ត្រូវបានដឹកយកទៅសង្គ្រោះ ទៅមន្ទីរពេទ្យរុស្សី។ហើយដំណើរការសាងសង់ ត្រូវបានអាជ្ញាធរ បញ្ជាអោយផ្អាកជាបន្ទាន់ ព្រមទាំងឃាត់ខ្លួនមេការ នៅទីនោះ ធ្វើការសួរនាំផងដែរ៕
