ខេត្តតាកែវ ៖ លោក ឥន្ធ សូថា អធិការ នគរបាលស្រុកអង្គរបុរី ត្រូវរងការរិះគន់យ៉ាងចាស់ដៃ រួមនិងការលាតត្រដាងពីសកម្មភាពនៃអំពើពុករលួយដោយប្រើឥទ្ធិពលជាមន្ត្រីមានសមត្ថកិច្ចទៅជំរិតយកលុយក្រុមអ្នកលេងល្បែងស៊ីសង និងមេកន្ទុយលេខក្នុងមូលដ្ឋានជាថ្នូរនឹងការដែលមិនបង្ក្រាប។អធិការនគរបាលស្រុកអង្គរបុរីលោក ឥន្ធ សូថា មិនអាចទាក់ទងសុំការពន្យល់បានទេកាលព្រឹកម៉ិញ។
ប្រជាពលរដ្ឋជាច្រើនភូមិក្នុងស្រុកអង្គរបុរី បានស្នើសុំ មេគង្គប៉ុស្តិ៍ ឲ្យផ្ញើសារអំពាវនាវទៅលោក អ៊ុក សំណាង ស្នងការនគរបាលខេត្តតាកែវ ជួយចាត់វិធានការលើលោក ឥន្ធ សូថា អធិការនគរបាលស្រុកអង្គរបុរីជាបន្ទាន់ផង ព្រោះលោក ឥន្ធ សូថា មិនយកចិត្តទុកដាក់ពង្រឹងសន្តិសុខ សណ្ដាប់ធ្នាប់សង្គម ឲ្យស្របទៅតាមគោលនយោបាយភូមិ-ឃុំមានសុវត្ថិភាពទាំង៩ចំណុចនោះឡើយ។
ពលរដ្ឋទាងនោះក៏បានលើកឡើងផងដែរថា លោក ឥន្ធ សូថា បានចាត់តាំងមន្ត្រីនគរបាលក្រោមឱវាទបួននាក់ដែលស្និទ្ធនឹងខ្លួនប្រដាប់ដោយកាំភ្លើងខ្លី១ដើម និងកាំភ្លើងវែង១ដើម ចុះទៅបង្ក្រាបវង់ល្បែងយាយៗលេងកំប៉ិចកំប៉ុកកម្សាន្តនៅក្រោមផ្ទះជំរិតយកលុយតាមអំពើចិត្ត។ ចំណែកវង់ល្បែងធំៗមិនត្រូវបានលោក ឥន្ធ សូថា បញ្ជាឲ្យកូនចៅឲ្យទៅបង្ក្រាបឡើយ ដោយតម្រូវឲ្យម្ចាស់វង់ល្បែងទាំងនោះ បង់លុយប្រចាំខែទៅវិញ ដែលជាហេតុធ្វើឲ្យល្បែងស៊ីសងរាលដាលកាន់តែខ្លាំងឡើង និងបង្កឲ្យកើតមាននូវអំពើចោរកម្ម ឆក់ប្លន់ជាបន្តបន្ទាប់។
ក្រុមប្រជាពលរដ្ឋដដែលបានឲ្យដឹងទៀតថា លោក ឥន្ធ សូថា បញ្ជាឲ្យកូនចៅក្រោមឱវាទបង្ក្រាបតែវង់ល្បែងដែលយាយៗលេងកំប៉ិចកំប៉ុកតាមភូមិហើយប្រកូកប្រកាសប្រាប់កាសែតទូរទស្សន៍ឲ្យជួយផ្សាយដើម្បីយកស្នាដៃបង្ហាញថ្នាក់លើ ដោយគ្មានសេចក្ដីអៀនខ្មាស។ ចំណែកកន្លែងកត់តន្ទុយលេខ ជាច្រើនទីតាំង និងសង្វៀនបញ្ជល់មាន់ ពីកន្លែងគឺទី១-នៅភូមិសាមគ្គី ឃុំអង្គរបុរី និងមួយកន្លែងទៀតនៅភូមិតាមូង ឃុំព្រៃផ្គាំ ស្រុកអង្គរបុរី អាចបើកលេងដោយសេរីគ្មាននរណាចាត់វិធានការទប់ស្កាត់ទាល់តែសោះ ទោះបីមានសេចក្ដីរាយការណ៍ពីប្រជាពលរដ្ឋក៏ដោយ។ បញ្ហានេះលោក អ៊ុក សំណាង ស្នងការនគរបាលខេត្តតាកែវ មិនត្រូវមើលរំលងតទៅទៀតទេ ព្រោះល្បែងស៊ីសងខុសច្បាប់ទាំងកន្ទុយលេខ និងបញ្ជល់មាន់ កំពុងរាតត្បាតពេញស្រុកអង្គរបុរី។
មេកន្ទុយលេខក្នុងស្រុកអង្គរបុរីមួយចំនួនសុំមិនបញ្ចេញឈ្មោះបានបង្ហើបឲ្យដឹងថា ក្នុងមួយខែៗ ពួកគេម្នាក់ៗត្រូវបង់លុយឲ្យលោក ឥន្ធ សូថា អធិការនគរបាលស្រុកអង្គរបុរី១០០ដុល្លារ ហើយនៅទូទាំងស្រុកមានមេកន្ទុយលេខមិនតិចជាង១០កន្លែងទេ ដូច្នេះ លោកអធិការនគរបាលស្រុកអាចរកចំណូលបានរាប់ពាន់ដុល្លារ។
ប្រជាពលរដ្ឋបានឲ្យដឹងទៀតថា កូនចៅរបស់លោក ឥន្ធ សូថា ដែលកំពុងដែលធ្វើសកម្មភាពយកលុយពីមេល្បែងស៊ីសង និងជំរិតយកលុយពីវង់ល្បែងយាយៗ ទី១-ឈ្មោះ ប៉ែន រដ្ឋា ហៅស្រួច ទី២-ឈ្មោះ ប៉ុក សារុំ ទី៣-ឈ្មោះ ង៉ែត សុធា និងទី៤-ឈ្មោះ កែវ កុសល។ មន្ត្រីនគរបាលទាំង៤នាក់នេះកំពុងដើរធ្វើសកម្មភាពជំរិតយកលុយពីវង់ល្បែងយាយៗ និងពីមេកន្ទុយលេខក៏ដូចជាម្ចាស់សង្វៀនបញ្ជល់មាន់ យ៉ាងអនាធិបតេយ្យដោយមិនគិតគូរពីផលប៉ះពាល់សន្តិសុខ និងសណ្ដាប់ធ្នាប់សង្គមឡើយ។
សារព័ត៌មាន មេគង្គប៉ុស្តិ៍ នៅព្រឹកថ្ងៃទី១៦ ខែកក្កដា នេះ មិនអាចទាក់ទងសុំការអធិប្បាយពីលោក ឥន្ធ សូថា អធិការនគរបាលស្រុកអង្គរបុរីបានទេ ចំណែកលោក អ៊ុក សំណាង ស្នងការនគរបាលខេត្តតាកែវ ក៏មិនអាចភ្ជាប់ប្រព័ន្ធទូរស័ព្ទបានដែរកាលរសៀលថ្ងៃនេះ៕ដោយ៖គង់ សុធារៈ
