ខេត្តកំពត៖កម្លាំងការិយាល័យកណ្តាល នគរបាលព្រហ្មទណ្ឌខេត្ត នៅវេលា ម៉ោង៩និង៣០នាទី ព្រឹក ថ្ងៃទី២៩ខែកក្កដាឆ្នាំ២០១៥ចំណុចភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត បានចុះឃាត់ខ្លួនបានជនសង្ស័យជាឪពុកពីបទរំលោភសេពសន្ថវៈ កូនស្រីបង្កើតខ្លួនតាមបណ្តឹងរបស់នារីរងគ្រោះ។
មន្ត្រីនគរបាល នៃការិយាល័យកណ្តាលព្រហ្មទណ្ឌខេត្ត បានប្រាប់ឣ្នកយកព័ត៌មានថា ជនសង្ស័យឈ្មោះអ៊ុក សំណាង ហៅឪអាប៉ោក ភេទប្រុស អាយុ៥៣ឆ្នាំ មុខរបរ កសិករ ។
រីឯជនរងគ្រោះជាកូនស្រីបង្កើត ឈ្មោះអ.ស.ផ អាយុ១៣ឆ្នាំ មានទីលំនៅក្នុងភូមិ ឃុំកើតហេតុ ខាងលើជាមួយគ្នា។មន្ត្រីនគរបាលដដែល បន្តថា ជនរងគ្រោះ កាលពីរសៀលថ្ងៃទី២៨ ខែកក្កដាម្សិលមិញបានដាច់ចិត្តឡើងមកប្តឹងពីឪពុកបង្កើតខ្លួនឯង ករណីចាប់រំលោភ ទៅលើខ្លួន រហូតសម្រេចបានចំនួន ៣ដង គឺ១លើកនៅថ្ងៃទី១៩ ខែកក្កដា លើកទី២នៅថ្ងៃទី២២ ខែកក្កដា និងលើកទី៣នៅថ្ងៃទី២៣ ចំណុចចម្ងាយពីផ្ទះប្រមាណ១០០ម៉ែត្រ ក្នុងខណៈជនសង្ស័យជាឪពុកបបួលកូនស្រីជាជនរងគ្រោះចេញទៅដាក់អន្ទាក់សត្វសំពោច។ ក្នុងមួយលើកៗក្រោយពីជនសង្ស័យជាឪពុករំលោភបានសម្រេចរួចហើយ គឺជនរងគ្រោះបានមកប្រាប់ម្តាយបង្កើតដែលត្រូវជាប្រពន្ធរបស់ជនសង្ស័យផងដែរប៉ុន្តែម្តាយហាក់ដូចធ្វើជាមិនដឹងមិនព្ញុជួយនាងទេ ដូច្នេះហើយទើបធ្វើឲ្យជនរងគ្រោះជាអនីតិជនសម្រេចឡើងមកប្តឹងនៅទីស្នាក់ការអង្គការ លីកាដូខេត្តកំពតដោយខ្លួនឯង ហើយអង្គការមួយនេះក៏បញ្ជូនបន្តមកឲ្យស្ថាប័នមានសមត្ថកិច្ចនគរបាលជំនាញខេត្តបន្តទៀត។
តាមចម្លើយសារភាពរបស់ជនសង្ស័យនៅចំពោះមុខសមត្ថកិច្ចថា ខ្លួនគេមិនបានប្រព្រឹត្តសកម្មភាពរំលោភទៅលើកូនបង្កើតខ្លួនឯងនោះទេគឺគ្រាន់តែបបួលកូនចេញទៅដាក់អន្ទាក់សត្វគ្រាន់បានជាគ្នាតែប៉ុណ្ណោះ។ ប៉ុន្តែទោះជាឆ្លើយដោះសារយ៉ាងណាក៏ដោយ ក៏កម្លាំងនគរបាលជំនាញនៅតែបន្តនីតិវិធីបញ្ជូនសំនុំរឿងទៅតុលាការដើម្បីចាត់ការតាមច្បាប់៕ដោយ ៖អ៊ួង វរិន្ទ
