ភ្នំពេញ៖ ក្រុមស្ត្រីក្នុងសហគមន៍បឹងកក់ បុរីកីឡា និងបុគ្គលិកអង្គការសង្គមស៊ីវិល ប្រមាណ ៦នាក់ នៅម៉ោងប្រមាណ ១១:០០នាទី ថ្ងៃត្រង់ថ្ងៃសៅរ៍ ទី១៨ ខែកក្កដា ឆ្នាំ២០១៥ នេះ ត្រូវបានអាជ្ញាធរឃាត់ខ្លួន ពេលដើរចែខិតប័ណ្ណប្រឆាំងនឹងច្បាបគ្រប់គ្រងអង្គការ និងសមាគម។
មន្ត្រីសមត្ថកិច្ចបានឲ្យដឹងថា ការឃាត់ខ្លួនស្ត្រីទាំងនោះ ដោយសារតែពួកគេ ដើរចែកខិតប័ណ្ណ ដែលមានអត្ថន័យជំទាស់នឹងសេចក្តីព្រាងច្បាប់សមាគម និងអង្គការមិនមែនរដ្ឋាភិបាល នៅផ្លូវខាងក្រៅផ្សារអូឫស្សី ដោយអនាធិបតេយ្យ និងគ្មានច្បាប់ទម្លាប់។
ប្រភបដដែលបន្តឲ្យដឹងថា មនុស្សដែលត្រូវឃាត់ខ្លួននោះ រួមមាន ទី១-អ្នកស្រី ទេព វន្នី ទី២-អ្នកស្រីគង់ ចន្ថា ទី៣-អ្នកស្រី បូវ សោភា ទី៤-អ្នកស្រី សុង ស្រីលាភ ទី៥-អ្នកស្រី ឆាយ គឹមហ៊ន និងទី៦-អ្នកស្រី ឈាង ស្រីវ៉ាន់ ។
ក្រោយពីឃាត់ខ្លួន ស្ត្រីទាំង ៦រូបនោះ ត្រូវបានបញ្ជូនទៅកាន់ប៉ុស្តិ៍នគរបាលសង្កាត់អូឫស្សី២ ។ សកម្មជនអង្គការសិទ្ធិមនុស្សលីកាដូ និងអង្គការអាដហុក កំពុងតាមដានការឃាត់ខ្លួនស្ត្រីទាំងអស់នោះ ។
លោក អំ សំអាត សកម្មជនសិទ្ធិមនុស្សអង្គការលីកាដូ ដែលស្ថិតនៅប៉ុស្តិ៍នគរបាល បានអះអាងថា នគរបាលប៉ុស្តិ៍មិនបានដឹងរឿងនៃការឃាត់ខ្លួននោះទេ ហើយបានសួរនាំក្រុមស្ត្រីទាំង ៦នាក់ មុននឹងដោះលែងទៅវិញ ។
លោក អំ សំអាត ក៏បានបញ្ជាក់ថា នៅព្រឹកថ្ងៃសៅរ៍ ទី១៨កក្កដានេះ ក្រុមអង្គការសង្គមស៊ីវិល និងសហគមន៍ដីធ្លីប្រមាណជាង ៥០នាក់ នាំគ្នាដើរចែកចាយប័ណ្ណ ដែលមានសារជាអក្សរប្រឆាំងនឹងច្បាប់សមាគម និងអង្គការមិនមែនរដ្ឋាភិបាល នៅតាមផ្សារចាស់ និងផ្សារថ្មី មិនមានការរារាំងណាមួយពិសមត្ថកិច្ចនោះឡើយ ។
ទោះយ៉ាណាក្តី ការប្រឆាំងជំទាស់នឹងការអនុម័ត ច្បាប់គ្រប់គ្រងអង្គការ សមាគម មិនមែនរដ្ឋាភិបាលមិនអាចនាំគ្នាធ្វើនៅតាមទីសាធារណនោះទេ ព្រោះគ្រាន់តែជាការបំពងសំឡេង និងធ្វើឲ្យច្របូកច្របល់សណ្តាប់សាធារណៈប៉ុណ្ណោះ។កត្តាសំខាន់ក្នុងបុព្វហេតុនៃការជំទាស់នេះ គឺជាកាតព្វកិច្ចក្រុមតំណាងរាស្ត្រដែលត្រូវចូលទៅជជែកតតាំងគ្នានៅក្នុងរដ្ឋសភា៕ដោយ៖ខេមរៈ
