ភ្នំពេញ៖តុលាការក្រុងភ្នំពេញ សម្រេចចេញដីកាឃុំខ្លួនលោក ពៅ សិទ្ធិ អតីតសមាជិកព្រឹទ្ធសភា ក្រោមការចោទប្រកាន់ពីបទក្លែងឯកសារ និងប្រើប្រាស់ឯកសារក្លែងនិងបានបញ្ជូនទៅឃុំនៅពន្ធនាគារព្រៃសជាបណ្ដោះអាសន្នជាបណ្ដោះ កាលពីវេលាម៉ោង១០:២០នាទីព្រឹកថ្ងៃទី២២កក្កដា នេះ ។
តាមព័ត៌មានដែលប្រមូលបានពីតុលាការបានឲ្យដឹងថា លោក ពៅ សិទ្ធិ អតីតសមាជិកព្រឹទ្ធសភា ត្រូវបានចាប់ខ្លួនកាលពីថ្ងៃទី១៩ ខែកក្កដា ឆ្នាំ២០១៥ ក្រោយពីមានពាក្យបណ្ដឹងរបស់ក្រសួងរៀបចំដែនដី នគរូបនីយកម្ម និងសំណង់ ដែលបានដាក់ប្ដឹងពីករណីក្លែងឯកសារ និងការផ្តល់ឯកសារក្លែងទៅឲ្យតុលាការនៅក្នុងរឿងក្ដីប្ដឹងទាមទារ ប្រាក់ចំនួន៨៥ម៉ឺនដុល្លារ ឈ្មោះ ឈ សាង ជនជាតិជប៉ុន ជាអគ្គនាយកធនាគារកសិកម្ម ឧស្សាហកម្ម តាំងពីឆ្នាំ១៩៩៥ នៅឯសាលាដំបូងខេត្តកណ្ដាល រហូតដល់មានការកាត់យកដីច្រើនប្លង់ពីចុងចម្លើយ ហើយលោក ពៅ សិទ្ធិ ដែលជាអ្នកឈ្នះក្តីបានយកដីនោះទៅលក់ឲ្យអ្នកដទៃ ក្នុងតម្លៃប្រមាណជា ១០លាន ដុល្លារអាមេរិក។ប៉ុន្តែជាអកុសលអចលនទ្រព្យដែល ត្រូវកាត់ឈ្មោះមកឲ្យលោក ពៅ សិទ្ធិ នៅក្នុងរឿងក្ដីនេះ គេបានលក់ និងកាត់ឈ្មោះឲ្យអ្នកដទៃអស់តាំងពីយូរមកហើយ ទើបលោក ពៅ សិទ្ធិ ពុំមានឯកសារដើម្បីផ្ទេរសិទ្ធិទៅឲ្យតតិយជន ទើបតតិយជន និងក្រសួងរៀបចំដែនដី នគរូបនីយកម្ម និងសំណង់ បានដាក់ពាក្យប្ដឹងដើម្បីឲ្យឈ្មោះពៅ សិទ្ធិ អនុវត្តតាមសេចក្ដីសម្រេចរបស់តុលាការកំពូល ។
ប្រភពបន្តថា ដោយហេតុថា ឈ្មោះ ពៅ សិទ្ធិ មិនអនុវត្តតាមសេចក្ដីសម្រេច និងថែមទាំងបានលក់ដីទាំងនោះកាត់ឈ្មោះទៅឲ្យអ្នកដទៃអស់ ក៏ត្រូវចាប់បញ្ជូនឡើងតុលាការ ហើយសម្រេចឃុំខ្លួននៅពេលនេះ ដើម្បីបើកការស៊ើបអង្កេតរកមុខជនពាក់ព័ន្ធមួយចំនួនទៀត ដែលឃុបឃិតគ្នារៀបចំផែនការតាមផ្លូវតុលាការ ដណ្ដើមយកដីពីអ្នកដទៃទៅលក់ជាប្រយោជន៍របស់បក្ខពួករបស់ខ្លួន៕
